1 Makabe mɩnɛ 2
2
A bàwr-maalɛ Matatɩasɩ lãw-mʋɔlɛ
1A ʋlɩ daar nɛ a, Yowarib yir bàwr-maalɛ kãw, Matatɩasɩ, Zã bidɛb nɩ Sɩmɩ̃ɔ yãw, tɩ yi n a Zerizalɛm cen tɩ kpɩɛr Modin. 2Ʋ tɩ tɛr'ɩ bidɛbr anũu: Zã, bɛ mɩ̀ na bʋɔlɛ Gadi a, 3Sɩmɩ̃ɔ, bɛ mɩ̀ na bʋɔlɛ Tasɩ a, 4Zuda, bɛ mɩ̀ na bʋɔlɛ Makabe a, 5Eleazaar, bɛ mɩ̀ na bʋɔlɛ Awaran a, de nɩ Zonatã, bɛ mɩ̀ na bʋɔlɛ Afusɩ a. 6Ʋ na tɩ nyɛ̃ a ɩ-faar na bɛ maal'ɩ wob na ɩ a Zuda tẽw tẽ-bɛrɛ pʋɔ nɩ a Zerizalɛm a, 7ʋ yel'a:
«'Woi, mãa baw-bi-nɩr!
Ɩ̃ dɔw na k'ɩ̃ɩ nyɛ̃ a ɩ̃ nɩ-bʋʋrɛ
nɩ a tẽ-sõw loba bɩɩ?
Ɩ̃ dɔw na k'ɩ̃ɩ be a ka, zɩ̃,
ɛ́ a tẽ-kpɛ̃ɛ be
a ʋ dɔ̃ dem nuru pʋɔ,
ɛ́ sãanbɛ so
a Ŋmɩn-yir-kpɛ̃ɛ bɩɩ?
8A Ŋmɩn-yir-kpɛ̃ɛ ɩ na mɛ̃ nɩr
na bɛ cãà nyɛrɛ ƴãwfʋ a.
9A bome al na tɩ ɩ a ʋ dɛpaalʋ a,
bɛ wob a na cen nɩ,
mɛ̃ zɛbr bome
bɛ na zɛb de a.
Bɛ kʋ n a tɩ bi-pʋrpʋr
a nɩbɛ tuor-taa ziir,
a dɔ̃ sob zɛbr-sɔ-kpɛ̃ɛ
kʋ n a tɩ pɔlbili.
10A nɩ-bʋʋr-yoru zɛb'a de
a tẽ-kpɛ̃ɛ lɩɛrɩ taa,
ɛ́ tuo a ʋ na-bome cen nɩ.
11Bɛ ír'ɩ a ʋ pɩ̃ɛmɛ za.
Ʋ tɩ so nɩ ʋ tʋɔra a koro za,
ʋ ɩ n gbãgbaa ƴɛrɛŋa.
12A tɩ zi-sõw vɩɛlʋ n'a
tɩ so a tɩ nyʋ̀ʋ́r,
ʋlɛ n'ɩ ŋan gã
ɩ zie bɛ na bɛ cãà kpɩɛr a.
A nɩ-bʋʋr-yoru dɛw ʋ na bɛr.
13A nyɔ-vʋʋrʋ pãa
cãà na tɛr pɛr bɩɩ?»
14A Matatɩasɩ nɩ a ʋ bidɛbr tɩ taw nɩ a bɛ bʋ̃-suuri cɩɛrɩ, a bɛ kpɩɛrʋ pʋɔ. Bɛ tɩ su n vʋɔrɩ kparɩ#2:14 Vʋɔrɩ kparɩ: Ko-tuolu nɩ kpɩɛrʋ bãwfʋ n'a., ɛ́ kõ yaga za.
