2 VAKORINTO 7
7
1Naasany vakunde vakwa, kimmba lutiri fyaasa yefyo, lukwiilyise luveni lulakani na kirinda kyoose kya mwiili na nrima, lwishinutyaa weele lweru lushindyaa Iruva.
Nsia va Paulo
2Lluniingeny mwaanya miriminy yaany. Llulensoka nndu kindo-fo, nta ikasheesa nndu-fo, nta itafura nndu kindo-fo. 3Nta nshi shaamba indo naambo shoore yeni mmbo mukee varekwa-fo mashika shilesongwa yaamba sheelyi yeni mmbo mukee miriminy yeeru fika ifwa ando amwi, ao ikaa ando amwi. 4Mmbo shitiri ukaari uniini mbee yaany, mmbo shitirwa ni nsia deny kimaruma kyany. Mmbo shiishwe nsia, kunu ngatareny teru mmbo shitiri ifura lyiilanyi kyeeso. 5Mashika llya lulemaa ifika Makedonia miili yeru nnyilesennywa-fo, mmbo luleatarika taari toose, kipoo kukaa-fo fira, na kimmba weerei. 6Kyaindi Iruva yeto mwiiviirya vafwafwa muu, mmbo aleluvirya muu kyeeri lulesheywa ni Tito. 7Nta nshi elyi alesha-da-fo kyaindi ni ando amwi na iviiryo muu lyakwe efo kwany, kaluvia mbony ta nsia wany, na fiiyo fyany, na usaari lwany kimaruma kyakwa kutani shaengerywa ifura. 8Mashika, na kyikava mmbo shilemuvavisa na barrwa ilya nshitinnywa-fo, naakwa shasara, mmbo shilollye barrwa ilya mmbo ilemuvavisa lyo kwa kirambo kyaangu-da. 9Lyo ulaalu shitiri ifura nshi mashika elyi mulevavywa-fo, kyaindi mmashika elyi mulevavyo kutani mwakurya. Mashika mmbo mulevavyo sha vandu va Iruva, naambo mulashetura pule na shia shoose. 10Mashika ivavyo lyikee lya ngata ya Iruva mmbo lyeendee ikurya yelyo lyishendee ukiro lulaifo iting'wa, kyaindi ivaviywa lya kiulana mmbo lyeende ufu. 11Mashika-le ivaviswa elyo yeni kimaruma kya Iruva mmbo kuleende usasari nnang'ani yaany, yee neekutatarye, neesua, na usau, yee neelanga, yee neekuuta, yee neetaiya kiduva! Mmbo muleora sheelyi mmbo mukee vesha na ngata shoose kya mbony yei. 12Naasany na kyikava shilemureiya barrwa ilya, nshileireiya kyeendwa ni yeto aletana kikasha-fo, nta kya yeto aletannywa kikasha-fo, kyaindi nnaambo ikuuta lyany kimaruma kyeru lyikooye ilollywa paa mbee ya Iruva. 13Nkyo mmbo luleviirywa muu. Na lyingyi elyi luleviirywa muu mmbo lulefura kiilanyi kyeeso kimaruma kya ifura lyetiri Tito, mashika nrima wakwe mmbo ulemuriswa ni yeni woose. 14Mashika kwakooya shilekurumisha mbee yakwe kya kindo kyoose kimaruma kyany, nshilesuka-fo, mashika kimmba lulemuvia findo fyoose shaasa fikai, niindo-da neerumisha lyeru kimaruma kya Tito ni lya dede. 15Na ikunda lyakwe kwany mmbo lyileng'ana nnu kyeeri akumbwaa wiindi lwany yeni woose, shaasa mulembwarya na usau na wiindi uniini. 16Mmbo shitirwa ni nsia nnu mashika kya findo fyoose mmbo shimuvikye nsia.
Currently Selected:
2 VAKORINTO 7: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
