2 Korɛ̃tɩ 4
4
Na-bʋ̃-sɩza na ƴãw yawra duwli pʋɔ a
1Su-ɓaarʋ zũú na n'a a Naaŋmɩn kʋ̀ tɩ a tõ-nʋɔr ŋa a, alɛ so tɩ bɛ be na bàl bɛr ɛ. 2Tɩ zawr'ɩ ɩb za bɛ na mɩ́ sɔwlɩ ɩrɛ a, nɩ bom za na ɩrɛ vĩ a. Tɩ bɛ tɛr yã-ɩb bɛ̀lɛ nɩ nɩbɛ ɩ, tɩ bɛ tɛwr a Naaŋmɩn ƴɛ̀rʋ tule nɩ a nɩbɛ ɩ, tɩ nɩ̃ɛ na ɩrɛ k'aa yel-mɩŋa sãá, bɔbr'ɩ k'aa nɩbɛ za nyɛ̃ kɛ́ tɩ ɩ n nɩ-mɩn a Naaŋmɩn niŋé. 3Ɛcɛ a Yel-nʋ̃ɔ̀ tɩ na manɛ a wa cãà ɩ mɛ̃ ʋ sɔwl'a a, a bɛlɩ dem na bɔrɛ a zie n'a ʋ sɔwlɩ, 4a naaŋmɩn-bɛ-sàw-dierbɛ, bɛl a tẽ-daa ŋa naaŋmɩn na zɔ̃w a bɛ tɩɛrʋ, kɛ́ bɛ ta nyɛ̃ a Kɩrɩta Yel-nʋ̃ɔ̀ yúor-vɩɛlʋ-danʋ cãà a, a Kɩrɩta ŋa na ɩ a Naaŋmɩn ŋmɛ̃-ta-tɔ tɔr za a. 5Tɩɩm mɩŋa bɛ nɛbɛ tɩ hiere yere kʋ̀rɛ a nɩbɛ ɩ, Sore Yeezu Kɩrɩta n'ʋ. Tɩɩm a, tɩ yere na kɛ́ tɩ ɩ n a nyɩ tõ-tõ-biir a Yeezu zũú. 6Bʋ̃ʋ n'ʋ vɛ̃, a Naaŋmɩn ʋl na yel kɛ́: «A cãà, ʋ caalɩ a lige sɔgɔ a#4:6 Nyɛ̃ Yzt 1.3.», ʋl mɩŋa n'ʋ caalɩ a tɩ socie pʋɔ, k'ʋʋ ɩ tɩ bãw a ʋ yúor-vɩɛlʋ-danʋ cãà na caalɛ a Kɩrɩta niwn ƴãw a.
7Ɛcɛ tɩ tɛr'ɩ a na-bʋ̃-sɩza ŋa mɛ̃ yawra duwli pʋɔ n'a tɩ ƴãw a, k'aa kpɛnʋ ŋa na bɛ tɛr tɔ a, ta yi tɩɩm zie ɩ, ʋ yi Naaŋmɩn zie. 8Kpɩɛrʋ bʋʋrɛ za ta tɩ na, ɛ́ a bɛ dĩ tɩ kʋ ɛ. A mɩ́ ɩ na mɛ̃ tɩ na tɔl'a gù a, ɛ́ tɩ tʋ̃ɔ́ tɔl. 9Bɛ diw tɩ na gʋɔr'ɩ, ɛ́ bɛ páw tɩ ɛ. bɛ lɔb tɩ nɩ tẽw, ɛcɛ bɛ kʋ tɩ ɛ. 10Kʋralɛ n'a a Kɩrɩta kũu be a tɩ ƴã-ganɩ́, k'aa ʋ nyɔ-vʋʋrʋ mɩ̀ tʋ̃ɔ́ sãá a tɩ ƴã-ganɩ́. 11Tɩ na saa cãà vʋʋrɛ a, ɛcɛ a kũu jɩɛrɛ tɩ nɩ kʋralɛ a Yeezu yúor ƴãw, k'aa ʋ nyɔ-vʋʋrʋ mɩ̀ tʋ̃ɔ́ sãá a tɩ ƴã-gan na ɩ bʋ̃-kpiira a pʋɔ. 12A na ŋmɛ̃ à ŋá a, a kũu tone nɩ a tɩ zie, ɛ́ a nyɔ-vʋʋrʋ tone a nyɩ zie.
13A Sɛb-sõw yel'a: «Ɩ̃ sàw na de, alɛ so ɩ̃ ƴɛ̀r#4:13 Nyɛ̃ Ssy 116.10..» A tɩɩm mɩ̀ a, a sàw-deb-been ŋa tɩɛrʋ tɩ na tɛr a n'a so tɩ mɩ̀ sàw de, ɛ́ alɛ n'a so tɩ ƴɛ̀rɛ. 14Bʋ̃ʋ n'ʋ vɛ̃, tɩ bãwnɩ a na, a sob nɛ na ɩ a Sore Yeezu ʋ lɛb yi a kũu pʋɔ a, ʋ mɩ̀ na ɩ na tɩ lãw nɩ a Yeezu lɛb yi a kũu pʋɔ, ʋʋ na de tɩ na lãw nɩ nyɩ a ʋ zie. 15A nyɩɩm ƴãw n'a tɩ sàwr tuo za, k'aa Naaŋmɩn maalʋ tarɛ nɩ-yaga dɔwlɛ, lɛ n'a nɩ-yaga na puore a Naaŋmɩn yãanɩ a ʋ yúor-vɩɛlʋ-danʋ ƴãw.
Naaŋmɩn-sàw-deb'a so tɩ vʋʋrɛ
16Alɛ so tɩ bɛ be za nãà bàl bɛr ɛ. A tɩ nɩsaal ʋl na sãá a saa sãwnɛ cere a, a tɩ nɩsaal ʋl na be a pʋ̃ɔmɩ a, lɩɛbɛ nɩ paala bibir za. 17A kpɩɛrʋ tɩ na páwr a ƴɛrɛŋa a bɛ zɛ̃ bom a yúor-vɩɛlʋ-danʋ na bɛ dɩ vuo ɛ́ be kʋralɛ a ƴãw ɛ. A yúor-vɩɛlʋ-danʋ ŋa ƴãw n'a a kpɩɛrʋ á ŋá cɔbrɛ tɩ. 18A bom nɛ tɩ na bɔbr kɛ́ tɩ páw a, ʋ bɛ ɩ bom bɛ na mɩ́ nyɛ̃ a ɩ, bom bɛ na bɛ mɩ́ nyɛ̃ a n'ʋ. Bom bɛ na mɩ́ nyɛ̃ a be n be sɛr, ɛcɛ a bom bɛ na bɛ mɩ́ nyɛ̃ a be kʋralɛ.
Currently Selected:
2 Korɛ̃tɩ 4: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.
