२ कोरिन्थी 9
9
विश्वासीन्हक लाग भेटी उठैना
1यहूदियम रना विश्वासीहुँकन पठाइल भेटीक बारेम टुँहन लिखपर्ना कुछु आवश्यक नैहो। 2सेवा कर्ना टुन्हक भारी इच्छा बा कना महीह थाहाँ बा। याकर बारेम माकेडोनियक विश्वासीन्हक सामुन्नेम गर्व कर्टी कनहुँ, कि टुह्र अखैयक विश्वासीहुँक्र गैल् सालसे सहायता करक लाग तयार बाटो। वास्तवम टुन्हक जोश देख्क माकेडोनियक विश्वासीहुँक्र फे धेर जन जोशिलो होरल। 3तर यी बारेम टुन्हक लाग हम्र गर्व करल बात बिना कामक जिन ह्वाए, ओ म्वार कहल अनुसार टुह्र तयार रहहो कैक मै यी भैयन पठाइटुँ। 4यदि माकेडोनियक कौनो मनै आक टुँहन तयार नैभेटैहीँ कलसे, हम्र लाज मुनेबाटी, ओ टुह्र फे लाज मुनेबाटो, काकरकि हम्र टुन्हकम भारी भरोसा कैरख्ली। 5टुह्र देना प्रतिज्ञा करल भेटी उठाक ठीकठाक पाररखहो कैक महीसे आघ यी भैयन टुन्हकठे पठैना मजा हुई कना सम्झनु। यी भेटी करकापले नाहीँ, तर आपन राजीखुशीले देहल भेटीक रूपम तयार ह्वाए।
6तर बात यिह हो, कि डान्चे बुउइयन डान्चे उब्जनी कर्ठ, धेर बुउइयन धेर उब्जनी कर्ठ। 7जेहीह जत्रा देनास लग्ठा ओत्रा देओ। चित्त दुःखैटि करकापम पर्क जिन देओ, काकरकि खुशीसे देहुइयन परमेश्वर प्रेम कर्ठ। 8परमेश्वर टुँहन प्रशस्त आशिष देनेबाट। तब टुन्हकठे सड्डभर सारा चिज प्रशस्त रही, ओ हरेक असल कामक लाग टुह्र प्रशस्त देह सेक्नेबाटो। 9धर्मशास्त्रम असिक लिखल बा,
“ऊ बुइठा ओ गरीबन मन खोल्क देठा,
वाकर करल भलाइ युग युगसम पलरठा।”#भज ११२:९
10बुइक लाग बीया ओ खाइक लाग भोजन परमेश्वर देठ। उहाँ टुँहन चहना सब बीया देहहीँ ओ उहिँम बृद्धि करैहीँ। ओ टुह्र मन खोल्क देलक कारणले उपकारक कामक लाग धेर फारा फराइ सेक्नेबाटो।#यशै ५५:१० 11टुह्र सड्डभर खुल्ला मनले देह सेक्नागरी परमेश्वर टुँहन धनी बनैहीँ। टुन्हक खुल्ला मनले देहल भेटी आवश्यकता रहल मण्डलीम हम्र बाँटबेर हुँक्र परमेश्वरह धन्यवाद देनेबाट।
12टुन्हक देहल दानले यरूशलेमक विश्वासीन्हक अभाव पूरा हुइना केल नाहीँ, तर यी कामले हुँक्र खुशीसे परमेश्वरह धन्यवाद देहीँ। 13टुन्हक करल सेवक परिणाम स्वरूप, हुँक्र परमेश्वरह महिमा देहीँ। काकरकि हुँकन ओ औरजहन टुह्र मन खोल्क देहल सहायताले टुह्र ख्रीष्टक खुशीक खबरप्रति आज्ञाकारी बाटो कना बात देखैठा। 14परमेश्वरक देहल अपार अनुग्रह टुह्र पैलक कारणले हुँक्र टुन्हक लाग मन खोल्क प्रार्थना कर्नेबाट। 15उहाँक वयान कर नैसेक्जैना वरदानक लाग परमेश्वरह धन्यवाद ह्वाए।
Currently Selected:
२ कोरिन्थी 9: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
