Hebilunba 11
11
Jesu Kilisiti n faabi ti leni mi kuuma
11.1—13.19
Li dandanli
1Li dandanli tie o nilo n bani cain ke o sugini ki baa yaala, ki go tie wan kaa nua yaala yaa doagidima. 2Li tie li dandanli yaa po ke U Tienu den tieni bi nikpiaba po o siediŋamo.
3Li tie li dandanli yaa po ke ti bani ke U Tienu den tagi ŋanduna leni o maama. Lanwani, tin nua yaala ñani tin ki nua yaala nne. #Cil 1.1; Ps 33.6,9; Jan 1.3.
4Li tie li dandanli yaa po ke Abeli den padi U Tienu po yaa padili n ŋani ki cie Kayini yaali. Li tie li dandanli yaa po ke U Tienu den yedi ke o tiegi, ki den gaa wan padi o po yaa padili. Laa dandanli yaa po yo ke o baa ki maadi, ba ke o kpe. #Cil 4.3-10.
5Li tie li dandanli yaa po ke U Tienu den taa Enoki ŋanduna nni, ke waa bandi mi kuuma. Baa go den laa o, kelima U Tienu den taa o. Hali ke o daa den taa o, i Diani den tieni o po siedi ke o mangidi U Tienu pali. #Cil 5.21-24. 6Oba kuli kan fidi ki mangi U Tienu pali, kali li dandanli yaa po. Li tie tiladi ke yua n pundi U Tienu kani kuli n daani ke o ye, ki baa pa yaaba n lingi o kuli i panpaani.
7Li tie li dandanli yaa po ke Nowe den cengi U Tienu n den tuodi ki waani o ke yaala n baa tieni, ba ke bi daa den nua la. Li fangili yaa jeje den cuo o U Tienu po, ke o kpie ku ñinbiaciangu, ki baa gaa o deni yaaba miana. Wan den tieni yeni, o den buni ki cuo ŋanduna, ki den baa li moamoansaali, yaali n baadi kelima li dandanli yaa po. #Cil 6.13-22.
8Li tie li dandanli yaa po ke Abalahama den tuo ki tieni U Tienu n yedi o yaala, wan den yini o yaa yogunu, ki fii ki gedi wan baa baa ki diedi yaa diema nni. O den fii ki caa kaa bani wan caa naankani. #Cil 12.1-5. 9Li tie li dandanli yaa po ke o den kua ki kali nani o nilamo yeni, U Tienu n den niani o yaa diema nni. O den ye a gbandiena nni leni Isaaka leni Jakob, bani yaaba n den taani leni o ki baa U Tienu ñoanianu yeni. #Cil 35.27. 10Abalahama den tieni yeni, kelima o den guu ke o baa le yaa dogu n pia a tanpuupaala, U Tienu n tie yuu yaa dianka leni u maalo.
11Li tie li dandanli yaa po ke U Tienu den puni Sala#11.11 Mi soagintianma yedi Abalahama. u fidu ke o baa u buolu. Ba ke o den podi, wani yua n den tie ŋoaliga, kelima o den nua ke yua n niani u ñoanianu yeni tie dugika. #Cil 18.11-14; 21.2. 12Li tie lani yaa po ke jayendo kani, wani yua n den podi hali ki nagini mi kuuma, i puoliŋuani den ñani boncianla, yaaba yaa coali n tie nani a ŋmabila kaa pia coadima, nani mi ñincianma jaali tanbiima yeni. #Cil 15.5; 22.17; 32.12.
13Laa niba kuli den kpe ki kubi li dandanli. Bi daa den baa U Tienu n den niani ba yaala. Ama bi den tuodi ki laa la hali foagima, ki mangi bi pala li po. Bi den tuo yeni ke bi tie canba, ki ye ŋanduna nni u yogunu waamu po. #Cil 23.4; 1Baj 29.15; Ps 39.13. 14Yaaba n maadi yeni doagidi cain ke bi lingi bi doceli. 15Bi yama yaa den baali ban den ñani yaa dogu nni, bi den baa fidi ki guani lipo. 16Die moamoani bi den kuani bi yama ki bua ki pundi yaa dogu n ŋani ki cie, wuni tanpoli yuu yeni. Lani yaa po, laa pia U Tienu po fe ban yini o bi Tienu, kelima o ŋanbi bi po u dogu.
17Li tie li dandanli yaa po ke Abalahama den padi Isaaka, U Tienu n den biigi o yaa yogunu. Wani yua n den baa u ñoanianu, den tuo ki baa padi o bonjayenyenga, #Cil 22.1-14. 18ba ke U Tienu den yedi o: «A baa baa i puoliŋuani Isaaka yaa kane.» #Cil 21.12. 19O den kpaagi ki nua ke U Tienu pia u paalu, ki baa fiini ba bi tinkpiba. Li tie lani yaa po ke U Tienu go den guani o o bijua. Laa bonla tie nannanli buolu yo.
20Li tie li dandanli yaa po ke Isaaka den gaali Jakob leni Esayu, yaa yema n ye liiga po. #Cil 27.27-29,39-40.