A bàwr-maalɛ Matatɩasɩ ìr'ɩ nɩ a zɛbr a Modin tẽw
15A nãà tõ-tõ-biir, na tɩ fɛrɛ a nɩbɛ kɛ́ bɛ zawrɩ a Moyiir wulu bɛr a, tɩ wa n a Modin kɛ́ bɛ wa fɛr a nɩbɛ ƴãw bɛ maalɩ bagɛ kʋ̀ a Gɩrɛkɩ mɩnɛ ŋmɩmɛ. 16Ɩsɩrayɛl nɩbɛ yaga tɩ wa na wa páw bɛ, ɛcɛ Matatɩasɩ nɩ a ʋ bidɛbr tɩ lãw na àr bɛ tʋɔra zie. 17A nãà tõ-tõ-biir tɩ de nɩ a ƴɛ̀rʋ yel a Matatɩasɩ: «Fʋ ɩ n nɩ-kpɛ̃ɛ na tɛr yúor ɛ́ nyɛrɛ ƴãwfʋ a tẽ-kpɛ̃ɛ ŋa pʋɔ a, a fʋ bidɛbr nɩ a fʋ yir dem tɩɛ fʋ na. 18A na ɩ à ŋá a, de niwn taw ta tu a lɛ a nãà na yel a, mɛ̃ a lɛ a nɩ-bʋʋr-yoru za nɩbɛ, a Zuda tẽw dem nɩ a nɩbɛ na cãà be a Zerizalɛm a na ɩ a. A lɛ pʋɔ a, fʋ̃ʋ nɩ a fʋ bidɛbr na pʋɔ nɩ a “Nãà bárɩ#2:18 Nãà bárɩ: Ƴãwfʋ bʋɔlʋ tɩ n'ʋ, a Pɛrsɩ mɩnɛ mɩ́ tɩ kʋ̀ nɩ-bɛrɛ bɛ mɩnɛ na pɩɛlɩ a nãà, ɛ́ lãw nɩ ʋ a ʋ nɩ-kpɛ̃ɛnʋ dɩb pʋɔ a.” pʋɔ. Bɛ na ƴãw nyɩ na, kʋ̀ nyɩ salm-pla, salm-zɩɛ nɩ bʋ̃-kʋ̀rɩ yaga.» 19A Matatɩasɩ tɩ ƴɛ̀r'ɩ nɩ kɔkɔr-kpɛ̃w sɔw: «A naalʋ-tẽw nɩ-bʋʋr-yoru za na tʋ̃ɔ́ na bɛrɛ wone a nãà ƴɛ̀rʋ, ɛ́ mɩ́ kaa ír tuur a lɛ ʋ na yel a, ɛ́ ŋa mɩ́ zawrɩ a ʋ sãàkʋm-kore puoru sɔ́r bɛr. 20Ɛcɛ mãa nɩ a ɩ̃ bidɛbr nɩ a ɩ̃ yir dem a, tɩ na cãà na tɛr a wõ-taa a Naaŋmɩn na maal'ɩ a tɩ sãàkʋm-kore a. 21A Naaŋmɩn, ʋ kʋ̀ tɩ a ʋ maalʋ, tɩ taa zawrɛ a Moyiir wulu nɩ a ʋ nɛ-ƴãwnɩ bɛrɛ ɩ! 22Tɩ kʋ̃ sàw a lɛ a nãà na yel a ɩ, tɩ bɛ bɩ̀ɛrɛ a tɩ puoru sɔ́r pʋɔ dʋrʋ bɩɩ gʋba ɩ.»
23A Matatɩasɩ na dɛ tɩ ƴɛ̀r baar'a, Zifʋ nɩr kãw tɩ taw na ta a nɩbɛ za niŋé, k'ʋʋ maalɩ bàwr a Modin bàwr-maal-kuur zu, mɛ̃ a lɛ a nãà na tɩ yel a. 24A Matatɩasɩ na tɩ nyɛ̃ ʋ a, a tɩ dɩrɛ ʋ nɩ mɩrmɩrmɩr, ɛ́ ƴãw za kárɛ ʋ. Suur na sɛw a tɩ kpɛ ʋ na, ʋ zɔ cen tɩ ŋmaarɩ a nɩr nɛ kɔkɛɛ a bàwr-maal-kuur zu. 25Ʋ mɩ̀ tɩ kʋ n a nãà tõ-tõ-bie na tɩ fɛrɛ a nɩbɛ kɛ́ bɛ maalɩ a bagɛ a, a ʋlɩ pɛr nɛ pʋɔ, ɛ́ dáa a bàwr-maal-kuur lɔb. 26A tʋlʋ ʋ na tɩ tʋlɛ a Moyiir wulu ƴãw a, tɩ ɩ na mɛ̃ Pɩnasɩ#2:26 Pɩnasɩ: Nyɛ̃ Sɔr-n 25.6-14. dem a, a lɛ ʋ na tɩ kʋ a Salu bidɛb Zimiri a.
A Zifʋ bɛl na bɛ lɛb pùor a zɔ na kpɛ a wɛja-kpalɛ pʋɔ.
