1 VAKORINTO 15
15
Iruka lya Kristo
1Naasany vanavama mmbo shikundye imuvia mbony ta Nrumi ya Nsia ilya shilemwoongoya. Nnyo yeyo muleiwarya na mfo muselelyi. 2Mmbo mukeekirwa kyeendwa nnyo; kwankooya muletira nisha marero alya shilemoongoya, na kwankooya kulaore mulekusiryau ruu. 3Mashika yeny llya kiipooka mmbo shilemufitya filya yeny shimuni shilewarya, kyeyaamba Kristo mmbo alefwa kimaruma kya ulyamari lweru, kikwaani na mbony shireiye. 4Na lyingyi karikwa; na lyingyi sheelyi mmbo aleruka nkonu wa kararu kyikwaani na mbony shireiye.
5Na sheelyi mmbo alekoora na Kefa na valya ikumi na vavii. 6Numa kakoora na vakristo mmwasi ya mayana araanu vekee ando amwi, nnang'ani yaawo vaiyo fika inu na maata valellala. 7Numa kakoora na Yakobo; numa na vakiloshony woose. 8Na numa ya vandu woose, kakoora neeny, shikee sha nndu alewonika kyeeri kilakee kyakwe. 9Mmashika elyi yeny shikee n-du shanyiyya vakiloshyony woose, shilesumani nta ivaangwa nrumi, mashika llya shilesaveesa siri ya Iruva. 10Lyo kyeendwa ni isarya lya Iruva mmbo shikee shaasa shikai inu; na isarya lyakwe yelyo lyileshisheya llyileva ruu-fo, mashika elyi shilekutakura nnu irunda shavailannya woose. Lyo nta nshi yeny-fo, kyaindi ni isarya lya Iruva lyishikaaye. 11Naasany kwakooya ni yeny ao valya, niindo lukeevambisa irero. Na niindo mulekusirya-u.
Iruka lya Kristo
12Naasa kwakooya Kristo akeevambiswa sheelyi aleruka auka kwa vafu, a niindaany elyi maata va efo kwany vashambaa nkwiifo iruka lya vafu? 13Lyo kwankooya kulaifo iruka lya vafu na Kristo nawe nnyalerukaa-fo. 14Na lyingyi kwankooya Kristo kuloore aleruka naasa, ivambisa lyeru ni ruu na kyikusiryo kyeru nruu. 15Yee, neese mmbo lufwanani na vakureeki va Iruva va wongo, mashika mmbo lulekureekya Iruva wongo sheelyi mmbo aleruta Kristo, nawe nnyalenduta-fo, kwankooya vafu valarutwaa. 16Mashika kwankooya vafu valarutwaa, na Kristo nawe nnyaleruka-fo. 17Na kwankooya kuloore Kristo aleruka, kikusryo kyany nruu, mmbo muvesindye efo ulyamariny fika ulaalu. 18Na yewo valellala vekusirye Kristo mmbo valereka. 19Mashika kwakooya mmbo lwakusirya Kristo yaa ulaniny kweni naasa, yese mmbo lukee vakiva lukairya vandu woose.
20Kyaindi ulaalu Kristo annduka auka kwa vafu, kava wa mbee wa valya valemfwa. 21Mashika shaasa ufu luleendwa ni nndu, niindo-da na iruka lya vafu mmbo lyileendwa ni nndu. 22Mashika kwakooya woose mmbo vakeefwa kyeendwa ni Adamu, niindo-da woose vakooya muu kyeendwa ni Kristo. 23Lyo wo umwi ando akwe. Mwiivirya muu ni Kristo; numa valya vakee va Kristo elyi ashaa. 24Yoo nng'u mafurummyony, kyeeri Iruva Nde ashenrambikyaa umangyi lwakwe, kyeeri asheallwaa ngyumangyi toose na ushilyi loose luve ruu. 25Mashika nkuti nashillye fyoose, natani avika vakiduva vakwe woose yoo si ya marende akwe. 26Nkiduva wa ifurummya imamitwaa ni ufu. 27Mashika, mmbo alevika findo fyoose yoo si ya marende akwe. Kyaindi kyeeri asheambaa, fyoose fyammaa yaarwa si, yeto, alemmbikya fyoose yoo si lyo nnyakiyo-fo. 28Naasa, findo fyoose fikammaa ivikwa yoo si yakwe, llyony na Mwana muni ashevaa si ya yeto alenrammbikya findo fyoose, naambo Iruva nave mmbwe fyoose nnang'ani ya fyoose.
