Jaki 4
4
Ŋanduna ŋantaado
1Yin pia yaa koana leni yaa janjanma kuli yi siiga yeni, likuli ŋua be? Laa ŋua yi gbanandi bonbuakaala, yaala n tiendi bu toabu yi gbanandi nni ka yo? 2Yi pia yin bua yaala boncianla, ama yi naa fidi ki baa la. Lani yaa po yo ke yi tie nikpaba leni nunponli danba, kelima yi naa fidi ki baa yin bua yaala. Lani n teni ke yi pia a koana leni mi janjanma yi siiga. Yii baadi yin bua yaala, kelima yii miadi U Tienu. 3Yi miadi o mo ki naa baadi, kelima yi mia ki tudi, ki bua ki yaa biandi la yi gbanandi bonbuakaala po.
4Yinba mi conconma danba#4.4 Li bua ki yedi yaaba n ŋaa U Tienu nani yaa pua n baa ŋaa o calo ki ban conbi yeni. yeni, yii bani ke ŋanduna buama tie yibalindi U Tienu po ka? Lanwani, yua n danli leni ŋanduna kuli, tua U Tienu yibali. 5Naani yi tama ke i Diani maadi fanma fanma yo? I yedi ke U Tienu bua wan kuani yaa Fuoma ti niinni, hali ki pia li nunponli mi po.#4.5 Li go baa fidi ki soagini ki yedi: U Tienu n kuani yaa Fuoma ti niinni bua ti leni li nunponli. 6U Tienu n tieni ti po yaa ŋanbili yabi ki cie, kelima i Diani yedi:
«U Tienu yie bi japaadanba,
Ama o puuni bi yumiindanba o ŋanbili.» #Kpa 3.34.
7Lanwani, yin yaa miindi yi yula U Tienu kani. Yin yaa yiedi ku tuotabigu yudaano po, lani o baa sani ki foagidi yi kani. 8Yin nagini U Tienu kani, omo baa nagini yi kani. Yinba ti tuonbiadi danba, nidi mani yi nii. Ŋanbi mani yi pala, yinba yamilie danba. 9Yin bandi yi yebiadima, ki yaa ye leni li paboanli, ki yaa mua. Yin teni yi laadi n lebidi ki tua bubula, ki go teni yi pamanli n lebidi ki tua pabiidili. 10Yin miini yi yula o Diedo kani, lani, o baa yaa jigini yi.
Oba n da jaligi o kpiilo
11N kpiiba, yin da maadi yiyaba po yaala n bia. Yua n maadi yaala n bia o kpiilo po, bi ki jia o buudi, o maadi yaala n bia li bali maama po, ki go ja mi buudi. Ama a yaa jia li bali maama buudi, ŋaa go tie li bali maama kubido ka, ama mi bujialo. 12Yendo bebe n ye ki tie li bali maama makadikaama daano leni li bujialo, wani yua n baa fidi ki faabi ki go bolini. Amo tie ŋme, fini yua n jia a lielo buudi?
Yin da pia japaadi
13Moala, cengi mani n maama, yinba yaaba n tua: «Dinla, yaa ka saala, ti baa fii ki gedi u naa dogu, yaa ka une, ki ban bindi lipo, ki yaa tiendi u kpendu ki baadi ti ñuadi.» #Kpa 27.1. 14Yinba, yii bani ba yi miana yema n baa tua maama saala. Yi tie nani ku gbangbadigu yeni, yaagu n ye u yogunu waamu po, ama ki baa yuandi ki bodi. 15Yi bi baa yaa tua: «O Diedo yaa bua, ti baa yaa ye ki fo, ki tiendi line bi line.» 16Ama moala yi maadi mi japaamaama, ki kpiagidi yi yula. Yi yaa kpiagidi yi yula yeni, li tie yaa bonla n bia. 17Lanwani, yua n bani ki tieni yaala n ŋani, ki naa tieni la, li tie o po tuonbiadi.
Currently Selected:
Jaki 4: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