27Al pùorí, a Matatɩasɩ tɩ cɔlɛ nɩ a tẽ-kpɛ̃ɛ cɩɩrɛ yere nɩ: «A bɛlɩ dem za na tʋlɛ a Moyiir wulu ƴãw ɛ́ maal tɛr a wõ-taa a, bɛ tuur mɛ̃!» 28Ʋl mɩŋa nɩ a ʋ bidɛbr tɩ zɔ na kpɛ a tan pʋɔ, ɛ́ bɛr bom za bɛ na tɛr a tẽ-kpɛ̃ɛ pʋɔ a. 29Lɛ n'a nɩ-yaga, na tɩ bɔbr kɛ́ bɛ vʋʋrɛ nyɔ-vʋʋrʋ na tori mɛ̃ a lɛ a Moyiir wulu na ƴãw a, tɩ cen a wɛja-kpalɛ pʋɔ kɛ́ bɛ tɩ kpɩɛr a be, 30a bɛl, a bɛ bidɛbr, a bɛ pɔwbɛ nɩ a bɛ dʋn, a kpɩɛrʋ na tɩ páw bɛ a ƴãw.
31A nãà sojarɩ nɩ-bɛrɛ nɩ a sojarɩ na tɩ be a Zerizalɛm, a Daviir Tẽ-kpɛ̃ɛ pʋɔ a, tɩ wõ na kɛ́ nɩbɛ zawr'ɩ a lɛ a nãà na yel a, ɛ́ cen a wɛja-kpalɛ pʋɔ kɛ́ bɛ tɩ sɔwlɩ. 32Lɛ n'a soja-yaga tɩ ìr ta tu bɛ tɩ páw bɛ, maalɩ a bɛ laɩ tori bɛ, ɛ́ cɔbrɩ kɛ́ bɛ zɛb'ɩ bɛ a pɩ̃ɛnʋ-bibir. 33A sojarɩ tɩ yel'ɩ a Zifʋ mɩnɛ: «A pãa sɛw nɩ lɛ! Nyɩ wa yi a nyɩ sɔwlʋ zie, nyɩ sàw a lɛ a nãà na yel a, ɛ́ nyɩ na faa nɩ a nyɩ nyɔ-vʋʋrʋ!» 34A Zifʋ mɩnɛ tɩ sɔw na: «Tɩ bɛ yire ɩ, ɛ́ tɩ bɛ sàwr a lɛ a nãà na yel a ɩ. Tɩ bɛ sãwnɛ a pɩ̃ɛnʋ-bibir ciiru ɛ.»
35A Sojarɩ tɩ ŋmãa nɩ bɛ nɩ a zɛbr a daadaalɛ. 36Ɛcɛ a Zifʋ mɩnɛ bɛ tɩ ɩ ɩb kãw za sɔw ɛ. Bɛ bɛ tɩ lɔb'ɩ a sojarɩ kʋsɛ-been ɛ, ɛ́ bɛ tɩ piw a sɔwlʋ ziir tɛr ɛ. 37Bɛ tɩ yere na: «Nyɩ ɩ tɩ kpi n a tɩ mɩnʋ tɩ za. A salom nɩ a tẽw dɩrɛ nɩ a dãsɩɛ nyɩ na kʋrɛ tɩ ɛ́ a bɛ tu sɔ́r a.» 38À ŋá n'a a bɛ dɔ̃ dem tɩ zɛb'ɩ bɛ a pɩ̃ɛnʋ-bibir. Bɛ tɩ kpi na, bɛlɛ nɩ a bɛ pɔwbɛ, a bɛ bibiir nɩ a bɛ dʋn. Bɛ za tɩ ta n nɩbɛ túr (1 000).
39A Matatɩasɩ nɩ a ʋ bárɩ na tɩ wõ a bɛ kũu a, bɛ kõ bɛ nɩ mʋta-zɩ̃ɩ. 40Al pùorí, bɛ tɩ yel'a kʋ̀ taa: «Tɩ za wa ɩrɛ mɛ̃ a tɩ yɛbr a, tɩmɛ bɛ wa zɛbr'ɩ a nɩ-bʋʋr-yoru tʋ̃ɔ́ faa a tɩ nyɔ-vʋʋrʋ nɩ a tɩ bʋʋrɛ ɩ-ɩrɩ a, bɛ na kʋ tɩ na pàw pɛr fɔ̃wlɛ a tẽw zu.» 41A ʋlɩ bibir nɛ a, bɛ tɩ ƴɛ̀r'a bin à ŋá: «Tɩ na zɛb'ɩ nɩ nɩr za na na wa wa ŋmãa nɩ tɩ zɛbr a pɩ̃ɛnʋ-bibir a. Lɛ n'a tɩ kʋ̃ kpi tɩ za mɛ̃ a tɩ yɛbr na kpi a bɛ sɔwlʋ ziir a ɩ.»
