YUUKA 14
14
Iruuka Yeeve ya Shamu
1Nndumi Iruva karera na Mose, kammbia, 2“Via vana va Israeli vawuye vashemannya ulale mbee ya Pi-hahiroti, yoo nnang'ani ya Migdoli na yeeve, taari ya Baal-sefoni, mukae kufii na yeeve, 3Nawe Farao kyeeri amukummbwa mmbo ashambaa, ‘Mmbo vamfulukkywa valamanyi shia efo kasa.’” 4Neeny nsheallwaa ngoo yakwe ive shuumu, nawe nashevavingya, neeny nshekuwonisyaa nnduma yoo kwa Farao, na kwa itorito vakwe, nawo Vamisri woose llyo vashemanyaa dede yeny ni Nndumi Iruva. Naasa vakatana shasa valevavasywa. 5Naasa mangyi wa Misri kashevia vandu valya vammaa irisha, naasa nrima wa Farao na mirima ya varundi vakwe ikakunda ikapana na vandu, yewo vakaamba, “A ni utondo-kyi elu luletana, lukalekeya vana va Israeli veende nta valakilurunndyaa-se?” 6Farao kadeesya ikari lyakwe, kaipoo na vandu vakwe, 7na lyingyi kasauwa kaipoo mitika a fira mayana arindaru mesha, na mitika a fira moose a Misri na vashilyi woose vakasaama-fo. 8Nndumi Iruva kaallwa ngoo ya Farao wa Misri nawe kavinngya vana va Israeli mashika vana va Israeli mmbo valeuka-fo na ntiri. 9Vamisri vakavasora numa, frasi toose na mitika a Farao, na itorito vasaammye frasi, na nsemu wa itorito, nawe vakashevakooya alya vekai mbai ya yeeve ilya, yoo kufii na Pi-hahiroti, kufii na Baal-sefoni.
10Kyeeri Farao alesha kufii, vana va Israeli vaipoo miso indi vakavalollya veeshaa numa yaawo, vakairyaa nnu, vana va Israeli vakatereva Nndumi Iruva. 11Vakavia Mose, “A ndesa mmbo kulewiika-fo fifu kulya Misri kwatana kwalweende lushesiiya kunu kasa? Nkyiki elyi kulelutannya indo, kwaluuta Misri? 12A nshi lulekuvia, ‘Lukureeye lurunndye Vamisri? Mashika nkyeni irunndya Vamisri ngota elyi lushefiyaa kunu kasa.’” 13Mose kavia vandu, “Nta mulairyee-fo, kaaryen-te, mushelollyaa ukiro lwa Nndumi Iruva ashemooraa inu, mashika Vamisri yewo muvalollye inu mmushevalollyaa-se-fo fika llung'anu. 14Ni Nndumi Iruva ashemukapannyaa yeni, neeni mumalallye sau.”
15Nndumi Iruva kavia Mose, “Ni inda kukeshiiya yeny?” Via vana va Israeli vaende na mbee. 16Neewe iboo mbiiri yafo, koorrwe woko lwafo uwe ya yeeve yeyo nayo isheraukaa, nawo vana va Israeli vaire ando kwaarutu efo yeeveny. 17Lolate, yeny nsheallwaa-se ngoo ta Vamisri tive shuumu, nawo vashemuvinngyaa, neeny nshekuwonisyaa nnduma kwa Farao na kwa itorito vakwe woose, na kwa mitika akwe na kwa yewo vasaamye frasi. 18Nawo vashemanyaa yeny ni Nndumi Iruva, kyeeri ekyo nshekuwonisyaa nnduma uwe ya Farao na kwa mitika akwe a fira na frasi eto takwe.
19Naasa Nsu wa Iruva yeto ekeesongoya ironda lya vana va Israeli, kauka-u kawuya yoo numa yaawo, na ngo ilya ya ifishi ikauka yoo mbee yaawo, ikasalala numa yaawo, 20ikashesalala yoo nnang'ani kavii ya itorito va Misri na ironda lya Vaisraeli, nan'gu kukaa-u ifishi lyilya na ireema, kyeendi lyikavaa saa kyeeri kya kyio, nawo kyio kyoose mbaleidima isha kufii na vana va Israeli-fo. 21Mose kaorrwa woko lwakwe uwe ya yeeve, Nndumi Iruva kaviira yeeve numa yiivirwaa ni uraato lwa finya luleuka taari ya ngameny, kyio kyoose, mura ukarauka kukava-u ando kuumu. 22Vana va Israeli vakeenda efo yeeveny ando oomu, mura wa yeeve mmbo uleva sha isimamba taari yaawo ya woko umuso na woko usha. 23Nawo, Vamisri vakavavinngya, vakaanga efo yeeveny, frasi toose ta Farao na mitika akwe, na vesaama frasi, vakwe. 24Naasa, elyi ikamba lya nraasi, Nndumi Iruva kaimaiya ironda lyilya lya Vamisri kulya ngony ilya ya muro, na ya ifishi, kasaveesa ironda elyo lya Vamisri. 25Katerrwa fireto fya mitika awo, fikafuruka-si, naasa Vamisri vakaamba, “Lurishye Vaisraeli, mashika Nndumi Iruva mmbo akeevakapannya, nalukape yese.”
26Nndumi Iruva kavia Mose, “Orrwa woko lwafo lyingyi uwe ya yeeve, naambo mura uwuye umire Vamisri, na mitika awo, na frasi tawo, 27Mose kaorrwa woko lwakwe uwe ya yeeve, na kyeeri kulekkya, yeeve ilya ikawuya na finya, Vamisri vakamatuka, na Nndumi Iruva, kavasikkya efo mureny yeeveny. 28Mura ulya ukawuya ukamira mitika na vesaama frasi va vayo, na ironda lyoose lya Farao lilya lyemmaanga yeveny ilya, kulasae-u nta nndu umwi. 29Kyeendi wo Vana va Israeli vakakweenngya efo yeeveny ando aarutu na mura wa yeeve ukava ni isimamba taari ya woko usha na taari ya woko umuso. 30Nkonu eto niindo Nndumi Iruva alekira vana va Israeli kavaauwa maakony a Vamisri, Vaisraeli vakalollya Vamisri efo mbai ya mura vammaa ifwa, 31Israeli vakalollya ishora elyo iniini aletannya Vamisri, naasa vandu yewo vakainndya, naikusirya Nndumi Iruva, ando amwi na ishinga lyakwe we Mose.”
Currently Selected:
YUUKA 14: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
