2 Kɔrɛ̃tɩ Sɛbɛ 12
12
A SƖƐ YELE NƖ A YEL-MIILSƖ A POL NA NYƐ
1A ala saarɩ̃ ɩ aa vɩɛlɛ wa, a sɛw na ɩ̃ bɔ a yuor. Ala-ɩ̃-sɔ, ɩ̃ na nyɔw na a sɩɛ yele nɩ a yel-miilsɩ ala na yi a Nɩ-kpɛ̃ɛ jie, ɩ̃ mana a ƴɛ̃ƴɛrɩ̃ na. 2A ɩ na yomo pie-nʼanuu for bir a dɩnaa, ɩ̃ na bɔ̃w a *Kirisi nɩrɛ kãw ba na dãa ɓɔw do nɩ a saꞌlon nɩdaa jaa. A ɩ̃gan ba dãa ɓɔw nɩ ʋ do nɩ mɩɩ a sɩɛ pʋɔ ba ɓɔw ʋ mɩɩ, maa bɔ̃w wa. Naaŋmɩn ɩ̃ bɔ̃w. 3Ɩ̃ bɔ̃w na bɔ̃w ka a daba ʋlɔ, ba jal ʋ na do nɩ a Naaŋmɩn ji-vɩlaa pʋɔ. A ala ɩ a ɩ̃gan ba jal do nɩ mɩɩ a ʋ sɩɛ ʋ, maa bɔ̃w wa. Naaŋmɩn ɩ̃ bɔ̃w. 4Ɩ̃ a be, ʋ wõ na a ƴɛrɩ̃sɩ ala ba na ma tʋɔrɔ miile nɩrɛ wa, ɩ̃ a nɩrɛ na ma mɩ tɛrɛ sɔr na ƴɛrɛ wa. 5A ʋna nɩrɛ ɩnɛ ɩ̃ na bʋɔrɔ a yuor. Ɩ̃ a maa mɩ̃ɛ, maa tʋɔrɔ bʋɔrɔ yuor, ɩ̃ a ala ma ɩ a ɩ̃ balfʋ ɩnɛ tɛw ʋ wa. 6A ala ɩ ɩ̃ dãa na bʋɔrɔ ɩ̃ bɔ yuor, ɩ̃ kɔ̃ ɩ dãbol wa, a-na-ɩ a yel-mɩ̃ɛ ɩ̃ na ƴɛrɛ. Ɩ̃-cɛ, ɩ̃ barʼã, a-na-ɩ ɩ̃ jɔrɔ na dãbɩ̃ɛ a mɩnɛ ba kɔ̃ɔ de ma ɩ̃ ɩ kpɛ̃ɛ gãw a ala ba na nyɛ ma ɩ̃ maala mɩɩ mɩ wono a ɩ̃ jie wa.
7Ɩ̃ a mɩnɛ ɩ̃ kɔ̃ wa vʋnɔ a ɩ̃ mɩ̃ɛ a Naaŋmɩn yel-miilsɩ ɩ̃ na nyɛ a nyɩrɩ̃ vɩɛlɛ a nɔhɔ̃, ɩ̃ pɔw na a won kpɛ̃ɛ a ɩ̃ ɩ̃gan pʋɔ, na wɔ̃ taa nɩ a Satã sɩ-tʋnaa ʋ na tʋ̃, ʋ na pɔb ma a mɩnɛ ɩ̃ kɔ̃ wa vʋnɔ wa. 8A ala ɩnɛ ɩ̃ sʋɔrʼã a Nɩ-kpɛ̃ɛ gbɛɛ ata, ʋ ir a ʋna won bar a ɩ̃ jie. 9Ɩ̃-cɛ ʋ yel ma: “A ɩ̃ sũofʋ sɛw nɩ fʋ na, a-na-ɩ a balfʋ pʋɔ a ɩ̃ kpɛ̃w ma pɔw a ʋ fãgã.” Ala-ɩ̃-sɔ a ɩ ma na nʋ̃ɔ ɩ̃ na bɔ a yuor a ɩ̃ balfʋ pʋɔ, a mɩnɛ a Kirisi kpɛ̃w na tʋɔ piw ma tɛɛlɛ. 10A ala ɩnɛ a ma nʋmɔ ma a ɩ̃ balfʋ pʋɔ, a tʋ-bie pʋɔ, a won pʋɔ, a hʋɔlfʋ nɩ a nãw pʋɔ a Kirisi ɩnɛ, a-na-ɩ a lɛdaar ɩ̃ na ma bal, be ɩ̃ ma ɛ̃ɛ kpɛmɛ.
