1 VAKORINTO 12

Simbo ta Mumuyo Mweele

1Nyira vanavama vakwa, nshikundye mure mulamannya kya simbo yeto ta Mumuyo-fo. 2Mmbo muveishi muveni llya mwekee vandu va masanga, shaasa muleva veraawa efo kwa mafwanu yoo nalashidimaa irera. 3Nkyo shamuviany, nkwiifo nndu ashidimaa irera ekaywa ni Mumuyo wa Iruva naambe, Yesu ni nndenge, nta nndu nnyashiidimaa yaamba, Yesu ni Nndumi, kuloore akaywa ni Mumuyo Mweele-fo.

4Naasany simbo titiri kilasha; kyaindi Mumuyo ni we muni. 5Lyingyi ifurukana lyitiri kilasha, na Nndumi lyo ni yeto muni. 6Kukavekaa-fo na kilasha kya mirundye mashora, kyaindi Iruva niwe yeto muni arunda mashora nnang'ani ya woose. 7Lyo wo umwi mmbo akee nninge urambuyo lwa Mumuyo kya yeekyana. 8Mashika kyeendwa Mmumuyo nndu umwi mmbo aniingwa irero lya waarya, na ungyi ni irero lya urango shaasa Mumuyo yeto akukundya muni. 9Ungyi kasimbwa kyikusiryo ni Mumuyo yeto mweni; na simbo yeeshisa aniingwa ni Mumuyo yeto mweni. 10Na ungyi ni mashora a ngyende; na ungyi ni yaawuya fisuku, na ungyi ni yaavanisa mimuyo, ungyi kasimbwa ngata ta fishomu; na ungyi ni itambashwa fishomu. 11Kyaindi mashora yaa moose ni Mumuyo yeto umwi nsi, eshaviaa o nndu umwi umwi shaasa akukundya.

Filungo fiingi, lyo mwiili umwi

12Mashika kimwi na shaasa mwiili ukee umwi ukavetira filungo fiingyi, na filungo fyavayo fikaveva fiingyi, ni mwiili umwi lyo, niindo na Kristo akai. 13Mashika yese loose mmbo lulebatisyo Mumuyo umwi lukava mwiili umwi, kwakooya lukee Vayuda ao Vagriki, kwakooya lukee mashinga ao valeke; yese loose mmbo luleritwa Mumuyo yeto umwi. 14Mashika mwiili nshi ilungo lyimwi-fo, mmengyi. 15Kwakooya urende lwaamba, kimmba shilakee woko yeny nshi wa mwiili-fo, a mmbo luraa luleva lwa mwiili na kimaruma ekyo? 16Na kuri kaambe, kimmba shilakee iriso, yeny nshi wa mwiili-fo, mmbo kuri kiraa kileva kya mwiili kimmba kya ekyo? 17Kukooye mwiili moose wevaa iriso, mmbo lweshitaa inda? Ao kukooye moose wevaa kuri, mmbo lweefwamyaa inda? 18Nkyo kimaruma Iruva evika-fo fyuungo fyoose wo kimwi mwiiliny shaasa alekunda. 19Mashika lyo kukooye fyoose fyekee kyuungo kimwi-nsi, mwiili mmbo wevaa inda? 20Lyo ulaalu fyuungo mfiingyi na mwiili ukava umwi. 21Nkyo iriso llyishidimaa ivia woko, nshikutinnyo yewe-fo, nta nrwe mmbushidimaa ivia marende, nshimutinnyo yeni-fo. 22Na mmwasiny deny fyuungo filya fya mwiili filya filollyo mfifwafwa mmwasi mfyo fitiri mashora kilanya. 23Na fyuungo filya filatiri nnu nnduma, fyo mmbo lwafininga wiindi mmwasi, na filya fikee sheelyi mfitiri usha, mfyo fitiri usha deny lukairya. 24Mashika fyuungo fyeru filya fitiri usha mfitiri nnu mashora-fo, kyaindi Iruva mmbo alungye mwiili ando amwi, kyuungo kyilya kyikee kyaanguye kakyiniinga wiindi mmwasi; 25naambo kulakae-fo urauko mwiiliny, naambo fyuungo fyeekyani wo kimwi na urooye. 26Kyuungo kimwi kwakooya kyavavio, na fingyi fyoose mmbo fivavioo nakyo. Na kilya kyarumishwa, efyo fingyi fyoose mmbo fifuraa ando amwi nakyo. 27Naasany yeni mmbo mukee mwiili wa Kristo, na filungo wo kimwi ando a vayo.

28Na Iruva mmbo avikye varundi kunu siriny, va mbee ni varumi, vakavii ni veawuya fisuku, va kararu ni veelosha, vengyi ni ngyende, vengyi ni simbo teeshiisa vandu, vengyi va yeekyana, na uteteri na ngata ta fishomu. 29A-woose ni varumi? Woose mbeawuya fisuku? Woose ni veelosha? 30Woose mberera fishomu fyeny? Woose mmbetambashwa fishomu? 31Langeny nnu simbo yeto shisongoru. Naakwa niindo mmbo shamoora shia shisha.

Currently Selected:

1 VAKORINTO 12: MAS2

Highlight

Copy