Hebilunba 8
8
Jesu n tie ti kopadicianba bado
1Yaala n tugi li yuli tin maadi yaa maama kuli siiga n tie ne: ti pia yaa kopadicianba bado n kaa tanpoli, U Tienu yua n pia ti kpiagidi jienu po. #Ps 110.1. 2Lankane ke o tuuni u kaangagidiŋamu nni, lani n tie o Diedo wani o ba n tii yaa gbandiemoanli, ke nisaalo ka tii li.
3Bi yen dini bi kopadicianba bado kuli, ke wan yaa kpendinni U Tienu kani bu paabu leni a pada. Lanwani, li tie tiladi ke ti yaa kopadicianba bado yeni moko, n yaa pia wan baa pa U Tienu yaala. 4O yaa bi ye ŋanduna nni o kan bi yaa tie ba kopadiciamo moko, kelima yaa kopadicianba n kpendinni bu paabu nani li bali maama n bili maama da ye. 5Ban tuuni i jaandi taanma tuonli yaali yeni, tie tanpoli bonmoanla nannanli leni li jinjingu. U Tienu den tuodi ki waani Musa lane, wan den baa sieni li gbandieli yaa yogunu, ki yedi o: «Ŋan fangi a yuli ki tieni likuli, lan yaa tie nani min waani a yaa nannanli li juali po yeni.» #Ñam 25.40. 6Ama moala Kilisiti pia yaa tuonli n ŋani ki cie yeni, kelima o tie yaa ŋantaado n ŋani ki cie yaa candanbaalo. Laa ŋantaado se yaa ñoaniani n ŋani ki cie po.
7O ŋantaadikpialo yaa den ŋani cain kaa pia poadi, li kan den yaa tie tiladi ki lingi ku bonyuangu. 8Ama li tie nani o Diedo jaligi o niba ki yedi:
«Diidi, u yogunu kpendi,
Ke n baa kuani yaa ŋantaado n paani
Leni Isidayeli leni Juda buoli yaaba.
O Diedo n yedi yeni. #Jer 31.31-34.
9Ku kan yaa tie nani min den kuani
Yaa ŋantaado leni bi yaajanba,
Min den cuo bi nii ki dadi
Ki ñani ba Ejipiti diema nni yaa daali.
Baa den tuo ki kubi n ŋantaado.
Lanwani, mini mo ki go den yagini n yama bi po.
O Diedo n yedi yeni.»
10O Diedo go yedi:
«Laa dana yaa pendi,
Diidi min baa kuani leni
Isidayeli buolu yaa ŋantaado:
N baa kuani n bali maama bi yantiana nni
Ki diani ma bi pala nni.
N baa yaa tie bi Tienu,
Bani mo baa yaa tie n niba.
11Bi siiga oba kuli
Kan go bangi o yieninlielo,
Yaa ka o kpiilo ki yedi o:
Bandi o Diedo.
Ki cili yaa biga n wa ki cie,
Ki yaa caa hali yua n kpeli ki cie,
Bikuli baa bandi nni.
12N baa tieni bi po sugili
Bi tudima kuli po,
Ki kan go tiadi bi tuonbiadi po.»
13Wan yedi o ŋantaadipaano yeni, o teni ke o ŋantaadikpialo kpeligi. Yaala n kpeligi ki podi mo bua ki pendi.
Currently Selected:
Hebilunba 8: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
