NAHUM 1
1
Useh Tuhan Déi' Ninewé
1 #
Yes 10.5–34; 14.24–27; Sep 2.13–15 Ini bala ratnan Ninewé, ieh ineh surat ratnan luk sinier Nahum, lun luk rat Elkos.
Tuhan Museh Nan Ninewé
2Tuhan Allah temaruh;
Ieh ngukum nelun luk sikal metueh rat Neneh,
idi Ieh ngua' nedeh dengan useh.
3Tuhan na malé museh;
iamo' Ieh melalud,
idi na miak na Ieh ngukum nelun luk mesala'
Su luk dalan Tuhan inan barui.
Laput ineh abuh ratnan kukudNeh!
4Ieh mebpeng abpa' rayeh, pad ieh mekeket,
idi arur-arur pana' ruenNeh mekeket.
Laman luk déi' Basan melayuh,
idi Pegkung Karmel tekering,
idi busak luun Pegkung Lebanon mekarang.
5Amung pegkung meruyuh pa kiung Tuhan;
idi surud pana' sigio.
Tana' ini pana' meruyuh kareb Tuhan silagan;
idi amung lemulun pana' megegker.
6Kareb Tuhan museh, idéké luk miak tuman ku usehNeh?
Ieh ngutang usehNeh luk mebudung;
batu-batu pana' mekareg amé' ku abuh pa kiungNeh.
7Tuhan ineh do';
Ieh nengelibung pupuNeh kareb inan susa';
idi Ieh matar lemulun luk lumi Neneh.
8Mepad kudeng ereb luk rayeh,
Ieh ngusag amung-amung luk sikal metueh rat Neneh.
Ieh ngerada' amung bunu'Neh, pad ideh mabud maté.
9Ngudehké muyuh pegayam sikal metueh ratnan Tuhan?
Ieh miak ngaté nemuyuh.
Na seburur miak nutun Tuhan, meluun ratnan sekua'.
10Mepad kudeng tabpa' luk mepamung idi geramih luk tekering
muyuh miak sabpen!
11Rat namu, O Ninewé, nacing seburur lemulun luk megéi' ngerawé luk dat, idi luk sikal metueh ratnan Tuhan, ieh ineh aceh lun duken Belial.#1.11 Belial, ieh ineh lemulun luk pelaba dat luk pinginud Sétan. 12Ini luk belén Tuhan kuan pupuNeh, “Sagan pana' lun Asur mula' idi metueh, bawehdeh miak uen ngusag pad ideh na idi peh. O pupuKu, muyuh nedereh inau'Ku, iamo' na Ui pian nganau' kudeng ineh sekua' teh. 13Nekini Ui ngagka' lalud Asur pa luun muyuh, idi Ui neka kaling muyuh.”
14Ini luk bila Tuhan ratnan lun Asur: “Na lun ngerawé nedeh peh. Ui miak ngusag amung akang luk bang ruma' allahdeh. Ui nganau' aceh lengutan kuan lun Asur, ngaceku na ideh petulu mulun bang tana' ini.”
15 #
Yes 52.7
Siruh, seburur lun duken macing maya' pegkung, luk nated bala luk do'! Ieh nalan pad ieh mada' ratnan tueh luk macing nemuyuh. O lun Yahuda, ngerayeh aco muyuh, idi maré kuan Allah luk pijani' muyuh. Lemulun luk dat na miak ngerieng bawang muyuh teh. Ideh pangeh inusag!
Currently Selected:
NAHUM 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
