Galatɩ Sɛbɛ 5
5
SƖ́ BƆ̃W TƐRƐ A KIRISI FAAFƲ
1A *Kirisi faa sɩ na bar, a sɩ na sɩrɩ̃ sɔ a sɩ mɩ̃ɛ. Ala-ɩ̃-sɔ nyɩ́ ɩraa cĩcĩ a be, kɔ̃ lɛ lɩɛb kpɛ a gbãgba-tʋmɔ pʋɔ wa.
2Nyɩ́ cɛlɛ! Maa Pol ɩ̃ yele nyɩ, nyɩmɩ ɩ a ba ŋmaa nyɩ a yʋɔr, a Kirisi ma lɛ ɩrɛ bom a nyɩ nii-sɔw wa. 3Ɩ̃ lɛ yele na, a nɩrɛ lɛ na ɩ a ba ŋmaa ʋ a yʋɔr áa fɛrʼã ʋ na jɔ a ala a jaa a ƴɛr-kpɛn na yel. 4A nyɩmɩ na bʋɔrɔ a torfʋ a ƴɛr-kpɛn jɔfʋ pʋɔ, nyɩ ŋmaa na taa nɩ a Kirisi, faa a Naaŋmɩn sũofʋ. 5Ɩ̃-cɛ a sɩmɩ, a Naaŋmɩn Sɩɛ ɩ̃ maal sɩ a sɩ tɛrɛ a ƴɔ̃w-nyãa gure nɩ a mɩnɛ ʋ nɔɔ maala sɩ a sɩ toro a ʋ nii-sɔw. 6A sɩmɩ na be a *Jeeju-Kirisi pʋɔ, fʋ ŋmaa na a yʋɔr mɩɩ faa ŋmaa wa, aa ɩ bom wa. A ala na ɩ a bom ɩ na a ƴɔ̃w-nyãa na be a nʋfʋ pʋɔ.
7Nyɩ dãa na cere vɩlaa. Ala ɩ̃ var nyɩ a sɔr a nyɩ bar a yel-mɩ̃ɛ cʋfʋ? 8A ala ba na maal tʋɔ nɩ nyɩ a lɛ, ma yi a Naaŋmɩn ʋlɔ na bʋɔlɔ nyɩ jie wa. 9A mɩnɛ ba na ma yel: “Tabɩr fɩ̃ɩ ma tʋɔ na maal a bur-jɔ̃ ʋ vʋ̃ ʋ jaa.” 10Ɩ̃ a mɩnɛ sɩ na ɩ a bõ-ƴen a Nɩ-kpɛ̃ɛ pʋɔ ɩ̃ barʼã nyãa a nyɩ ɩnɛ, a nyɩ kɔ̃ lɩɛb a nyɩ tɩɛrɩ̃sɩ wa. Ɩ̃-cɛ a mɩnɛ a nɩrɛ lɛ na wɔ̃ ɩ̃ nyanyaana a nyɩ tɩɛrɩ̃sɩ ʋ na pɔw na a Naaŋmɩn kpãafʋ.
11Yɛɛr, a ala ɩ̃ ɩ a maa ʋ, a maa cãa ƴɛrɛ a yʋɔr ŋmaafʋ ƴɛrɩ̃, bõ ɩnɛ ba lɛ cãa hʋɔlɔ ma? Ɩ̃ a ala dãa be a lɛ, a Kirisi kũu ʋ na kpi a nɩ-kʋ-daa juu ƴɛrɩ̃ kɔ̃ lɛ cɛ nɩrɛ wa. 12A vɩɛlɛ na a bala na nyanyaana a nyɩ tɩɛrɩ̃sɩ na nyɩrɛ cere, a ba wa ir a ba lama#5.12 A lama irfʋ: A Pol daar a ɩ na bom na a tɩb-bɛrɛ deme na ma dãa maala. bar!