21Li tie li dandanli yaa po ke Jakob n den baa kpe yaa yogunu, o den gaali Josefi bila, biga kuli, ki ñii o gbiamu yuli po, ki kpiagi U Tienu. #Cil 47.31—48.20.
22Li tie li dandanli yaa po ke Josefi n den bua ki pundi o miali bianu, o den maadi Isidayeli buolu ñama Ejipiti nni maama, ki go bili li ñoamabonli, ban baa ti tieni o tinkpikpaba maama. #Cil 50.24-25; Ñam 13.19.
23Li tie li dandanli yaa po ke ban den mali Musa yogunu, o danba den wuoni o hali ŋmaalitaa, kelima bi den laa ke o tie yaa biga n ŋani. Baa den jie o bado ñoamabonli. #Ñam 2.2; 1.22.
24Li tie li dandanli yaa po ke Musa n den fandi, o den yie ke ban da yini o Faraon bisalo bijua. #Ñam 2.10-12. 25O den sua ke bi yaa taani ki faligi o leni U Tienu niba, li cie wan mangi o pali leni ti tuonbiadi yemanma, yaala n tie bonpendikaala. 26O den kpaagi ki nua ke U Tienu n Gandi Yua fe tie o po bonmoanla ki cie Ejipiti ŋalimano kuli, kelima o den nua liiga po, wan baa baa yaa panpaani.
27Li tie li dandanli yaa po ke o den fii ki ñani Ejipiti nni, kaa jie o bado pabienli. O den juuni ki se ke li pa, kelima o nua oba kuli n ki nua yua. #Ñam 2.15. 28Li tie li dandanli yaa po ke o den teni ke Isidayeli yaaba cili mi Pendima jaanma, ki go mii mi soama a buliñoana po, ke mi kuuma maleki n da sii Isidayeli yaaba bonjakpiala. #Ñam 12.21-30.
29Li tie li dandanli yaa po ke Isidayeli yaaba den duodi mi Ñincianmoanma, nani ki tinkuonga yeni. Ama Ejipiti yaaba n den moandi ki baa tieni yeni, mi den milini ba. #Ñam 14.21-31.
30Li tie li dandanli yaa po ke Isidayeli yaaba den cuoni ki lindi Jeriko dogu bilinciami, hali danalele, ke i bilinciami yeni baa. #Jos 6.12-21. 31Li tie li dandanli yaa po ke li puoconconli Rahabi ki den taani ki bodi leni U Tienu yiekaaba, kelima o den gaa Isidayeli yaaba dodiidiba cangu, ki todi ba. #Jos 2.1-21; 6.22-25.
32N go baa yedi be ki pugini? Mii pia yaa yogunu n baa dagidi min togidi Gedeon, Baraki, Samison, Jefite, Davidi, Samueli leni bi saawalipuaba kuli yaa maama. #Buj 4.6-16; 11—12; 1Sam 16.10; 17.23-51. 33Bi dandanli po den teni ke bi paadi mi diema boncianla, ki tiendi yaala n tiegi, ki go baadi U Tienu n den niani ba yaala. Bi den luoni i yangbanli ñoana, #Dan 6.1-27. 34ki go gbindi yaa mu n co jama, ki sani ki faabi bi yula mu jugisiemu ñoana nni, ki paadi i yiani, ki tua jakoanda bu toabu nni, ki deli bi nilanba toagola. #Dan 3.1-30. 35Li dandanli po den teni ke bi puotianba, baa ke bi kpiiba yaaba n kpe guani ki fii bi tinkpiba siiga. Bi den waani bi nitianba mo fala ke baa tuo ki gaa mi faabima, kelima bi den bua ki baa yaa tinkpifiima n ŋani ki cie. #1Bad 17.17-24; 2Bad 4.25-37. 36Bi den ñuadi bine, ki pua ba i baliji, ki go kpaa bi tianba ti kpaadi, ki kuani ba li kpaadidieli nni. #1Bad 22.26-27; 2Baj 18.25-26; Jer 20.2; 37.15; 38.6. 37Bi den lugidi bine a tana, ki waani bi tianba falaciamo, ki go jia bi tianba leni ti sasaadi ki jendi ba. Bi go den kpa bi nitianba leni mu jugisiemu. Bi nitianba mo den tie luoda, ki goadi ki yie ti pegbandi leni ti ŋuagbandi, ke bi niba bia bi po, ki wangi ba fala. #2Baj 24.21. 38Ŋanduna ki den pundi ki yaa pia laa nimoanba o niinni. Bi den goadi mi fanpienma nni leni a juana nni, ki ye ti tanlondi nni leni i fali nni kuli.
39Ba ke bani kuli den baa ke U Tienu tieni bi po o siediŋamo kelima bi dandanli yaa po, baa den baa wan den niani ba yaala, 40kelima U Tienu den jagi ti po yaala n ŋani ki cie, kaa bua ban ŋanbi ki dagidi cain, ke tii ye lienni.
Currently Selected:
Hebilunba 11: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
