YUUKA 30

Kitara Kyeerasya Firaso

(Yuu 37:25-28)

1Neewe songosia kitara kyefumbirya ubani, kukisongosie kya nri wa mshita. 2Waasha lwa vayo sentimita makumi arindaru na ivari sentimita makumi arindaru, yeenda uwe sentimita iyana na makumi avii efo mbai kuve ngata imwi nayo. 3Neewe mmbo kusheisikyaa na saabu, neefo mbai kuivike saabu kwiringitye. 4Kuisongosye rashi ivii ta saabu yoo kwasi ya vayo na yoo mbariny ta vayo kutisongosye, kuve ando eevika maako a iyipoo, 5Na maako yoo asongosye na nri wa mshita kuisikye na saabu shisha. 6Neewe mmbo kusheivikaa mbee ya soori ilya ikee kufii na isanduku lyilya lya ukureekyi yoo mbee ya kitima kya isarya kikee uwe ya ukureekyi yoo ando nshekwanannya neewe. 7Na Aron ashekoraa ubani yoo uwe ya vayo, wo nkonu ngama kyeeri asheataa taa eto mmbo ashefwaamisaa. 8Na kyeeri Aron asheataa taa yeto nkwaany mmbo ashefwaamisaa, uve ni nrungo wa kyeeri kyoose mbee ya Nndumi Iruva marika any moose. 9Mulafumbire-fo nrungo mwiny, nta kiraso kyekora na muro-fo, nta kiraso kya nswa-fo, nta mulaletye-u kiraso kyeena-fo. 10Nawe, Aron mmbo ashevikaa-u usandi yoo mbai lyimwi wo mwaka, kwa samu ya kiraso kya ulyamari iwona usando, wo mwaka nashevika usandi, kwa marika any moose efyo ni fyeele nnu kwa Nndumi Iruva.

Usanu lwa Yeema lya Nndumi

11Nndumi Iruva karera na Mose kammbia, 12Kyeeri kusheekenaa vana va Israeli shaasa yeekyena lyawo lyivaa, llyo wo nndu asheningyaa Nndumi Iruva ukari kimaruma kya nrima wakwe, kyeeri kushevekenaa, naambo kulashekaa-fo ndwari kyeeri kushevekenaa, 13na ekyo vasheningyaa nkyo ekyi, wo nndu asheiraa mbee ya valya vammekenwa mmbo asheningyaa shekeli ya iimya shekeli ya ando eele, (shekeli ni gera 20), kyenga kya nnang'ani kya shekeli ni kiraso kya Nndumi Iruva. 14Wo nndu ashiraa yoo kwa valya vammekenwa kupookya yeto atiri myaaka makumi avii, ao mmwasi mmbo asheningyaa kiraso kya Nndumi Iruva. 15Masimba nalaende mmwasi-fo, nta vakiva valashewuya numa-fo, yoo kyengeny ekyo kya shekelyi, kiraso ekyo kya Nndumi Iruva naambo muvike usandi kwa mirima yaany. 16Neewe mmbo kushewaryaa fesa eto kiraso kya usando uka maakony a vana va Israeli, neetitira tive ta urundi lwa yeema elyo yeele, naambo tive teekummbwa kwa vana va Israeli mbee ya Nndumi Iruva, naambo muvike nsando kimaruma kya mirima yaany.

Ibenselyi lya Arera

17Nndumi Iruva karera na Mose kammbia, 18“Songosia na birika ya Arera na kirembo kya vayo kive kya arera, ive yekusangya, neewe mmbo kusheivikaa yoo nnang'ani kavii ya yeema yeele na kitara kyerasya, neewe vikafo mura. 19Na Aron na vana vakwe mmbo vashesangyaa-fo maako awo na marende, 20kulaore vammanga efo yeemeny elyo yeele, vakusangye mureny naambo valashefwa, ao kyeeri vasheserikyaa kitara kyeraasya varundyeu, vashekorya Nndumi Iruva kiraso kyemamita na muro; 21naasany mmbo vashesangyaa maako awo na marende awo, naambo valafwe, na irero elyi mmbo lyivaa ivavaso kwawo llung'anu kwakwe we na kwa vana vawo woose numa yaawo.”

Mafura a Yaamba

22Nndumi Iruva kawuya kavia-se Mose, 23Ruuya mafura afwaamaa nisha, maane shivisi-shekeli mayana araanu, na mdalasini utiri kifwaamu kisha kyenga kya kyeeso ekyo nto shekeli mayana avii na makumi araanu na kane shekeli mayana avii na makumi araanu, 24na kida shekeli mayana araanu, kwa iooya shekeli ya ando eele, na mafura, a zeituni fibaba firaanu, 25neewe kuvike mafura a yaamba meele mafura mesha a mwisongosia mafura akee mwaarya, nang'u asheva mafura meele a yaamba, 26Neewe mmbo kusheambaa yeema elyo yeele mafura yoo, na isanduku elyo lya ukureeki. 27Na mesa yeyo na fiiya fya vayo fyoose, na kitara ekyo kya ifumbirya kifwaamu kisha, 28na kitara kyekorya firaso, na fiiya fya vayo fyoose na birika yeyo ya mura na kirembo kya vayo, 29mmbo kusheremutaa findo efyo naambo five fyeele deny na kindo kyoose kipaana findo efyo nakyo mmbo kishevaa kyeele, 30Neewe mmbo kushaambaa Aron na vana vakwe mafura, neevailyisa, naambo vashirunndye ishoreny lya ukohani. 31Neewe mmbo kureraa na vana va Israeli kuvavie, “Yaa ng'u mafura meele a yaamba kimaruma kyakwa yeny na kwa vana vakwa numa yakwa.” 32Nnyaletywa efo mwiliny wa nndu-fo, nta mulasongosie mafura engyi sha yaa-fo, yaa mmbo akee meele, na kwany yeni mmbo ashevaa meele, 33Nndu yeto ashesongosiaa mafura sha yaa ao nndu moose yeto asheambaa nndu muny mafura yaa, nndu yeto mmbo asheumbutywa kwaaasha na vandu vakwe.

Ubani

34Nndumi Iruva kavia Mose, iboo mafura mesha afwaamaa, ng'u natafi na shekeleti, na kelbena, ni fyelonga mafura fisha na ubani usha, findo efyo fyoose five fya kyeeso kyimwi, 35neewe kusongosia, uvumba lwa findo efyo, kifwaamu kisha kya mwisongosia mafura, mesha ankuuya nisha, akee meele. 36Neewe engyi mmbo kusheakapa deny, na yaavika mbee ya ukureeki efo yeemeny lyekwanannya, yoo nshekwanannyaa neewe, nawo mmbo ashevaa meele deny. 37Na ubani elo mushesongosiaa, mmushesongosiaa lyingyi sha elo kwa mbony tany-fo, mmbo lushevaa weele kwa Nndumi Iruva. 38Nndu moose ashesongosyaa sheelo, naambo nalufwaamye, nndu yeto mmbo asheumbutwaa efo vanduny vakwe.

Currently Selected:

YUUKA 30: MAS2

Highlight

Copy