SEPANIA 1
1
1 #
2 Rac 22.1—23.30; 2 In 34.1—35.27 Ini bala luk biré Tuhan ni Sepania, kareb Raca' Yosia anak Amon ngimet Yahuda. (Idi Sepania ineh inul Raca' Hesekia. Hesekia nenginul Amaria. Amaria nenginul Gedalia. Gedalia nenginul Kusi. Idi Kusi nenginul Sepania.)
Aco Luk Inan Tuhan Ngukum
2Kebala Tuhan, “Ui miak nala' amung-amung luk luun tana', 3ieh ineh amung-amung lemulun, pung, suit idi lawid pana'. Ui miak ngacing ebpeh amung-amung luk dat. Ui miak ngaté lemulun, pad seburur pana' nateh luk ketecan luun tana' ineh. Ui ini Tuhan pangeh nepebala.
4“Ui miak necat nelun Yahuda idi Yerusalim. Ui miak ngusag amung luk ketecan ratnan sembayang Baal su ineh, idi nala' ngadan idi terawé ratnan amung imam luk sembayang inan Baal, do' imam luk sembayang inan Baal mo', idi imamKu sebuleng pana'. 5Ui miak ngaté lemulun luk sembayang luun apo ruma' inan aco, bulan, idi gituen. Ui miak ngaté lemulun luk sembayang Negku idi pebulung pa kiungKu, idi luk pebulung dengan ngadan akang Milkom pana'. 6Ui miak ngaté lemulun luk teketed rat Negku idi na maya' Negku teh, ieh ineh lemulun luk na amé' Negku, idi luk na mutuh pedengan.”
7Aco Tuhan ineh malé macing. Do' pirud pa kiungNeh. Tuhan temina' ngaté pupuNeh mepad kudeng aceh baré luk kereten. 8Kebala Tuhan, “Kareb aco ngeret baré ineh, Ui miak ngukum amung pengulu idi anak raca', idi amung lemulun luk maya' adat pupu baken. 9Ui miak ngukum amung lemulun luk sembayang mepad kudeng lun pupu baken, luk mano idi ngaté, idi luk manu' ruma' akangdeh ku binaweh luk pinodeh.”
10Kebala Tuhan, “Bang aco sineh muyuh miak ninger arod lemulun luk munung Tanga' Lawid déi' Yerusalim. Muyuh miak ninger tido lemulun bang babpat bawang luk mebaruh, idi aceh uni luk rayeh luun surud. 11Do' temido idi nangi' kareb muyuh ninger uni ini, O muyuh luk tudo bang babpat bawang luk pa beneh, ngaceku amung lun luk pepua' pangeh naté!
12“Kareb ineh Ui miak ngalap aceh lapung idi ngilu' Yerusalim do'-do'. Ui miak ngukum lemulun luk metalang niat, idi luk lutep maya' piandeh sebuleng, luk pebala bang niatdeh, ‘Allah na nganau' anun-anun, luk do' idi luk dat pana'.’ 13Binawehdeh miak tebanen, idi ruma'deh uen ngusag. Na ideh miak tudo bang ruma' luk pidutendeh, idi na ideh miak ngirup abpa' anggur ratna kabun luk uendeh nibu.”
14Aco rayeh Tuhan malé macing! Bang aco sineh lun pebunu' luk meluun sangit pana' miak ngarod ku dat niatdeh. 15Ieh ineh aco useh, aco susa' idi dat niat, aco usag idi até, aco dacem idi meseraber, aco laput idi barui. 16Ieh ineh aco uni serupit bunu' idi arod lun pebunu' luk ngerieng bawang luk linibung idi pudut luk medita'.
17Kebala Tuhan, “Ui ngacing susa' luk pelaba rayeh kuan lemulun, pad ideh ngakap-ngakap mepad kudeng lun luk mebuser. Ideh pangeh nenganau' sala' pa kiungKu, idi nekini dara'deh uen ngutang mepad kudeng abpa' idi butungdeh miak melu luun tana'.”
18Amung pirak idi amasdeh na miak ngulun nedeh, kareb aco luk inan Tuhan ngegala' usehNeh. Amung tana' miak uen ngusag ku apui usehNeh. Ieh miak ngaté amung-amung lemulun luk tudo bang tana'.
Currently Selected:
SEPANIA 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