13Yɛɛr, a ala ɩ̃ ɩ a nyɩmɩ ʋ, a Naaŋmɩn bʋɔl nyɩ na a nyɩ na sɔ a nyɩ mɩ̃ɛ, ɩ̃-cɛ nyɩ taa tɔɔ cow nɩ ɩ̃ maala a bom lɛ a nyɩ ɩ̃gan buur na bʋɔrɔ wa, ɩ̃ nyɩ́ ɛ̃ɛ tɛrɛ a nʋfʋ sũono nɩ taa. 14A-na-ɩ a ƴɛr-kpɛn a jaa juu ɩ na: “Nʋnɔ a fʋ tɔ sʋbɔ a fʋ mɩ̃ɛ kaarɩ̃.” 15Ɩ̃-cɛ a nyɩmɩ nyala taa, ꞌwɔbɔ nɩ taa a wɛ-dʋn kaarɩ̃, nyɩ́ tɛrɛ nyɩ mɩ̃ɛ kɔ̃ sãwna taa wa.
A Ɩ̃GAN BUUR TƲ̃-BIE NƖ A NAAŊMƖN SƖƐ WƆMƆ
16A ala ɩ̃ na yel nyɩ ɩ na, nyɩ́ bar a nyɩ mɩ̃ɛ kʋ a Naaŋmɩn Sɩɛ ʋ tɔwrɔ nyɩ, a mɩnɛ a nyɩ kɔ̃ wa sɔw a nyɩ ɩ̃gan buur tɩɛrɩ̃sɩ wa. 17A-na-ɩ a sɩ ɩ̃gan buur tɛrɛ na a tɩɛrɩ̃sɩ na lɩɛbɛ a Naaŋmɩn Sɩɛ ben, ɩ̃ a Naaŋmɩn Sɩɛ mɩ tɛrɛ a ʋ tɩɛrɩ̃sɩ na lɩɛbɛ a ɩ̃gan buur ben. A ana yele ayi ɩ na taa sama-deme, a saa tʋɔrɔ maala a ala sɩ na bʋɔrɔ wa. 18A ala ɩ̃ ɩ a Naaŋmɩn Sɩɛ ɩ̃ tɔwrɔ nyɩ, a ƴɛr-kpɛn ma lɛ tɛrɛ fãgã a nyɩ jie wa.
19A nɩbɛ jaa bɔ̃w na a ala na ɩ a ɩ̃gan buur tʋmɔ. A ɩ na a gã-ta-burbur, a tʋ̃-kpansɩ, nɩ a pebfʋ. 20A mɩ ɩ na a tɩbɛ-lofʋ, a tɩsɔɔlʋ̃ʋ, a ꞌlaar-taa, a faa-taa, a nyuur, a suur nyɛfʋ nɩ a yo-bɔb tʋmɔ. A mɩ lɛ ɩ na a kpee kpee ŋmafʋ, a jir-ƴɛrɩ̃sɩ, 21a nɩrɛ bom jɩɛlfʋ, a dãa kʋfʋ, a kpokpo dɩb dɩfʋ nɩ a yele ŋmɛɛ na wɔ̃ a lɛ. Ɩ̃ kpãkpana nyɩ na a mɩnɛ ɩ̃ na dãa de nĩe yel nyɩ, a nɩ-lɛ nʋmɔ ma nyɛrɛ sɔr kpɛɛrɛ a Naaŋmɩn fãw pʋɔ wa.
22Ɩ̃-cɛ a ala a Naaŋmɩn Sɩɛ na wɔnɔ a sɩ baafʋ pʋɔ ɩ na a nʋfʋ, a nʋ̃ɔ, a pɩɛnfʋ, a su-nyɔwraa, a pʋ-pɩlaa, a son ɩfʋ, a dẽdẽ ɩfʋ, 23A hɛlɛlɛ ɩfʋ nɩ a mɩ̃ɛ-tɛrɛfʋ. Ƴɛr-kpɛ̃w ma be be na ma cere nɩ a yel-nɔhɔ̃ wa. 24A bala na ɩ a *Jeeju-Kirisi ben, de na a ba nɩrɛ wãa nɩ a ʋ yele vɩláa nɩ a ʋ mɩ̃ɛ bɔb a ba lãa kpa nɩ ba a *Kirisi. 25A ala ɩ̃ ɩ a Naaŋmɩn Sɩɛ kʋ sɩ na a baafʋ, a sɛw na sɩ bar a sɩ mɩ̃ɛ kʋ ʋ ʋ naa tɔwrɔ sɩ. 26Sɩ taa ɩ yo-bʋɔrbɔ wa. Sɩ taa mɩ bʋɔrɔ taa a gɔmɔ mɩɩ jɩɛlɛ taa a yele wa.
Currently Selected:
Galatɩ Sɛbɛ 5: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
