Yohana 15
15
1Nene ndi muzabibu gwa loleyene na Vava ali muhambi. 2Kila itambi hawane holyene kufyambya ngʼo fisumo alilinja lyenili; na kila itambi holyene lilifyambya fisumo alilipyagulila, kigele lifyambye fisumo fingi. 3Inwe mwamalaga kwela kunguno ya muhayo hogwene namuwilile inwe; mudile mugati na nene, nane mugati ninwe. 4Kitisi itambi likakovolile kufyambya fisumo kulyo lyenekili, ulu likadilile ku muzabibu, sisyo inwe vene ulu mukavile kudila mugati na nene. 5Nene ndi muzabibu, inwe muli matambi. Homwene alidilamo mugati na nene, nane mugati nawe, mwenuyu alifyambya fisumo fingi, kwisi vuduhu na nene mukakovolile kuvezya kinhu. 6Ulu umo akavile kudilamo mugati na nene, utagilwa hanze kitisi itambi, lyunyala, na valigakuminga na valigatagila mu moto, gupya. 7Ulu inwe mulidilamo mugati na nene, na mihayo yane yilidilamo muwinwe, haho mulombe icho mulikova na mukupiwa. 8Mwenumo Vava alikumukiwa ulu inwe mulifyambya fisumo fingi, na syenisyo mukuvi vahemba vane. 9Kitisi Vava wantogagwa, sisyo sisyene ndimutogwa inwe, mudile mugati na kutogwa kwane.
10Ulu muliyilindila mikumo yane, haho mukudilamo mu kutogwa kwane, kitisi nene mwene nayilindilaga mikumo yamwa Vava na ndidilamo mu kutogwa kwakwe. 11Genaya namuwilile inwe, kigele kudeha kwane kuvemo muwinwe na kudeha kwinwe kukwile. 12Gwenugu guli mukumo gwane: inwe mwitogwe hamohene, kitisi namutogilwe inwe. 13Kuduhu umo ali nako kutogwa kuhanya kukila kwenuku ayifumye myuye yakwe kunguno ya vanwani vakwe. 14Inwe muli vanwani vane, ulu mulivezya kitisi ndimulagila. 15Nkavile kumwitana inwe hangi vakumba, kwisi mukumba akamanikizye chenicho gukuye alita; inwe namwitanaga vanwani kunguno namutanizaja inwe gose genayo nigagwa kumwa Vava. 16Inwe mukansogolile nene, sumbwa nene namusogolile inwe, na namutulaga inwe, kigele muje na mufyambye fisumo, na fisumo finwe fidile, kigele chenicho mulamulombe Vava mu lina lyane uyu amupe inwe. 17Yeniyi ndimulagila inwe, Mwitogwe hamohene.
18Ulu liwelelo lilimugaya inwe, mumaniche ati lyandaja kungaya nene. 19Ulu inwe mwavagi va liwelelo, mbe liwelelo lyakitogilwe chalyo chene; alisi kunguno mukavile va liwelelo, sumbwa namusogolile inwe kufuma ku liwelelo, kunguno yeniyi liwelelo lilimugaya inwe. 20Mugwizukile muhayo gwenugo namuwilile inwe, Mukumba akavile muhanya kukila gukuye. 21Ulu vampezaja nene vakumupezya ninwe; ulu vagulindilaga muhayo gwane vakugulindila muhayo gwinwe gwene. Gose genaya vakumwitila inwe kunguno ya lina lyane, kwisi vakamumanikizye uyo wantumizaja nene. 22Ulu mbe nkizile na nkayombile navo mbe vavagi vakavile na vukenaguzi; alisi lelo vakavile na muhayo gwa kwivula kunguno ya vukenaguzi wavo. 23Homwene alingaya nene alimugaya na Vava mwene. 24Ulu mbe nkayivezizye milimo mugati navo hoyene kuduhu ungi wavezaja, mbe vavagi vakavile navo vukenaguzi; alisi lelo vawine na vatugayile, nene na Vava mwene. 25Sisyo muhayo gufikile hogwene gutonilwe mu ngʼhama yavo ati, Vangayaga nene vuduhu nguno. 26Alisi ulu Mugwasya wiza homwene nkumutumizya kufuma kumwa Vava, Roho ya hanayene, homwene alifuma kumwa Vava, mwenuyu akusangilwaho kunguno ya nene; 27na inwe vene muli vasangilwaho, kunguno mwavagi hamohene na nene kufuma mbuki.
Currently Selected:
Yohana 15: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.