Levi 9

Alono leni o bijaba n cili ki padi yaa pada

1Dananii n den pendi, Musa den yini Alono leni o bijaba, ki go yini Isidayeli yaaba nikpela. 2O den yedi Alono: «Ŋan baa naatonbili i candanbaani padili po, ki go baa petonli li padijuukaali po, bikuli n yaa ŋani cain ki da pia poadi. A baa cuani ba o Diedo nintuali. 3Ŋan go yedi Isidayeli yaaba n baa li ŋuabuali i candanbaani padili po, ki go baa li padijuukaali mo yaa po, naabiga leni pebiga, ban pundi binyenli yenli. Ban yaa tie yaaba n ki pia poadi. 4Ban go baa mi taanyenma padili naatonli, li petonli, yaa padili n tie jiema ki kali leni mi kpama, ki padi ba o Diedo nintuali, kelima dinla o Diedo baa doagidi o yuli yi po.»

5Bi den taa Musa n den waani ba yaala yeni kuli, ki cuani u Kadikaanu Gbandieli buliñoabu kani. Li nitaanli kuli den cua ki sedi o Diedo nintuali. 6Musa den yedi: «Tieni mani o Diedo n puogi yi yaala, lani, wani o Diedo kpiagidi baa doagidi yi po.» 7O den yedi Alono: «Nagini li padibinbinli kani, ki padi a candanbaani padili leni a padijuukaali. Tieni yeni ki mia sugili fini a ba po leni bi niba kuli po. Lani, ŋan padi bi niba po, ki mia bi po sugili nani o Diedo n bili maama.» #Heb 7.27.

8Lanwani, Alono den nagini li padibinbinli kani, ki kodi o tuonbiadi sugili miabu naatonbili yeni. 9O bijaba den gaa mi soama ki teni o, o den tuuni o nubili mi soama nni, ki duuni ma li padibinbinli yina po, ki wuli yaama n sieni li padibinbinli tiipo. 10O den juu ti tuonbiadi sugili miabu padiyanga yeni kpama, ki cayaana leni ki pualanma li padibinbinli po, nani o Diedo n den puogi Musa maama. 11Ama o den taa ki ñani ti nandi leni ku gbangu hali li nagili niini po, ki juu ki buoni likuli. 12Li yaa puoli, o den kodi li padijuukaali padiyanga, o bijaba den gaa mi soama ki teni o, ke o wuli ma li padibinbinli kaani kuli. 13Bi go den teni o ki padiyanga yeni ke ki jia jia bonjena jena leni li yuli, ke o juu li padibinbinli po. 14O den ŋuudi a biana leni ti nuadi, ki maani li padijuukaali po, ki juu likuli li padibinbinli po. 15Li yaa puoli, o den padi bi niba po bi yaa padili. O den taa ti candandi yaa ŋuabuali ki kodi li, ki padi ki mia bi po sugili bi tuonbiadi po, nani wan bi kodi ki padiyankpiaga maama. 16O den padi bi niba po li padijuukaali yanliediti yeni, ki ŋoadi lan bili maama. 17O go den padi yaa padili n tie jiema. O den yidi mi yoma nukuli ki juu ma li padibinbinli po, ke laa taa leni tiŋaagu kuli yaa padijuukaali. 18Lani, o den kodi li naatonli leni li petonli ke li tua bi niba po taanyenma padili. Wani Alono bijaba den gaa mi soama ki teni o ke o wuli ma li padibinbinli kaani kuli. #Lev 3.1-11. 19Bi den teni o li naatonli yeni kpama, li petonli yeni juoli, yaa kpakaagu n ŋuagi ti nuadi, a cayaana leni mi pualanma. 20Bi den maani mi kpama yeni a benguna po. Alono den juu mi kpama yeni li padibinbinli po. 21Lani, Alono den yua ti padiyandi yeni benguna leni li jienpanli ki tieni yaa bogidili n doagidi ke o teni la o Diedo.

22Alono n den padi ti candandi pada, a padijuukaana leni mi taanyenma pada yeni ki gbeni, o den yugidi o nii ki gaali bi niba. Li yaa puoli, o den jiidi ki ñani li padibinbinli kani. #Coa 6.22-26. 23Musa leni Alono den kua u Kadikaanu Gbandieli nni. Ban den guani ki ñani, bi den gaali bi niba. O Diedo kpiagidi den doagidi Isidayeli yaaba kuli po. 24U mu den ñani o Diedo nintuali ki juu a padijuukaana leni yaa pada n sieni kpama kuli, li padibinbinli po. Bi niba kuli n den laa lani, bi den kpaani leni li pamanli, ki baa ki labini.

Currently Selected:

Levi 9: BGP

Highlight

Copy

Compare