Jaki 2
2
Yin da tiendi mi gagidima bi niba siiga
1N kpiiba, yinba yaaba n daani ti Diedo Jesu Kilisiti yua n pia ti kpiagidi yeni, laa ŋani yin yaa tiendi mi gagidima bi niba siiga. 2Min bagi yaala tie line: O nilo yaa kua yi taanli nni ki pili wula ñoagibili, ki go yie yaa tiadi n pia ti kpiagidi, ke o luodo mo kua ki yie a kpacala, 3yi yaa jigini yua n yie yaa tiadi n kpiagi yeni ki yedi o: «Kali ne ti jigidi kaanu.» Yi yaa yedi o luodo mo: «Yaa se ne,» bi yaa ka: «Kali tiipo n taana kani.» 4Naani yii tieni mi gagidima yi yama nni, ki go biigidi leni li yantiabiadili ka?
5N kpibuadiba, cengi mani! Naani U Tienu ki gandi yaaba n tie luoda ŋanduna nuni po, ke ban tua a piada li dandanli nni, ki go baa wan niani ke o baa pa yaaba n bua o kuli yaa diema ka? 6Ama yinba, yi fali o luodo. Naani a piada ka mabindi yi, ki caani yi li bujiali kani? 7Bani ka sugidi yaa yeŋanli n ye yi niinni?#2.7 Li yeŋanli yeni tie o Diedo Jesu yaa yeli. JTT 19.5.
8Yi yaa kubi U Tienu diema bali maama, nani lan diani maama li ŋani. Mi yedi: «Ŋan bua a lielo nani ŋan bua a yuli maama.» #Lev 19.18. 9Ama yi yaa tiendi mi gagidima bi niba siiga, yi tiendi ti tuonbiadi, li bali maama mo buni ki cuo yi kelima yi miidi ma. 10Yua n kubi li bali maama ki nan miidi ba mayenma bebe, pia i tagili mikuli po. 11Yua n yedi: «Ŋan da conbi,» wani n go yedi: «Ŋan da kpa nilo» moko. Lanwani, a yàá conbi ki nan kpa nilo, a tua li bali maama miidika. #Ñam 20.13,14; Tia 5.17,18.
12Yin yaa mani ki go tiendi, ki bani ke U Tienu baa jia yi buudi, ki ŋoadi yaa bali maama n puuni mi faabima. 13U Tienu yaa jia ti buudi yaa yogunu, o kan gbadi mi ninñima yua n kaa den gbadi o lieba po mi ninñima. Mi ninñingbadima paani ti buudi.
Li dandanli tuona
2.14—5.20
Li dandanli leni a tuona
14N kpiiba, o nilo yaa yedi ke o pia li dandanli ki naa pia li tuona, li pia be yaa fuome? Naani o dandanli yeni baa fidi ki faabi o? 15Yi kpiiba, joa bi pua yaa luo ti tiayiekaadi ki go luo daali kuli bonjekaala, 16ke yi siiga yendo yedi o: «Yaa kuni leni mi yanduanma, ki ban yeli u mu ki go je ki guo,» ama ki naa puni o yaala n tie o yema po tiladi, li pia be yaa fuome? 17Li tie yeni leni li dandanli: li yàá pia a tuona, li kpe.
18Ama niloba yaa yedi: «Fini a pia li dandanli, nmo pia a tuona.» N baa yedi o: «Waani nni a dandanli yaali n ki pia tuona, nmo n baa waani a n dandanli kelima n tuona po.» 19A daani ke U Tienu ye ki tie yendo bebe, a tieni ke li ŋani. Ama mu cicibiadimu moko daani yeni, ki jie ki digibi.
20Fini o yanluodaano na, naani a bua ki bandi ke yaa dandanli n ki pia a tuona tie fanma? 21Naani ti yaaja Abalahama tuonŋama po ka teni ke bi yini o niteginka? Naani wan den padi o bijua Isaaka li padibinbinli po yeni ka teni ke o tiegi? #Cil 22.1-14. 22A laa ke o dandanli den taani ki yegi leni o tuona, ke o tuona yeni mo den teni ke o dandanli ŋani ki dagidi cain. 23Yeni i Diani n yedi yaala tieni: «Abalahama den daani U Tienu, ke U Tienu coadi o po la ke li tie teginma.» Bi den yi o U Tienu danli. #Cil 15.6; 2Baj 20.7; Esa 41.8. 24Yi laa, o nilo tiegi kelima o tuona po, laa tie kelima o dandanli bebe po ka. 25Li go tie yeni Rahabi li puoconconli po. O tuona po o tie niteginka, kelima o den gaa bi tondiba cangu, ki teni ke bi tagi santo ki kuni. #Jos 2.1-21. 26Lanwani, nani yaa gbanandi n ki pia naano n kpe maama, yaa dandanli n ki pia tuona moko kpe yene.
Currently Selected:
Jaki 2: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
