२ कोरिन्थी 4
4
माटीक भाँरम धन
1परमेश्वर दयालु होक हमन यी काम देरख्ल। उहओर्से हम्र हरेस नैखैटी। 2हम्र नुकछिपक कर्ना शरमलग्टिक सब काम छोररख्ली। हम्र छलकपटक काम नैकर्टी, ओ परमेश्वरक वचनह झूट नैबनैटी। तर सत्यक वचन खुलस्त रूपम प्रचार कर्ठी ओ परमेश्वरक आघ हम्र सत्य बात केल बोल्ठी, ओ सब मनै आपन विवेकले यी बात थाहाँ पैठ। 3यदि हमार प्रचार करल खुशीक खबर घुम्टोले छोपगैल् बा कलसे, उ नाश हुइना मनैन्हक लाग केल छोपगैल् बा। 4यी संसारक देव शैतान विश्वास नैकरुइयन्हक समझह आन्धर बनादेराखल। हुँक्र खुशीक खबरक गौरवमय ज्योति नैदेख्ट। महिमित ख्रीष्ट, जे परमेश्वरक रूप हुइट, उहाँक बारेम प्रचार कैगिल् यी सन्देश हुँक्र नैबुझ्ट। 5हम्र आपन बारेम प्रचार नैकर्टी, तर येशूक कारण हम्र टुन्हक दास होक, येशू ख्रीष्ट जो प्रभु हुइट कैक प्रचार कर्ठी। 6“अन्धकारम ज्योति चम्क” कहुइया परमेश्वर जो हमार हृदयम ज्योति चम्कारख्ल। यिहिँले परमेश्वरक महिमा महान बाटन कना बात हम्र बुझ्ठी। जाट्टीसे उ महिमामय ज्योति ख्रीष्टक मुहारम बाटन।#उत १:३
7यी महान शक्ति हमार नैहो तर परमेश्वरक हो कैक प्रष्ट पारक लाग यी धन हमारठे माटीक भाँरम बा। 8हम्र सबओर्से थिचोमिचोम परलबाटी, तर धूरमाटीम मिलल् नैहुटी। अन्योलम परलबाटी, तर निराश नैहुइलहुइटी। 9सँतावा पारख्ली, तर छोर्वा नैपैलहुइटी। मर्वा पाक ढलरली, तर नाश नैहुइलहुइटी। 10येशूक जीवन हमार शरीरम प्रकट ह्वाए कैक हम्र उहाँक मृत्युह हमार शरीरम बोक्क नेङ्ठी। 11हमार यी मुना शरीरम येशूक जीवन देखपर कैक जो हम्र उहाँक कारण मुना अवस्थम पुगरठी। 12असिक हम्र मृत्युक मुहटर जिठी, ज्याकर कारण टुह्र अनन्त जीवन पारख्लो।
13“मै विश्वास कर्नु, उहओर्सै मै बोल्नु” कैक धर्मशास्त्रम लिखुइया मनैयकम रहल विश्वास कर्ना आत्मा हमारम रलकओर्से हम्र फे विश्वास कर्ठी ओ बोल्ठी।#भज ११६:१० 14हमन थाहाँ बा, कि परमेश्वर जो येशूह मुवलमसे जियैलह। उह परमेश्वर हमन ओ टुँहन जियाक आपनठे लैजउइयाबाट। 15यी सब बात टुन्हक हितक लाग हुइलहा, काकरकि जत्रा धेर मनै परमेश्वरक अनुग्रह पैहीँ, ओत्रा धेर मनै परमेश्वरक महिमक लाग उहाँह धन्यवाद देहीँ।
16उहओर्से हम्र कबु फे हरेस नैखैटी। हमार बाहिरी शारीरिक बल घट्टी गैलसे फे हमार भित्रक आत्मिक बल दिनदिन लौव हुइटी गैरहल। 17हम्र एक घरिक लाग छुटीछुटी समस्या झेलटीबाटी। तर यी समस्या हमन अनन्त महिमा पाइक लाग सहायता कर्ठा, जौन अनन्त महिमा समस्यासे धेर महान बा। 18हम्र देखपर्ना चिजह नाहीँ, तर नैदेखपर्ना चिजह हेर्ठी, काकरकि जौन चिज देखपर्ठा, उ चिज कुछ समयक लागरठा, तर जौन चिज नैदेखपरट् उ चिज सड्डभरिक लाग पलरठा।
Currently Selected:
२ कोरिन्थी 4: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
