Levi 10
10
O Diedo mu juu ki kpa Alono bijaba
1 Alono bijaba, Nadabi leni Abihu den taa ti fantantiadi, yuakuli yengu yengu, ki padi u mu ki maani lipo tulale. Bi den kuani u mulamu u Kadikaanu Gbandieli nni o Diedo nintuali, o Diedo n den kuani ba yaala. 2Lanyogunu, u mu den ñani o Diedo nintuali ki juu ki buoni ba. Bi den kpe lankani o Diedo nintuali. 3Musa den yedi Alono: «U Tienu o Diedo den tuodi ki waani yi lane wan den yedi: ‹N bua ke yaa niba n nagidi nni n yaa fangi n gagidiŋanma, ki kpiagi nni bi niba kuli nintuali.› » Alono den ŋmini suo.
4Lani, Musa den yini Mikayeli leni Elisafani, Alono baa naataanu Usieli bijaba, ki yedi ba: «Nagini mani ki taa yi kpiiba yeni ki ñani ba li nagili nni, ki foagidi ba leni u kaangagidiŋamu.» 5Bi den nagini ki taa a tinkpila yeni leni bi liada ki ñani ba li nagili nni, nani Musa n den yedi ba maama. 6Musa den yedi Alono leni o bijaba Eleasari leni Itamari: «Yin da ŋaa yi yudi ki kan ŋanbi ti,#10.6 Laa vedise bua ki yedi ke Alono leni o bila n da tieni yaala n baa doagidi ke bi ye leni mi kuuma paboanli. Li yaa tie Gulimanceba yo, bi bi baa yedi: “Yin da kuo.” yin da padi yi tiadi ki doagidi ke yi ye leni mi kuuma paboanli. Yeni yaa ka, yi baa kpe, ki go fiini o Diedo pali li nitaanli kuli po. Cedi mani yi kpiiba, Isidayeli yaaba kule n mua i kumoe o Diedo n teni ke u mu kpa yaaba yeni po. 7Yin da fuadi mani u Kadikaanu Gbandieli buliñoabu kani, yeni yaa ka yi baa kpe. Yi bani ke ban wuli yi po yaa kpama yeni gagidi yi o Diedo po.» Bi den tieni Musa n waani ba yaala.
Li dañoli yaa bali maama
8O Diedo den maadi leni Alono ki yedi o: 9«Yi yaa baa kua u Kadikaanu Gbandieli nni, fini leni a bijaba n da ño duven bi dabiadimiba kuli. Yeni, yi kan kpe. Laa bali maama baa yaa ye hali yaa yogunu kuli, yinba leni yi puoliŋuani po. 10Yeni, yi baa fidi ki gagidi yaala n gagidi leni yaala n ki gagidi, ki gagidi yaala n joagini leni yaala n ŋani cain, 11ki bangi Isidayeli yaaba o Diedo n den puogi Musa ke o bili yi po yaa bali maama kuli.»
Ti padinandi bali maama
12Musa go den maadi leni Alono leni o bijaliediba yaaba n sieni, Eleasari leni Itamari ki yedi ba: «Yin taa mani ban ñani yaala a padijuukaana padijiedi nni, ke dabinli ki ye lienni, ki je li padibinbinli kani, kelima mi tie yaa bonla n gagidi ki ŋani cain. #Lev 6.7-11. 13Yi baa je ma yaa kaanu n gagidi. Li tie fini leni a bijaba yaa biinu, ban baa padi ki juu yaa pada o Diedo nintuali kuli siiga. Lani n tie o Diedo n den waani nni maama. 14Li bengunli leni li panli kuli, ban tieni li bogidili, ki waani ke bi teni yaa nandi o Diedo, fini, a bijaba leni a bisiaba n die, yi baa ŋmani ti yaa kaanu n gagidi. Isidayeli yaaba n puuni yaa taanyenma pada kuli siiga, li tie fini leni a bijaba biinu. #Lev 7.30-34. 15Isidayeli yaaba baa cuani ban baa juu ki buoni yaa kpama. Bi baa cuani ma leni li panli leni li bengunli, o kopadiciamo n baa taa yaala ki tieni yaa bogidili n doagidi ke o teni la U Tienu. O yaa tieni lani ki gbeni, laa nandi baa yaa tie fini leni a bijaba yaa biinu. Li tie yaa bali maama n baa yaa ye hali yaa yogunu kuli, ki yaa caa hali yi puoliŋuani, nani o Diedo n den bili maama.»
16Musa den lingi i candanbaani padiŋuabuali yeni nandi, ki sua ke bi juu ki buoni ti cain. O pali den beni Alono bijaba Eleasari leni Itamari po. 17O den yedi ba: «Be yaa po ke yii ŋmani i candanbaani padiyanga yeni nandi yaa kaanu n gagidi nni? Li tie yaa bonla n gagidi ki ŋani cain. O Diedo den puni yi laa bonla ke yin ñani li nitaanli tagili, ki go mia bi po sugili o Diedo nintuali. #Lev 6.17-19. 18Diidi, yii kuani ki padiyanga yeni soama u kaangagidiŋamu tugu nni. Lanwani, yi bi baa ŋmani ti nandi yeni u kaangagidiŋamu nni, nani min den puogi yi maama.» 19Alono den guani ki yedi Musa: «Diidi, dinla bi bi padi bi candandi padili leni bi padijuukaali o Diedo nintuali. Ama yaa bonla n bi tieni nni dinla ne, n yaa bi ŋmani i candanbaani padinandi yeni, naani li bi baa mangi o Diedo?» 20Musa den gbadi mi maama yeni, ki sua ke mi tiegi.
Currently Selected:
Levi 10: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
