२ कोरिन्थी 3
3
1का हम्र फेदोस्र आपन प्रशंसा करक लाग बाटी? और कत्रा मनै टुन्हकठे यी बातक सिफारिस पत्र लेक आइअस हम्र टुँहन ओ टुह्र हमन सिफारिस करपर्ना कुछु आवश्यक बा का? 2टुह्रहे हमार सिफारिस पत्र हुइटो, जौन सिफारिस सब मनै पहर्क बुझ सेक्नागरी टुन्हक हृदयम लिखल बा। 3टुह्र येशू ख्रीष्टक लिखल पत्र अर्थात् हमार करल सेवकाइक नतिजा हुइटो, जौन चिठी मसीले नाहीँ, तर जीवित परमेश्वरक आत्मले लिख्गैल् बा: पत्थ्रक पाटीम नाहीँ, तर मानव हृदयक पाटीम लिखल बा।#प्रस २४:१२; यर ३१:३३; इज ११:१९; ३६:२६
4ख्रीष्टद्वारा परमेश्वरप्रति हमार भरोसा असिन बा। 5कौनो फे चिज हमारतर्फसे आइल हो कैक हम्र दाबी कर्ना योग्यक नैहुइटी, तर हमार योग्यता त परमेश्वरसे अइठा। 6उहाँक करल लौव बाचम सेवक हुइक लाग उहाँ हमन योग्य बनैल। यी बाचा लिखित व्यवस्थक नाहीँ, तर परमेश्वरक आत्मक बाचा हो। काकरकि पुरान लिखित व्यवस्था मृत्युम ओराजैठा, तर लौव बाचम पवित्र आत्मा जीवन देठ।#यर ३१:३१
लौव बाचक गौरव
7मृत्यु अन्ना व्यवस्थक अक्षर पत्थ्रक पाटीम लिखल रह। उ व्यवस्था असिन गौरवमय रह, कि वाकर तेजक कारण इस्राएलीहुँक्र मोशक अनुहार ह्यार नैसेक्ल, तर उ तेज हेरैटीजाइटह।#प्रस ३४:२९ 8पवित्र आत्मक सेवा झन् कत्रा गौरवमय हुई? 9काकरकि दोषी ठहरैना काम गौरवमय रह कलसे, मनैन धर्मी ठहरैना काम झन् कत्रा गौरवमय हुई? 10वास्तवम लौव बाचक गौरव एकदम धेर रलक कारण पुरान व्यवस्थक गौरव अपन्हे बिलागैल्। 11यदि एकघरी रना पुरान बाचा अत्रा गौरवमय रह कलसे, सड्डभर रना लौव बाचा झन् कत्रा गौरवमय रही?
12हमार सबजन्हक असिन आशा रहलओर्से हम्र एकदम साहसी होरली। 13हम्र मोशाअस नैहुइटी, हुँकहार आपन मलिन हुइटीगैल् चमकक् अन्तिम झलक इस्राएलीहुँक्र नैदेखहीँ कैक आपन अनुहार घुम्टोले छोप्ना करँट्।#प्रस ३४:३३ 14तर हुँकन्हक मन कठोर रलहन, ओ आजसम फे पुरान बाचा पह्रबेर उ घुम्टोले हुँकन्हक समझ छोपदेठा, उहओर्से हुँक्र सत्य बात बुझ नैसेक्ट। आब यी घुम्टो येशू ख्रीष्टम विश्वास कर्लसे केल हटाइ सेक्जैठा। 15हो, आम्हीसम फे मोशक किताब पह्रबेर हुँकन्हक समझ उ घुम्टोले छोपजैठन, ओ हुँक्र बात नैबुझ्ट। 16तर जब मनै प्रभुकठे घुम्ठ, तब हुँकन्हकमसे घुम्टो हटजैठन।#प्रस ३४:३४ 17प्रभु आत्मा हुइट, जहाँ प्रभुक आत्मा रठ, उहाँ स्वतन्त्रता रठा। 18हमार घुम्टो हटागैलक कारण हम्र सबजन द्याखसेक्ठी ओ परमप्रभुक महिमा झल्कैठी। प्रभु आत्मा हुइट ओ उहाँ हमन झन्-झन् उहाँकअस महिमामय रूपम परिवर्तन कर्टिजैठ।
Currently Selected:
२ कोरिन्थी 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
