२ कोरिन्थी 6
6
1परमेश्वरक सहकर्मी हुइलकओर्से हम्र टुँहन बिन्ती करटी, कि परमेश्वरक अनुग्रह खर्बास जिन हुइदेओ। 2परमेश्वर कठ,
“प्रसन्न हुइना समयम मै टुँहार पुकारा सुन्नु,
ओ मुक्ति देना दिनम मै टुँहीन मद्दत कर्नु।”
हेरो, परमेश्वर प्रसन्न हुइलक समय आबहेँ हो, ओ मुक्ति पैना दिन आज हो।#यशै ४९:८
पावलक दुःखकष्ट
3हमार करल सेवम कौनोजन फे दोष नैपैहीँ कैक हम्र कौनोजहन बाधा देना काम नैकर्टी। 4तर हम्र हरकिसिमले अपन्हेह परमेश्वरक सेवक हुइटी कैक देखैठी। हम्र सब कठिनाइ, विपत्ति, सङ्कष्ट, ओ दुःख धीरजसे सहना कर्ठी। 5हम्र मर्वापारख्ली, थुन्वापारख्ली, हुलदङ्गम परलबाटी, खट्क परिश्रम कर्ठी, बिना सुत्ल रात बितारख्ली, भुँख्ल-पियस्ल बाटी।#प्रे १६:२३ 6हमारम रहल पवित्र आत्मा ओ हमार निष्कपट प्रेमद्वारा हम्र अपन्हेह शुद्ध, समझदार, सहनशील ओ दयालु प्रमाणित कैरख्ली। 7हम्र सत्य बात विश्वासयोग्य होक प्रचार कर्ठी, परमेश्वरक शक्ति हमारम काम कर्टिबाट। किहुह आक्रमण कर्ना हतियार दाहिन पाञ्जर ओ आपन रक्षा कर्ना हतियार बाउँ पाञ्जर भिर्लरठी। यी हतियार धार्मिकता हो। 8मनै हमार आदर कर्लसे फे, बेइज्जत कर्लसे फे, हमार नाउँ गन्धैलसे फे, या नाउँ चल्लसे फे हम्र परमेश्वरक सेवा कर्ठी। मनै हमन ठग्गाअस व्यवहार कर्लसे फे हम्र इमानदार बाटी। 9हम्र चिन्हल-जानल रलसे फे नैचिन्हल-नैजानलअस व्यवहार कर्वापैठी। मुवलअस रलसे फे बाँचल बाटी। मर्वा पैलसे फे मुवापैल नैहुइटी। 10शोकम रलसे फे आनन्दित बाटी। हम्र गरीब रलसे फे मनैन आत्मिक रूपले धनी बनैठी। हम्र कुछु नैरहलअस रलसे फे हमारठे सब चिज बा।
11कोरिन्थक विश्वासीहुँक्र, हम्र आपन मन खोल्क प्रष्ट रूपले टुँहन कैदेरख्ली। 12टुन्हकप्रति हमार प्रेम कम नैहो, बेनसे टुन्हक प्रेम पो हमारप्रति कम होरहल। 13आब मै टुँहन आपन लर्का समझ्क कहटुँ, कि टुह्र फे आपन मन खुल्ला ढरो।
जीवित परमेश्वरक मन्दिर
14अविश्वासीनसे टुह्र एक्क जुवम मच्याइलअस जिन होओ। काकरकि धर्म ओ अधर्म कसिक मिल सेकी? अजरार ओ अन्धकार कसिक सँग रह सेकी? 15का ख्रीष्ट ओ शैतान मिल सेकहीँ? का विश्वासी ओ अविश्वासी फे मिल सेकहीँ? 16परमेश्वरक मन्दिरसे मूर्तिक कुछु सम्बन्ध नैरहट्। काकरकि हम्र त जीवित परमेश्वरक मन्दिर हुइटी। परमेश्वर अपन्हे कैरख्ल,
“मै हुँकन्हकम बास करम,
ओ हुँकन्हक बीचम नेङघुम करम,
मै हुँकन्हक परमेश्वर हुइम,
ओ हुँक्र म्वार मनै हुइहीँ।”#लेवी २६:१२; इज ३७:२७; १ कोर ३:१६; ६:१९
17परमप्रभु कठ,
“अविश्वासीन्हक बीचमसे टुह्र निकर्क आओ,
हुँकनसे अलग होओ,
अशुद्ध चिज कुछु जिन छुव,
तब मै टुँहन स्वीकार करम।#यशै ५२:११
18मै टुन्हक बाबा हुइम,
ओ टुह्र म्वार छाई-छावन हुइबो,
सर्वशक्तिमान् परमप्रभु कठ।”#२ शमू ७:१४; १ इति १७:१३; यशै ४३:६; यर ३१:९
Currently Selected:
२ कोरिन्थी 6: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