29A ndesa yewo vabatise kimaruma kya vafu mmbo vashetanaa inda? Kwakooya vafu valarutwaa tusu, kyamaa kyi ibatiswa kimaruma kyawo? 30Neese nkyikyi elyi lukee nrengeny kyeeri kyoose. 31Yee, vanavama, nnduma yeu wakwa kimaruma kyany kwi Kristo Yesu, Nndumi weeru, mmbo nkeefwa wo nkonu. 32Kwankooya shikee na mwiili mmbo shilekapana na mafisi a vandu kulya Efeso, mmbusha-kyi shiwonisaa-u? Vafu vakanra valarutwaa, naasa lulyeny neena, mashika ndesi mmbo lweenda ifwa. 33Mulalembike, usaare ukasha mmbo lulyamaraa ngaa shisha. 34Rundeny na urango shaasa kisumani, mulatanaa ulyamari, mashika vengyi mmbeshi Iruva-fo. Mmbo sharera indo naambo shimusute.
Mwiili mwiiya
35Kulakooye nndu avesaa, A niinda vafu varutwaa? Na mmbo varukaa na mwiili wa ngata-kyi? 36Ewe itondo! Yekyo kwavaaya nkirukaa kulaore kyafwa mbele-fo. 37Na yekyo kwavaaya, nkwavaaya kilya kisheshaa-fo mmbeu sheni, ikava ya nganu ao ingyi. 38Kyaindi Iruva mmbo aitunndwa shaasa akundye muni, na wo mbeu ngata ya vayo. 39Nyama toose nshi nyama imwi-fo, ingyi ni-nndu, ingyi ni ya ifisi, ingyi nnya ndeye, neengyi nnya ikunga. 40Na lyingyi kwiifo fyuumbe fya iruveeu, kukavekaa-fo fyuumbe fya ulaniny, kyaindi itumbe lya fya iruveeu ni ngata ingyi deny, kweenanisa na yei ya ulana. 41Kwiifo itumbe lya nkyeere na itumbe lya mwiiri, na itumbe lyingyise llya nyinyiri. Mashika kuveefo kilakaniso kya itumbe lya nyinyiri na nyinyiri. 42Niindo-da na iruka lya vafu lyikai. Mmbo urikwaa mwiili na ulyamarikaa, ukarutwaa ulalyamarika-se. 43Mmbo urikwaa na sony, ukarutwaa na itumbe. Mmbo urikwaa ufwafwa, ukarutwa na finya. 44Mmbo urikwaa mwiili wa ngata ilya ya mbee ukarutwa ukee mwili wa ngata ya Mumuyo. Kwankooya wiifo mwiili wa ngata ya mbee naako ni wa ngata ya mumuyo mmbo wiifo-da. 45Niindi kyikee kyireiye, Nndu wa mbee we Adamu aleva nndu atiri muu. Adamu weefurumya ni mumuyo mwiruta. 46Kyaindi mbushesongoyaa ulya wa mumuyo-fo, ni ulya wa ngata ilya ya mbee, numa ukasha ulya wa mumuyo. 47Nndu wa mbee ni wa ulaniny, mmbwa uteeri. Nndu wa kavii mmbo ookye iruveeu. 48Shaasa yeto wa uteeri akai niindo yewo va uteeri vakai. 49Na shaasa yese luleipoo fwana ya yeto wa uteeri, niindo-da neese mmbo lusheipoo fwana ya yeto wa iruveeu.
50Vanavama kindo nkeamba ni ekyi, sheelyi mwiili na samu mfishidimaa iwona umangyi lwa Iruva-fo. Ao kilya kilyamarikaa nkishiidimaa iwona kilya kilalyamarikaa-fo. 51Loleny-te mmbo nkunndye imuvia kyama kimwi. Llulalaa loose-fo, lyo loose mmbo lushealashikaa. 52Sha lyimwi nsi, sha ikafya miso, kyeeri kya iranda lyefurummya; mashika lyo iranda lyishereraa, llyo vafu varutwa, valakilyamarikaa. Neese mmbo lushealashikaa. 53Mashika nkuti yeu wa ilyamarika urae ira ulalyamarika, na yeu wa ifwa uraa ira ulafwa. 54Naasany elyi yeu weelyamarika usheraa ira ulalyamarika, na yeu weefwa usheraa ira ulafwa, llyo irero llya lyikeeireiye lyisheinukyaa. Ufu lwammirwa ni uvingyi. 55A ivinga lyafo yewe ufu nkwi lyikai? A ivava lyafo yewe ufu nkwi lyikai? 56Ivava lya ufu ni ulyamari, na finya ya ulyamari ni uvavaso. 57Lyo luniinge nnu Iruva kyaanu yeto aluniinga ivinga kyeendwa ni Nndumi weeru Yesu Kristo. 58Naasany vanavama vakwa vakunde, vangeny iirikyony, nta mulasingesinge-fo, mwengere nnu irunda ishora lya Nndumi mikonu myooose, mashika mwiishi sheelyi ngatara yaany kwi Nndumi nshi ruu-fo.
Currently Selected:
1 VAKORINTO 15: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
