Jaki 1
1
Li dandanli leni mi yanfuoma
1.1—2.13
I fuondi
1Mini Jaki, U Tienu leni o Diedo Jesu Kilisiti naacemo, n diani yinba i piiga n buoliedi, yii n yadi yadi ki ye ŋanduna nni kuli po. N fuondi yi bonŋanla. #Mat 13.55; Mrk 6.3; JTT 15.13; Gal 1.19.
Li dandanli n puuni yaa yanfuoma
2N kpiiba, yin yaa nua ke yaa biigima buoli kuli n cua yi kani tie pamanli bonla, 3kelima yi bani ke yi dandanli biigima baa cuani li juunli. 4Ama li tie tiladi ke li juunli n yaa tuuni li tuonli ki dudi cain, ke yin tua yaaba n ŋani ki dagidi cain, ki da luo liba kuli.
5Yi siiga niloba yaa luo mi yanfuoma, wan mia U Tienu yua n puuni bi niba kuli leni ti bulicindi, kaa fu leni ba, o baa pa o ma. 6Ama wan mia leni li dandanli, ki da maliti o yaa baa baa bi o yaa kan baa. Yua n maliti ke daalinba o kan baa, tie nani mi ñincianma ñinguona, u faalu n lengidi ki pengi ya yeni. 7Yaa nilo n tie yeni kuli, n da tama ke o baa baa liba kuli o Diedo kani. 8O tie yamilie daano, kaa se kaanyendu o bontienkaala nni kuli.
Mi luoma leni mi piama
9Ti kpiiba siiga yua n tie luodo, n yaa mangidi o pali boncianla leni U Tienu n jigini o maama. 10Yua n tie piado mo, n yaa mangidi o pali leni U Tienu n jiini o maama, kelima o baa pendi nani ti muadi puuma yeni. #Esa 40.6-7. 11U yienu pudi ke u wulitonma teni ke ti muadi kuodi, ke ti puuma mo suodi, tin pia yaa jawaama mo bodi. O piado moko baa mali ki suodi yene, o bontienkaala nni.
Mi biigima leni mi tulinma
12Li pamanli ye leni yua n fidi ki juuni mi biigima#1.12 mi biigima, kaanto yogunuba li yedi mi tulinma. nni. Bi yaa biigi o ki pagi o yaa yogunu, o baa baa li miali badifogiliga, o Diedo n niani ke o baa pa yaaba n bua o kuli yaaga. 13Ban tulini o nilo yaa yogunu, wan da yedi: «U Tienu n tulini nni.» Bi kan tulini U Tienu wan tieni yaala n bia, wani o ba mo kan tulini niloba kuli. 14Bi tulini nilo kuli wani o ba bonbuaka-biadila n dia ki cuo o yaa yogunu. 15Lanwani, o bonbuaka-biadila yaa punbi, li baa maa ti tuonbiadi. Ti tuonbiadi mo yaa kpedi ki dagidi, tini mo baa maa mi kuuma.
16N kpibuadiba, yin da boandi yi yula yaa maama n tie ne po: 17Li semoanli leni yaa paabu n ŋani kuli ñani tanpoli po, mi yenma Baa kani, wani yua n ki lebidi, ke lebidima jinjingu mo ki ye o niinni. 18O yanbuama po, o den mali ti, kelima i moamoani maama po, ke tin yaa tie o tagima kuli siiga li bonkpiala.
Ki tieni U Tienu maama n yedi yaala
19N kpibuadiba, yin bandi line: Li pundi nilo kuli n cengi tontoni, ki da maadi tonma, ki da bieni o pali tontoni mo. 20O nisaalo pabienli kan cuani U Tienu teginma. 21Lanwani, yin lu yaala n tie ti joagindi leni mi biadima kuli, ki yaa gaani U Tienu n buli yaa maama yi pala nni leni li yumiinli, kelima mi baa fidi ki faabi yi naani.
22Yin da cengi U Tienu maama bebe, ki boandi yi yula ke mi cengima yeni dagidi, kali yin yaa tiendi man yedi yaala mo. 23Yua n cengi U Tienu maama ki naa tieni man yedi yaala, tie nani yua n nua o nunga n tie maama ki madiidiga#1.23 ki madiidiga, yaa ka ki maduubiga bi ki nualinbaaga. nni, 24ki ñani ki gedi, ki sundi tontoni wan tie maama. 25Ama yua n nuali bonŋanla yaa bali maama n ŋani cain, ki faabidi bi niba yaa niinni, ki suagi ki tiendi yeni kaa sundi wan cengi yaala, ki tiendi man yedi yaala, laa nilo baa baa li seli wan tiendi yaala kuli nni.
26O nilo yaa tama ke o jaani, ki naa kubi o lanbu, o boandi o yuli. Laa nilo jaanma tie fanma fanma. 27Yaa jaanma n ŋani cain ki naa pia joagindi ti Baa U Tienu nintuali, tie ki yaa todi a kpienbila leni a kpepuona bi fala nni, ki go kubi o yuli leni ŋanduna joagindi.
Currently Selected:
Jaki 1: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
