Yikri 31

Sɛk roogã tʋʋm-mitba

1Sẽn-Ka-Saab goma ne a Moyiis n yeele: 2«Ade, mam meng n bool a Ʋʋr biig a Uuri biig a Betsaleyɛll a yʋʋre. Yẽnda yaa Zʋʋda buudã neda. 3Mam pida yẽnda ne Wẽnnaam Sɩɩgã n kõ yẽnda yam ne minim, la bãngre, tʋʋmã buud toor-toor fãa yĩnga, 4t'a tõe n maan bũmb wʋsg ne sãnem la wanzuri la zũudu, 5la a pees kug ne pɛɛsdga, sẽn na n ning gãtsã pʋse, la a pees raado la a maan tʋʋmd buud fãa. 6Mam yãka a Ayisamak biig a Oholiyaab sẽn yaa Dan buudã t'a sõng yẽnda. La mam kõo bãmb bãngre tɩ b maan bũmb nins fãa mam sẽn yeel foomã. 7Bɩ bãmb maan sɛk roogã ne kaset koglgã la a limdã sẽn boond tɩ bas-taal zĩigã, ne fu-roogã teed fãa, 8la taablã ne a teedã, la fɩtl doagendgã sẽn yaa sãnem halaalã ne a teedã fãa, la tẽn-kugr ning b sẽn na n yõogd wisd a zugã, 9la tẽn-kugr ning b sẽn na n yõogd maand bugum a zugã ne a teedã fãa, la sĩngã ne a tebendsã, 10la maan-kʋʋd a Aarõ futã sẽn welg toorã, ne a kambã futã, tʋʋmdã yĩngã, 11la nug-tikr kaam la wisd sẽn tar yũ-noog sɛk roogã yĩnga. Bãmb na n maan-a lame t'a yɩ wa mam sẽn yeel foomã kɛpɩ.»

Vʋʋsg daarã sakre

12Sẽn-Ka-Saab yeela a Moyiis yaa: 13«Yeel Israyɛll nebã tɩ b tog n tũu mam vʋʋsg rayã. Yõwã na n yɩɩ bãnd maam ne yãmb sʋk zamaan nins sẽn watã pʋgẽ, tɩ yãmb tõe n bãng tɩ mam yaa Sẽn-Ka-Saabo, sẽn welg-a yãmb tɩ y yɩ toorã. 14Bɩ y sak vʋʋsg raarã, bala, mam welga yẽnda toor yãmb yĩnga. Ned sã n sãam vʋʋsg raarã, bɩ b kʋ a soaba. Ned ning fãa sẽn tʋm vʋʋsg raarã, bɩ y yiis a soab a buudã sʋka. 15#Yik 20.8-11, 23.12, 34.21, 35.2, Mk 23.3, Tõ 5.12-14Yãmb na n tʋma rasem a yoobe, la rasem a yopoe raarã na n yɩɩ vʋʋsgo. A na n yɩɩ vʋʋsg daar sẽn welg toor Sẽn-Ka-Saab waoogr yĩnga. Ned sã n tʋm vʋʋsg raare, bɩ b kʋ-a. 16Bɩ Israyɛll nebã sak mam vʋʋsg daarã, n maan wa sẽn zemse, tɩ yɩ kaool sẽn kõn sɛ bãmb yagensã zamaan woo zamaane. 17#Yik 20.11Vʋʋsg raarã na n yɩɩ bãnd maam ne Israyɛll nebã sʋk wakat sẽn ka sɛt yĩnga. Bala, Sẽn-Ka-Saab naana yĩngr la tẽngã rasem a yoob pʋgẽ, la rasem a yopoe wã daare, bãmb basa b tʋʋmã n vʋʋse.» 18Bãmb sẽn gom ne a Moyiis Sinayi tãngã zug n sɛ, b kõo yẽnda kaset kug-walse, bãmb kõ-a-la kaset kug-wals a yiibu, Wẽnnaam mengã sẽn gʋls ne b nug-bila.

Currently Selected:

Yikri 31: MPBU

Highlight

Copy

Compare