Hebilunba 10
10
1U Tienu bali maama den pia yaa bonŋanla n baa ti cua yaa jinjingu. Ama laa tie laa bonŋanla n tie maama cain. Li tie lani yaa po ke li bali maama yeni, kan den fidi ki ŋanbi yaaba n nagidi U Tienu cain. Li den tie tiladi ban yaa lindi ki padi binli kuli padibuoyendu. 2Lani yaa ka, bi den baa cedi a pada, kelima yaaba n jaandi yeni den baa ŋanbi cain yenma yogunu kuli po, ki kaa go faami bi tuonbiadi po. 3Ama laa pada den tiadi ba bi tuonbiadi binli kuli, 4kelima li kan tuo a naatona leni a ŋuabuana soama n fidi ki ñani ti tuonbiadi.
5Li tie lani yaa po ke Kilisiti n den kua ŋanduna nni yaa yogunu, o den yedi:
«Ŋaa bua li padili leni bu paabu kuli,
Ama a tagi n gbanandi.#Ps 40.7-9.
6Ŋaa den tuo ki gaa a padijuukaana,
Ba ti tuonbiadi sugili miabu yaa pada.
7Lane ke n den yedi:
‹U Tienu, n cua ki baa tieni a yanbuama.
Li maadi n yaa maame li tigbabikaali nni.› »
8O kpa yedi: «Ŋaa den bua pada, ŋaa den tuo bu paabu leni a padijuukaana leni ti tuonbiadi sugili miabu yaa pada.» O den yedi yeni, ba ke laa pada den ŋua li bali maama n bili maama. 9Lanwani, o den yuandi ki yedi: «N cua ki baa tieni a yanbuama.» Wan yedi yeni, o bolini a padikpiala buolu#10.9 A padikpiala buolu tie ya n kaa teni ke U Tienu yanbuama tieni. Li padiyuanli buolu tie Kilisiti, yua n den tieni U Tienu yanbuama kuli., ki bili li padiyuanli buolu. 10U Tienu yanbuama yeni po Kilisiti den puni o gbanandi, ki tua li padili ki kpe ti po yenma, ke li dagidi yogunu kuli po, ki gagidi ki ŋanbi ti.
11Kopadiciamo kuli yen se o tuonli kaanu daali kuli, ki tuuni o tuonli, ki go padi i yogini boncianla padibuoyendu, ya n kan fidi ki ñani ti tuonbiadi abada.#Ñam 29.38. 12Ama, wani Kilisiti n den padi padiyenli bebe ti tuonbiadi po yaala n dagidi yogunu kuli po, o den kali U Tienu jienu. #Ps 110.1. 13O guu moala ke o yibalinba n tua o taaŋmaakaanu. 14O padiyenli yeni yaa po, o teni ke wan gagidi ki ŋanbi yaaba dagidi cain, hali yaa yogunu kuli po.
15U Tienu Fuoma Yua moko tieni ti po siedi, ke li tie yeni. O kpa yedi:
16«Yaa dana n tie ne yaa pendi,
N baa kuani leni ba yaa ŋantaado n tie ne:
N baa bili n bali maama bi pala nni,
Ki go diani ma bi yantiana nni.»
O Diedo n yedi yeni. #Jer 31.33.
17Lane ke o pugini ki yedi:
«N kan go tiadi bi tuonbiadi
Leni bi biadima kuli po.» #Jer 31.34.
18Ti tuonbiadi sugili n ye naankani, padili ki go ye ti tuonbiadi po.
Tin yaa nagidi mani U Tienu kani
19Lanwani n kpiiba, ti pia li papaali ki baa kua u kaangagidiŋanmoanu nni, kelima Jesu soama po. 20O koadi ti po u sanpaanu yuu n ye ki fo, ki pigidi tipo bu kpalidoaginkaabu. Lani n tie o gbanandi. 21Wani n tie ban dini ti po yaa kopadicianba bado U Tienu diegu po. 22Lani kuli yaa po, tin yaa nagidi U Tienu kani leni li payenli leni li dandanmoanli, ki yaa pia yaa pala n ŋuudi ki ñani yaa pali siedi n bia leni yaa gbanandi n ŋuudi leni mi ñinŋanma. #Lev 8.30; Esk 36.25. 23Tin yaa se ke li pa, ki tiendi siedi tin pia yaa suginma po ki da cedi, kelima yua n niani ti u ñoanianu yeni, tie dugika. 24Tin yaa tiani mani tiyaba po, ki tigini tiyaba ke tin yaa pia mi buama ki tiendi a tuonŋama. 25Tin da ŋaa mani ti taanma, nani bi tianba n maani ki tiendi maama. Ama tin yaa paagidi mani tiyaba pala ki pugidi, kelima yi nua ke o Diedo daali nagidi.
26Ti yaa baa ki bandi i moamoani, ki yuandi ki tiendi ti tuonbiadi ti yama po, padili naa go ye ti tuonbiadi po. 27Ama se tin yaa guu leni i jeje U Tienu bujiali daali leni yaa mu n co ki baa bolini bi niyiekaaba. #Esa 26.11. 28Yua n den miidi Musa bali maama kuli, bi baa kpa o siedinbilie bi siedinbitaa yaa ñoana nni, ki naa den gbadi o po ninñima. #Tia 17.6; 19.15. 29Lanwani, yua n fali U Tienu Bijua, ki nua ke o ŋantaado yaa soama yaama den n ŋuudi ki ŋanbi o yeni tie fanma, ki go sugi li ŋanbili paabu Fuoma, naani o yaa cuonu ka baa yaa bia ki cie? #Ñam 24.8. 30Ti bani yua n den yedi: «Mini n tie o pantuulo, mini n baa tuu i biadipanpaani,» wani n go yedi: «Li Miali Diedo U Tienu baa jia o niba buudi.» #Tia 32.35-36. 31Li tie yaa bonla n pia i jeje hali boncianla, ki baa U Tienu yua n fo nuu nni.
32Yin yaa tiani mani lan den tie yi po maama yaa dana n pendi, U Tienu n den kpa yendi yi yama yaa yogunu. Ba ke bi den waani yi fala boncianla, yi den juuni ki moa li muacianli, ki se ke li pa lienni. 33Yogunuba bi yen fiagidi yi, ki go wangi yi fala bi niba kuli nintuali, yogunuba yi yen taani yenma leni ban den faligi yaaba. 34Yi den gba a kpaada po mi ninñima, ki go tuo ki mangi yi pala bi niba n den fie yi bonpiakaala yaa yogunu, kelima yi bani ke yi pia yaa ŋalimano n cie, yua n baa yaa ye hali yaa yogunu kuli. 35Lanwani, yin da ŋaa mani yin pia yaa dugidi, yaadi n pia yaa panpaani n yabi. 36Li pundi ke yin yaa pia li juunli ki se ke li pa, ke yin tieni U Tienu yanbuama ki dudi, ki baa wan den niani ke o baa pa yi yaala.
37Li diani:
«Li go sieni u yogunu waamu bebe,
Yoginjenjenga,
Ke yua n baa ti cua
Baa cua ke li kan waagi. #Hab 2.3-4.
38N niteginka baa ye ki fo,
Kelima o dandanli po.
O yaa guani puoli,
N pali kan yaa mani leni o.»
39Tinba wani, tii tie yaaba n guani puoli, ki baa yuandi ki bodi siiga nni yaaba ka. Ama ti tie yaaba n daani ti naani tindima po.
Currently Selected:
Hebilunba 10: BGP
Highlight
Copy
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
