२ कोरिन्थी 10
10
पावलक अधिकार प्रभुसे आइल हो
1मै पावल, टुह्र सबजन्हक सामनेम नम्र रठुँ, तर टुँहनसे दूर रहलब्याला साहस देखैठुँ। ख्रीष्टक नम्रता ओ कोमलताद्वारा मै टुँहन बिन्ती करटुँ। 2मै टुँहन अनुरोध करटुँ, कि मै टुन्हकठे जाइबेर महीह उ कठोरता देखाइ जिन पर, जौन कठोरता हमन संसारक मनैअस चल्ठ कैक शङ्का करुइयन देखैना मै निश्चय कैरख्नहुँ। 3हम्र संसारम बाटी, तर संसारक मनैन्हकअस झग्रा त नैकर्टी। 4हमार हतियार त संसारिक नैहो, हमारठे परमेश्वरक शक्तिशाली हतियार बा जौन हतियारले सैनिक किल्लह ध्वस्त करसेक्ठा, ओ अनावश्यक वादविवादह नाश कर्ठा। 5परमेश्वरक सत्य ज्ञानक विरोधम उठ्ना बहस ओ घमण्डले भरल बाधह हम्र नाश कर्ठी, ओ सब विद्रोही विचारह अधीनम आन्क ख्रीष्टप्रति आज्ञाकारी बनैठी। 6टुह्र पूरा रूपम ख्रीष्टक आज्ञा मनुइयन हुइबो त आज्ञा नैमनुइयन सजाय देहक लाग हम्र तयार हुइनेबाटी।
7टुह्र त बाहर देखपर्ना चिजह केल ह्यारटो। यदि टुह्रमध्ये कुई मै ख्रीष्टक हुइटुँ कैक पूरा विश्वास कर्ठा कलसे, ओसिन मनै बुझपर्ठा कि वाकरअस हम्र फे ख्रीष्टक हुइटी। 8हमार अधिकारक विषयम मै धेर घमण्ड कर्लसे फे मै शर्मम नैपर्नेहुइटुँ, काकरकि यी अधिकार टुँहन बिगारक लाग नैहो, तर टुँहन सुधारक लाग प्रभु हमन देरख्ल। 9मै चिठी लिख्क टुँहन डर देखाइ नैख्वाजठुइटुँ। 10कुई-कुई कठ, “पावलक चिठी खरो ओ गम्भीर रठस, तर ऊ अपन्हे उपस्थित हुइल् ब्याला कमजोर रठा ओ वाकर ब्वालल् कुछु नैलग्टस।” 11ओसिन मनै यी बुझपर्ठा, कि हम्र उपस्थित नैरहलब्याला चिठीम ज्या कठी, उपस्थित रहलब्याला फे उह काम कर्ठी।
12आपन नाउँ अपन्हे उठैना मनैनसे हम्र अपन्हेह दाँज या वर्गीकरण कर नैचहटी। तर हुँक्र आपन मापदण्ड अपन्हे बनैठ, ओ ओइहेँले अपन्हे-अपन्हे नापिक-नापा करबेर मूर्ख ठहर्ठ! 13हम्र अधिकारक सीमा नाहाङ्क गर्व नैकर्टी, तर टुन्हक बीचम फे काम करक लाग परमेश्वरक त्वाकल सिमम रह्क घमण्ड कर्ठी। 14टुन्हकठे हम्र कबु नैआइलअस बढाइचढाइ कैक घमण्ड नैकर्टी। ख्रीष्टक बारेम खुशीक खबर लेक टुन्हकठे पैल्ह पुगुइयन त हम्रहे हुइटी। 15औरजन्हक करल परिश्रमम हम्र सीमा नाहाङ्क गर्व नैकर्टी। तर हमार आशा यिह बा, कि टुन्हक विश्वास बहर्टीजाइबेर टुन्हक बीचम हमार कार्यक्षेत्र फे झन्-झन् बरा हुइटीजाए। 16तब टुँहनसे दूर कुई फे खुशीक खबर नैसुनाइल और देशम समेत हम्र खुशीक खबर सुनाइ सेक्नेबाटी। असिक आनक कार्यक्षेत्रम जाक हम्र काम कैरख्ली कना बारेम घमण्ड कर्ना बात नैउठ्ने हो। 17धर्मशास्त्रम लिखल बा, “गर्व करुइया परमप्रभुक करल कामम गर्व करपर्ठा।”#यर ९:२४ 18जब मनै आपन प्रशंसा अपन्हे कर्ठ, उ धेर महत्वक बात नैरहट्। प्रभु हुँकन्हक प्रशंसा कर्ल कलसे, उ धेर महत्वपूर्ण बात हो।
Currently Selected:
२ कोरिन्थी 10: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