42Lɛ n'a Asɩdeyɛ̃#2:42 Asɩdeyɛ̃: Zifʋ nɩbɛ bɛ mɩnɛ kãw na tɩ nɔ̃w a puoru, ɛ́ tuur a Naaŋmɩn wulu pùor vla vla a nɛbɛ. bɛ mɩnɛ kãw tɩ wa lãw nɩ bɛ. Nɩbɛ bɛ na bãw bɛ kpɛ socir a Ɩsɩrayɛl tẽw pʋɔ a nɩ nɩbɛ na bɛ tɩ sàwr a Moyiir wulu ƴãw a tɩ nɛbɛ. 43Lɛb waar, a bɛlɩ dem za na tɩ bɔbr kɛ́ bɛ nɩɩrɩ a kpɩɛrʋ á ŋá bɛr a, tɩ waar'a wa ɩrɛ a bɛ nʋɔr nɩ a bɛ fãw a kɛ̀rɛ. 44Bɛ tɩ lãw nɩ taa ɩ zɛbr-nɩbɛ. A bɛ su-tʋlʋ-kpãkpã tɩ ƴãw bɛ na bɛ kʋ a Zifʋ nɩbɛ bɛl na bɛ tu a wulu pùor a. A bɛl bɛ na bɛ tɩ páw a tɩ zɔ na kpɛ a nɩ-bʋʋr-yoru pʋɔ. 45A Matatɩasɩ nɩ a ʋ bárɩ tɩ cɔlɩ nɩ ziir, dá a ŋmɩn-sãanbɛ bàwr-maal-kube lɔb. 46A dɛbli bɛl yɛɛ na bɛ tɩ ŋma a Ɩsɩrayɛl tẽw pʋɔ a, bɛ tɩ ŋma a na nɩ fãw. 47Bɛ tɩ ìr'a diwr a dɔ̃ dem, ɛ́ tɩ tʋ̃ɔ́ diw bɛ mɔlɛ lɛ. 48Bɛ tɩ faa nɩ a Moyiir wulu a nɩ-bʋʋr-yoru nɩ a bɛ na-mɩnɛ nuru pʋɔ, ɛ́ bɛ sàw a yel-bier sob#2:48 Yel-bier sob: A na ɩ n a nãà Ãtiokisi Epifan. Nyɛ̃ 1.10. tʋ̃ɔ́ ɩ.
A Matatɩasɩ kũu daar ƴɛ̀rʋ nɩ a ʋ kũu
49A Matatɩasɩ kũu tɩ pɩɛlɛ na. Ʋ tɩ yel'ɩ a ʋ bidɛbr:
«Pɔ̀lʋ nɩ zʋmɛ vuo
n'ɩ a tɩ vuo ŋa,
damnʋ nɩ po-to-fãw-ɩb daar'a.
50Ƴɛrɛŋa a, ɩ̃ bibiir i,
nyɩmɛ so na zɛb
kpɛ̃w kpɛ̃w za faa
a Moyiir wulu,
ɛ́ de a nyɩ nyɔ-vʋʋrʋ tɩr
a wõ-taa a Naaŋmɩn
na maal'ɩ
a tɩ sãàkʋm-kore a ƴãw.
51Nyɩ mɩ́ lɛb tɩɛrɩ a yele
a tɩ sãàkʋm-kore
na tɩ ɩ a bɛ daar a,
nyɩ na nyɛ̃ nɩ ƴãwfʋ yaga za,
ɛ́ páw yúor na be kʋralɛ a.
52A Abraham bɛ tɩ cãà tu
a Naaŋmɩn a kpɩɛrʋ daar ɛ?
Alɛ so a Naaŋmɩn
tɩ nyɛ̃ ʋ k'ʋ ɩ nɩ-mɩŋa.
53Lɛ mɩ̀ n'a a Zuzɛb tɩ tu
a Naaŋmɩn wulu
a ʋ kpɩɛrʋ pʋɔ,
ɛ́ lɩɛbɩ a Eziptɩ tẽw zu-sob.
54A tɩ sãàkʋm-kʋra Pɩnasɩ
tɩ tʋlɛ nɩ bʋ̃-zaalɛ,
lɛ n'a a Naaŋmɩn
tɩ ƴãw nʋɔr kʋ̀ ʋ
k'aa ʋ bʋʋrɛ na ɩrɛ nɩ
Naaŋmɩn bàwr-maalbɛ kʋralɛ.
