Yikri 35

Vʋʋsg daar tõogo

1A Moyiis tigsa Israyɛll nebã fãa n yeel bãmb yaa: «Ad bũmb nins Sẽn-Ka-Saab sẽn yet yãmb tɩ y maane. 2#Yik 20.8-11, 23.12, 31.15, 34.21, Mk 23.3, Tõ 5.12-14Tʋm-y rasem a yoobã, la rasem a yopoe daarã na n yɩɩ vʋʋsg daar sẽn welg toor yãmb yĩnga. Yaa daar sẽn yaa toor Sẽn-Ka-Saab waoogr yĩnga. Ned sã n maan tʋʋmd badaar bɩ b kʋ-a. 3Bɩ y ra widg bugum y yiyã pʋse, vʋʋsg daarã daar ye.»

Teed sɛk roogã yĩnga

(35.4-9, Yik 25.1-7, 35.10-19, 39.32-41)

4A Moyiis yeela Israyɛll nebã fãa yaa: «Ad Sẽn-Ka-Saab sẽn yeel yãmb tɩ y maane. 5Yãk-y bũmb nins yãmb sẽn so wã n kõ Sẽn-Ka-Saabo. Bɩ ned ning fãa sũur sẽn noom ne Sẽn-Ka-Saab wa ne kũun n wa kõ bãmba: Yaa sãnem ne wanzuri la zũudu, 6la gĩs sẽn yaa kẽeg haoo ne gĩs-moaama, la gĩs-miid ne lamd gĩs-bãanega, la gĩs sẽn maan ne bʋʋs kõbdo, 7la pe-raad gãnd sẽn moneme, ne dofẽ-rãmb gãndo, la akasiya raado, 8ne kaam, fɩtl-dãmbã yĩnga, la parfẽ sẽn tar yũ-noogo, nug-tikr kaamã ne wisdã yĩnga, 9la onigs kug ne kug a taab sẽn na n ning maan-kʋʋr kãsem fuugã la yãoog lutgã.

10Bɩ tʋʋm-mitb nins fãa sẽn be yãmb sʋkã maan bũmb nins fãa Sẽn-Ka-Saab sẽn yeelã. 11Maan-y sɛk roogã sẽn yaa fu-roogã ne a lutgã, la a yagendsã ne a ra-pegdã la a ra-bɩlmã ne a ra-lugdsã la b naoã, 12la kãoobg koglgã ne a ra-bɩlmã, la bas-taal zĩigã ne fu-lillidgã, 13la taablã ne a ra-bɩlmã, la a teedã fãa ne burã b sẽn kõtã. 14Ne fɩtl-doagendgã ne a teedã fãa la fɩtl-dãmbã ne kaamã sẽn na n ning n widgã, 15la wisd yõogr tẽn-kugrã ne a ra-tuiidsã, la nug-tikr kaamã ne wisd sẽn tar yũ-noogã, la sɛk roogã rignoor fu-lillidgã, 16ne maand sẽn yõogd bugum tẽn-kugrã, ne a zũud gãmbrã ne a ra-tuiidsã, la a lagdã fãa, ne a sĩngã ne a tebendgã, 17ne zakã pɛɛlã la a ra-lugdsã ne b naoã, la zakã rignoor fu-lillidgã, 18ne sɛk roogã biili la zakã biili ne b wĩyã, 19la fut nins sẽn welg toor maan-kʋʋdbã tʋʋmd yĩnga: Yaa maan-kʋʋd a Aarõ fut sẽn yaa toor zallã ne a kambã futã b sẽn na n yeelg n maan maan-kʋʋr tʋʋmdã sɛk roogã pʋgã.»

20Israyɛll nebã fãa sẽn dag n tigmã yiime n bas a Moyiisi. 21La neb nins fãa sũur sẽn dag n noom tɩ kõ ne yamleoogã talla b kũun n wa kõ Sẽn-Ka-Saab sɛk roogã manegr yĩnga, la a tʋʋmã teed fãa yĩnga, la maan-kʋʋdbã fut sẽn welg toorã yĩnga. 22Raopã ne pagbã fãa sẽn dag n tar sũ-noog tɩ kõ wã talla kũun n wa: kẽer yaa sogdse, kẽer yaa tʋb-londo, kẽer yaa nug-bĩnsi, kẽer yaa yãndo, yaa sãnem teed buud toor-toor fãa, ne neb nins fãa sẽn dɩk b sãnem n wa kõ Sẽn-Ka-Saabã. 23La neb nins fãa sẽn dag n tar gĩsã waa ne gĩs sẽn yaa kẽeg haoo, la gĩs-moaam ne gĩs-miid la lamd gĩs-bãanega, ne bʋʋs kõbd la pe-raad gãnd sẽn moneme, la dofẽ-rãmb gãndo. 24La neb nins fãa sẽn dat n kõ wanzuri ne zũudã talla bãmb kũunã n wa kõ Sẽn-Ka-Saabo. La neb nins fãa sẽn tar akasiya raad sẽn zems tʋʋmdã yĩngã tallame n wa. 25La pagb nins fãa sẽn mi wĩibã wĩi gĩs sẽn yaa kẽeg haoo ne gĩs-moaama la gĩs-miid ne lamd gĩs-bãaneg n tall n wa. 26La pagb nins fãa sẽn mi tʋʋmde, la sẽn nong tʋʋm-kãngã wĩi gĩs ne bʋʋs kõbdo. 27La nanambsã waa ne onigs kuga, la kug buud a taab b sẽn na n ning gãtsã sẽn be maan-kʋʋr kãsem fuugã la yãoog lutgã zugã pʋsã. 28La bãmb waa ne parfẽ-rãmb sẽn tar yũ-noogo, ne kaam fɩtl-dãmbã yĩnga, la nug-tikr kaamã, ne wisd sẽn tar yũ-noogo. 29Israyɛll raopã, ne pagb nins fãa sẽn dat n kõ bũmb tʋʋmdã yĩng wa Sẽn-Ka-Saab sẽn yeel a Moyiis t'a maanã, talla b kũunã n wa kõ Sẽn-Ka-Saab ne yamleoogo.

A Betsaleyɛll ne a Oholiyaabe

(35.30-35, Yik 31.2-6)

30A Moyiis yeela Israyɛll nebã yaa: «Ade, Sẽn-Ka-Saab yãka a Ʋʋr biig a Uuri biig a Betsaleyɛll sẽn yaa Zʋʋda buudã nedã. 31La bãmb pida yẽnda ne Wẽnnaam Sɩɩgã n kõ yẽnda yam ne yẽesem la bãngr t'a maan tʋʋmã buud fãa. 32Yaa sẽn na n yɩlẽ tɩ yẽnda tõog n bãng n maan tʋʋm buud wʋsg ne sãnem la wanzuri ne zũudu, 33la a pees kug ne litla, n ning gãtsã pʋse, la a pees raad n tʋm tʋʋm-minim tʋʋm buudã fãa. 34B kõo yẽnda ne a Ayisamak biig a Oholiyaab sẽn yaa Dan buudã nedã yam tɩ b zãms neb a taabã me. 35Bãmb kõo bãmb yam tɩ b maan tʋʋmã buud fãa tɩ yɩ neere: Yaa kug peesg tʋʋmde, la sʋnd wʋgbo, la sẽn bokd peend tɩ yɩ gʋlma ne gĩs sẽn yaa kẽeg haoo la gĩs-moaam ne gĩs-miidu la lamd gĩs-bãanega. Yaa tʋʋm buud nins fãa tʋʋm-mit sẽn maandã.»

Currently Selected:

Yikri 35: MPBU

Highlight

Copy

Compare