A POL NA WAALA A KƆRƐ̃TƖ NƖBƐ ƖNƐ
11Ɩ̃ lɩɛbʼã ɩ a dãbol, ɩ̃ a nyɩ maalfʋ ɩ̃ fɛr ma ƴɔ̃w, a nyɩmɩ na dãa sɛw nyɩ ɓã ma. A ala saarɩ̃ ɩ maa ɩ bom wa, ɩ̃-cɛ maa pab bom kãw ɩnɛ a nyɩ nɩ-tʋ̃-vɛlɛ jie wa. 12A tʋmɔ ala na miile ɩ̃ ɩ na a *nɩ-tʋnaa maalʼã a nyɩ nii-sɔw. Nyɩ nyɛ na a mɩnɛ ɩ̃ na ɩraa a cĩcĩ a daar a jaa, tʋnɔ nɩ a nɔ-kofʋ tʋmɔ nɩ a tʋ̃-bɛrɛ, miilĩ nɩ a Naaŋmɩn kpɛ̃w. 13Bõ ɩ̃ maal a *duo-puorbo ŋmɛɛ na be a jie kãw gãw nyɩ, ɩ̃-cɛ a ala ma ɩ a nyɩmɩ tɛw ɩ̃ na ma sɔw a nyɩ han ma wa…? Nyɩ́ de a ɩ̃ bɩɛfʋ bar kʋ ma!
14Nyɩ́ nyɛ ma na gbɛɛrɩ̃ baar a ɩ̃ gbɛɛ ata wɩfʋ a be, ɩ̃, ɩ̃ kɔ̃ ɩ a nyɩ han ma wa. A-na-ɩ aa ɩ a nyɩ yele ɩ̃ bʋɔrɔ wa, ɩ̃-cɛ a nyɩ mɩ̃ɛ ɩ̃ bʋɔrɔ. Aa ɩ a bibiir ɩ̃ sɛw na tɛrɛ a yele guolo nɩ a ba dɔɔrbɔ wa, ɩ̃-cɛ a dɔɔrbɔ sɛw na tɛrɛ guolo nɩ a bibiir. 15A ala ɩ a maa ʋ, a nʋmɔ ma na ɩ̃ na sãw a ala a jaa ɩ̃ na tɛrɛ, nɩ a maa mɩ̃ɛ, a nyɩ sũofʋ ɩnɛ. Nyɩ kɔ̃ bɔ̃w nʋnɔ ma a ala ɩ ɩ̃ tɩɩ na nʋ nyɩ a nɔhɔ̃ wa…?
16Nyɩ na sɩrɩ̃ na yel á maa ɩ nyɩ tuor wa, ɩ̃-cɛ nyɩ na tɩɛrʼã beeka ɩ̃ kpɩlʼã nyɔwrɔ nɩ nyɩ a jiri a cakpo pʋɔ. 17A nɩbɛ bala ɩ̃ na tʋ a be, ɩ̃ ƴɔ̃w na kãw ʋ ŋmam nyɩ mɩɩ? 18A mɩnɛ ɩ̃ na sʋɔr a Tɩtɩ nɩ a sɩ yɛbɛ a ba wɩ a be a nyɩ sɛ̃, a Tɩtɩ ŋmam nyɩ na mɩɩ? Aa ɩ a maal-bõ-ƴen sɩ tɛrɛ, mɩ cere nɩ a cen-bõ-ƴen wa…?
19Yɛ-nʋnɩsɩ, nyɩ ma tɩɛrʼã a korĩ-cɛ á sɩ ma bʋɔrɔ na sɩ miil a sɩ torfʋ a nyɩ nii-sɔw, ɩ̃-cɛ aa ɩ lɛ ʋ wa. Sɩ ma ƴɛrɛ na a ala a jaa a Naaŋmɩn nii-sɔw a *Kirisi pʋɔ, a mɩnɛ nyɩ na tʋɔrɔ karɛɛ dɔɔlɔ a nyɩ ƴɔ̃w-nyãa pʋɔ. 20Ɩ̃ jɔrɔ na dãbɩ̃ɛ a mɩnɛ ɩ̃ nɔɔ wɩɛrɛ a be a nyɩ jie, a nyɩ kɔ̃ wa wɔ̃ a mɩnɛ ɩ̃ na ma bʋɔrɔ wa, mɩɩ ɩ̃ wɔ̃ a mɩnɛ nyɩ na ma bʋɔrɔ wa. Ɩ̃ jɔrɔ na dãbɩ̃ɛ a mɩnɛ ɩ̃ kɔ̃ wa nyɛ a jɛb, a nyuur, a suur nyɛfʋ, a yo-bɔb tʋmɔ, a korfʋ, a cilĩ-taa, a nyɩ mɩ̃ɛ vʋ̃fʋ, nɩ a nyanyaafʋ a be a nyɩ sɔ̃w wa. 21Ɩ̃ mɩ jɔrɔ na dãbɩ̃ɛ a mɩnɛ ɩ̃ nɔɔ wɩɛrɛ a Naaŋmɩn kɔ̃ wa ƴɔ̃w ma vĩ a nyɩ nii-sɔw wa, ɩ̃ na kono a bala ɩnɛ na dãa maal a fãa ɩ̃ ma lɩɛb a yɛ̃ a ba maal-bi-kpansɩ ɩnɛ, a gã-ta-burbur, nɩ a pebfʋ ala na dãa be a ba jie wa.
Currently Selected:
2 Kɔrɛ̃tɩ Sɛbɛ 12: BNT93
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
