YUUKA 31
31
Vafuru Veesongosya Yeema lya Nndumi
(Yuu 35:30–36:1)
1Nndumi Iruva karera na Mose kammbia, 2“Lola, mmbo shilefishya Besaleli mwana wa Uri irina, mmbwe mwana wa Huri wa ufyari lwa Yuda; 3shamwishura mumuyo wa Iruva, wa urango na usha, mwitana sahabu na fesa na minya ya arera, 4shamwishura wiidimi lwesongosya findo fya wo ngata. 5Neerummbwa mawe a uuru eshopa kundo neereiya firi, na mashora a waarya, lwa wo ngata.” 6Na lyingyi lola, mmbo shilensauwa nakae neewe Oholiabu eto, mwana wa Ahisamaki, wa ufyari lwa Dani, neeny shavika urango efo miriminy ya yewo woose vatiri urango, naambo vatani fyoose shilekuvavasya; 7llyo yeema yelyo lyekwanannya, na isanduku lya ukureeki, na kitima kya isaryo ekyo kikee uwe ya vayo na fiiya fyoose fya yeema, 8na mesa na fiiya fya vayo na nri wetira taa na fiiya fya vayo fyoose, na kitara kyefumbirya nrungo, 9na kitara kyekorya firaso na fiiya fya vayo fyoose na birika na kirembo kya vayo, 10na soori shifumi kwa waarya nnu na soori sheele ta Aron we Nkuhani, na soori ta vana vakwe naambo varunde ishora lya ukohani, 11na mafura a yaamba, na ubani lutiri nrungo nsha, a ando yoo eele, shaasa shilekuvavasya nawo niindo vashetanaa.
Nkonu wa Sabato wa Yiimuya
12Nndumi Iruva karera na Mose kammbia, 13“Naasa, rera yewe na vana va Israeli kuvavie, ‘Nkuti musheinndya sabato takwa mashika llo wende yoo nnang'ani yakwa neeni na marika any moose, naambo mumanye yeny ni Nndumi Iruva mwivailyisa yeni.’” 14Naasa mmbo mushetiraa sabato; mashika nsheele kwany, wo nndu yeto asheitefusa, nkyadede nkuti nawaawa, mashika wo nndu asherundaa mashora nkonu yeto, nndu yeto mmbo asheumbutywa kwaasha na vandu vakwe. 15Mashora narundo ando a mikonu irindaru kyeendi nkonu wa mfungare ni sabato ya iimuya deny, ikee sheele kwa Nndumi Iruva, we nndu yeto asherundaa mashora nkonu wa sabato, nkya dede nkuti nawaawa. 16Kimmba niindo, nkuti vana va Israeli vatire sabato, iringa sabato yeyo deny na marika awo moose, ni kyaasa kya llung'anu. 17Ni wende nnang'ani yakwa yeny na vana va Israeli llung'anu, mashika Nndumi Iruva ando a mikonu irindaru aleumba iruveeu na ulana, na nkonu wa mfungare kaimuya.
18Kyeeri Nndumi Iruva alemaa irera na Mose alya ifumbuny lya Sinai, kaninngya maboo yoo avii a ukureeki, maboo avii a mawe, tikeeshireiye ni Iruva.
Currently Selected:
YUUKA 31: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
