Póróvep 1
1
Ochwâp mú Atím-Ekan adakye
1Atím-ekan nyí Otu Sólómon, mú wǎn-Otu Dívit, mú otu mú Ézerel o/tím, 2nyí a/chi a-chwáp ǒ a-já bubong ne a-kwâa byěm ne a-nyît kyikû-biǐtí-byiraa. 3Nyǐ a-man n ǒ etángê eringe nyí adakyú dyikpen ńdyí onet mú mu ne bubong ne eringe nyí adachi kanong. 4A-man n echi onet mú o*da/nyît ne chwǒm* o-já bubong, ne a-tángê e byisat ńkyí badachi. 5Atím-ekan ńnyín a-man n echi banet ḿbé mbe ne bubong ba-chîjá bubong, a-tông to banet ḿbé baa/kwâa byěm kiǐfáng 6eringe nyí mbé badanyît kyikû ne dyishí ńkyí atím-ekan ne bǎmbím ḿbé banet-bubong badabí.
Bacê ḿbé ba/já Byisat
[ 7Â a/fu, wo a-já ng bubong, wo a-man a-bwóp kpáá kashú a-kye Óburúkpâbí ofê.] Enyam-banet nyi e-né ng bubong ne byěm ekwâa.
8Wǎn ejí, tî atông a-jwo ńkyí ńchân ne ńnân mbe ba-sét ng ǒ. 9Byěm ḿbyí mbé mbe ba-tángê e ǒ byi/chi byi-chi édúú eyên e-kûnwa wǎ eringe etam nyí enong nang byibwáng byida ǒ eyángê byiko.
10Wǎn ejí, *dabángê banchi byibî ba-nîm ǒ*. 11Â mbé ba/raa kâng ba/fu, bâ byi-dim byi-da-kyé onet byi-ju, byida-ját banet ké bukwóp ḿbé ba*da/chi chwǒm*. 12Byi-man n eri kámbé bakpó nyangenyange, nké mbé ba/chi ba-kpú ké nkéré bii/man ne mbé. 13Be byi/chi byi-ri kángkáng azong-esang byi-wuri kányí byi-fé ké byise eten pwat. 14Bâ ne be, ne byi/chi byi-kyii kángkáng byěm ḿbyí byi/chi byi-jii.
15Wǎn ejí, *dacen ne azong-banet ányi*. *Dakyú ne mbé*. 16Ké nǎ, mbé baa*kan achi ké esim* â ba/bê kyibî-chwǒm echi*. Mbé nang nkéré orá ba/kpá byiko ḿbyí banet eju. 17Onet oo*man ekám kanurung* nang o-nwa nǎ* â nke ka-ri ng ǎ*. 18Nké azong-banet ányi nyi a-kuu ng kaǎtám ba-tî ng byiko ebe, kaǎtám ńké mbé ba/chi ba-róng ké nké ka-ju kámbé. 19Kajii ejii kángkáng nkéré ka-cen n ne bukyû ḿbú njii kajii. [Eringe ebónge to ne] onet mú dyikpen emen ndyi ké anwa enwa.
Bubong mbu bu-kó ng
20Fwôo n̂g atông ba-jwo. Bubong mbu bu-kó ng ké byiká-oshê ne ké bantim-busî, 21ne ejá kyíbóng kyíbóng ké ecím-afyi-oshê ne nang nyá mú banet ba/zû kyikit kyibónge, bu/fu, 22enyam-banet, ben bamu ba-ryuu ng ba/fu, ba-róng ng enyam ka-rí nǎ. Ben ba-kyâ bubong enen edángé ka-rí nǎ. Ben baa*ba/chi ba-kwâa chwǒm*? 23Tî n̂g atông ké nkéré n-kú m-bîn n běn. Me n/chi n-kye běn bacê ḿbé banong, n-chi běn ba-firi to ne bubong ḿbú me mu ne mbú. 24Me m/kpet běn ekó nyáá, n-sét ng běn n/fu, bâ n̂g, nké ben ba*fí ba-tî ng atông*. Ben ba/né mě ejwo. 25Ben baa/né bacê ejí kángkáng, ne ben ba*fí ba-bángê e ba/fu, me mbwât běn*. 26Ké bubwô ámbu, â ben ba/róng ké afaníkong, me n/chi n-jwó běn. Me n-fát ng běn kiikuku ké nkéré bushî boo/róng běn, 27ké nkéré bu-kú bu-bâ wǎ kyibî-bufú ne wǎ afú-afaníkong nyí adachi bushî, ba-firi ké bafip ne bubân. 28Nkéré ámu kâng nké ben ba/chi ba-kó bubong, nké me mm*ba/chi n-faa běn ojá*. Ben ba/chi ba-kyé mě ké kángkáng byikit, nké baa*ba/chi ba-ri mě*. 29Ké nǎ, ben bubong bu-sa ng běn kafâ, ne ben kángkáng nkéré bamu ba-né ng echi ńkyí Óburúkpâbí o/sét. 30Ben ba/mû ba*fí ba-ryuu ng bacê ejí* ba-tî nang atông ké nkéré m/bîn běn*. 31Ké bubwô ámbu kâng, ben ba/chi ba-koo ńkyí kyi/kwárê ne ben, ne édúú enen e/chi e-chi běn ba-fám éfâm. 32Banet ḿbé ba*da/nyît ne chwǒm* ba-kpú u, ké nǎ, mbé ba/né bubong. Enyam-banet e-kpú u, ké nǎ, ee*kérê*. 33Nké nang yeě mú mu o-fwôo ng atông o-jwo mě, o/chi o-kyú kanong. Chwǒm kii*ta ǎ* ne chwǒm kyi*fí ńkyí kyi/chi kyi-chi ǎ o-shî*.
Currently Selected:
Póróvep 1: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