55A Zozue tɩ lɩɛb'ɩ ƴɛ̀r-dɩrɛ
a Ɩsɩrayɛl tẽw pʋɔ,
ʋ na tɩ tõ a ʋ tõ-nʋɔr a ƴãw.
56Kalɛb tɩ páw nɩ tẽsɔw,
ʋ na tɩ ɩ dãsɩ-dɩrɛ na kpɛ socir
a Ɩsɩrayɛl nɩbɛ lãw niŋé a ƴãw.
57Daviir tɩ tu n a Naaŋmɩn
páw naalʋ-dà-kɔw,
ʋlɛ nɩ a ʋ bʋʋrɛ ƴãw kʋralɛ.
58Eli tɩ tʋlɛ nɩ yaga za
a Naaŋmɩn wulu ƴãw,
bɛ ír ʋ do n a salom zu.
59Ananɩasɩ, Azarɩasɩ,
Mɩkayɛl bɛ tɩ tʋ̃ɔ́ kpi
a vũu-zɛlɛ pʋɔ ɩ,
bɛ na tɩ ƴãw a bɛ tɩɛrʋ
a Naaŋmɩn ƴãw a zũú.
60Danɩɛl na tɩ ɩ nɩ-dẽdẽ a,
a gbẽw bɛ tɩ tʋ̃ɔ́ 'wɔb ʋ ɛ.
61A na ɩ à ŋá a,
nyɩ bãwnɩ a vla:
a nɩbɛ na dɔwr lɩɛrɛ taa
cere a pʋɔ a,
bɛlɩ dem za
na mɩ́ ƴãw a bɛ tɩɛrʋ
a Naaŋmɩn ƴãw a,
a bɛ fãw bɛ siwre ɩ.
62Nyɩ ta zɔrɛ
a yel-bier sob#2:62 Yel-bier sob: Nyɛ̃ 2:48 nɩ a manʋ. ŋa ɩ,
bʋ̃ʋ n'ʋ vɛ̃,
a ʋ yúor-vɩɛlʋ-danʋ
na lɩɛb'ɩ pʋɔrʋ,
ɛ́ zãzule dɩ ʋ.
63Dɩ̃a a, ʋ nyɛrɛ nɩ ƴãwfʋ,
ɛcɛ bio a, ʋ na bɔr'a,
bʋ̃ʋ n'ʋ vɛ̃,
ʋ na lɛb lɩɛb'ɩ tanɛ,
ɛ́ a ʋ pʋ-tɩɛrʋ wɛ.
64Ɩ̃ bibiir i, nyɩ kpɛmɛ
ɛ́ tɛr a Moyiir wulu kpɛ̃w za,
a wulu ŋa n'ʋ na kʋ̀ nyɩ
a yúor-vɩɛlʋ-danʋ.
65A nyɩ yɛb Sɩmɩ̃ɔ n'ɩ ŋan, yã-wule vla n'ʋ, nyɩ bɛrɛ wone ʋ kʋralɛ: ʋ na ɩ n sãà a nyɩ zie. 66Zuda Makabe na kpɛ socir a ʋ bibile daarɩ́ za a, na ɩ n a nyɩ zɛbr-nɩbɛ nɩ-kpɛ̃ɛ, zɛbr'ɩ a nɩ-bʋʋrɛ, a nyɩ dɔ̃ dem. 67Nyɩɩm ƴãw a, nyɩ bʋɔlɩ a bɛlɩ dem za na sàwr a wulu a a nyɩ zie, ɛ́ yáa a nyɩ nɩ-bʋʋrɛ san. 68A faa a nɩ-bʋʋr-yoru na ɩ a nyɩ zie a, nyɩ mɩ̀ ɩ bɛ a faa yáa a san, ɛ́ sàwr a wulu nɛ-ƴãwnɩ kʋralɛ.»
69Al pùorí, a Matatɩasɩ tɩ ƴɛ̀r'ɩ nɔ-vla kʋ̀ a ʋ bidɛbr, ɛ́ kpi cen tɩ páw a ʋ sãà mɩnɛ. 70Ʋ tɩ kpi n yome lɩz'a ayopõi nɩ ayʋɔb#2:70 146: A Yeezu Kɩrɩta na bɛ tɩ wa sɛr a yome 166 sob'ʋ. (146) sob daar, a ʋ bidɛbr ũù ʋ a ʋ sãàkʋm-kore yaa pʋɔ, a Modin. A Ɩsɩrayɛl nɩbɛ za tɩ kõ ʋ nɩ yaga.
Currently Selected:
1 Makabe mɩnɛ 2: DBDC
Highlight
Copy
Compare
Share
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.