Oruhoya 6
6
Abakazi
1Omugonzibwa wawe yagya nkahai,
iwe omurungi muno kukira abakazi bona?
Omugonzibwa wawe yayolekera nkahai
tumukuhigise?
Omwisiki
2Omugonzibwa wange yasongoka omu busitaniye,
omu masima g'ebirungo,
kulisa obuhyobwe omu busitanize
n'okutongora lilia.
3Inye ndi w'omugonzibwa wange,
n'omugonzibwa wange, wange;
nalisa obuhyobwe omuli lilia.
Oruhoya rwa katanu
Omwisiki
4Mugonzibwa wange, iwe oli murungi nka Tirisa,
oli murungi nka Yerusalemu,
notinisa nk'eihe likwete ebendera.
5Onyihyeho amaisho gawe,
ahakuba niganyita kubi.
Eishoke lyawe ni nk'obuhyo bw'embuzi,
obulikusongoka amabanga ga Gileadi.
6Amaino gawe ni nk'obuhyo bw'entaama
ezilikuruga omu kyogo.
Zona zitera babili babili,
mara taliho n'emoi etoroga.
7Omu kihundwi kyawe,
amatama gawe ni nk'eikomamanga lishaliirwe omugati.
8Haliho abago nkaga n'ensholeke kinana,
n'abaisiki abataina rubara.
9Akaiba kange, owange agobeleire, omoi wenkai,
omwana omoi ahali nyina,
kirungo ky'ayamuzaire.
Abaisiki kabamuboine bamweta muberwa,
abago n'ensholeke kwakwo bamuhaisiliza.
10Ogu n'ohai alikushusha emambya,
murungi nk'okwezi, nayengelera nk'eizoba,
natinisa nk'eihe likwete ebendera?
11Nkasongoka omu ndimiro y'ebinyobwa,
naleba enyakyo omu ruhanga,
kubona nk'ezabibu zahangire,
emikomamanga nka yayakize.
12Kanabaire ntakemanyire,
amashemelerwa gange ganta omu gali,
aha rubaju rw'omurangira wange.
Abakazi
13Garuka, garuka, iwe Mushulami,
garuka, garuka, tukulebeho.
Omwisiki
Kubaki mutangalire Omushulami,
oti mayaga agalikuzanirwa amahe gabili.
Currently Selected:
Oruhoya 6: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.