NAHUM 3
3
1Bawang Ninewé luk mebalih idi ngaté,
luk mepanu' ku binaweh luk miak tebanen, miak kumin.
2Ninger uni babpet kuda,
uni roda, idi uni kuda luk upun,
idi uni keréta luk meguai!
3Lun luk maya' kuda upun amé' pebunu',
pelapet merasat, idi busu mesilo.
Butung-butung pebuun pad na mekiap,
idi lemulun metebaceng luun dalan,
ngaceku mula' butung!
4Ninewé, decur luk mesawa' ineh kunin.
Ieh do' taga idi mepanu' ku ileh,
luk ngeruid nelun baken nganau' sala'.
Ieh nengeruid niat mula' pupu baken idi pasét nedeh.
5Kebala Tuhan luk Melalud,
“Ui miak ngukum namu, O Ninewé!
Ui miak ngelebpa namu,
pad iko migu' siren amung pupu baken.
6Ui miak ngebeneh namu,
idi mapen namu ku lutak.
Lemulun miak nutong namu idi megagap.
7Lemulun luk nier namu megileg.
Kelabadeh, ‘Ninewé pangeh inusag!
Idéké luk méi' neneh?’
Seburur pana' nateh luk pian ngubuk namu.”
8O Ninewé, iko meluun do'ké ratnan bawang Tibis, ieh ineh bawang luk rayeh déi' Masir. Bawang ineh pana' inan aceh abpa' luk ngelibung neneh mepad kudeng alad. Abpa' Nil luk mangun ku libungneh luk meraben. 9Ieh nengimet Sudan idi Masir, idi laludneh na lakan. Libia pana' rurumneh. 10Iamo' lun Tibis pangeh tiban iné' bawang baken. Idi anid lisangen dalan anak-anakdeh bibal pad ideh naté. Lun rayeh-rayehdeh pangeh kiling, idi ideh bibpat kuan lun luk naban nedeh.
11O Ninewé, iko pana' miak melepu ngaceku mabuk! Iko pana' miak nutun buro ratnan bunu'mu. 12Amung libungmu luk meraben mepad kudeng gita' luk melak bua'; nguyu' kayuh ineh pad bua'neh mebpeh bang tangmu! 13Lun pebunu'mu mepad kudeng decur, idi bawangmu na miak tuped pa kiung bunu'mu. Apui miak ngeseb palin tanga'mu. 14Ngereb abpa' idi iko temina' uen ngerieng, idi ngetueh libungmu luk meraben! Do' nganau' tana' salit, pad iko miak nganau' batu bata ineh ku ngeraben libung ineh! 15Iamo' sagan tu pana' iko nganau' kudeng ineh iko miak sabpen kian pitayen bang bunu' lek. Iko miak kenen mepad kudeng padé luk kenen kato.
Iko amé' mula' mepad kudeng kato! 16Iko inan lun luk pepua' kinula' gituen bang langit! Iamo' nekini ideh na idi peh, mepad kudeng kato luk malad iladdeh pad ideh temulud. 17Lun rayehmu mepad kudeng kato luk amé' mula' idi ucep luun libung kareb meteneb. Iamo' kareb mét idang ideh buro, idi seburur pana' nateh luk kali' su ulekdeh.
18O raca' Asur, amung pengulumu pangeh naté, idi amung lun rayehmu rudap macing ruked-ruked! Pupumu urap-urap luun pegkung, idi seburur pana' nateh luk nguit nedeh muli'. 19Na luk ku ngedo' ét idi uratmu. Idé-idé luk ninger bala ini miak mepag palad ngaceku ideh mawang niat. Seburur pana' nateh luk nepuit ratnan datmu.
Currently Selected:
NAHUM 3: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
