Sira 37
37
Abatahi batali ba mazima
1Buli mutahi agamba ati,
“Nanye ndi mutahi wawe;”
kyonkai abatahi abandi baba batahi eibara kushai.
2Tibuba bushasi obw'okwita kubona mutahi wawe
mara munywanyi wawe nahinduka mubisha?
3Iwe kitekelezo kigonza kukora kubi iwe,
okatonderwaki ensi kugimazaho obugobya?
4Abatahi b'omuntu abandi bashemelerwa
kubona munywanyi wabo alige,
kyonkai biro ebyo aba ali omu matangwa bamuhinduka.
5Batahi b'omuntu abandi bajuna omuntu
kugira ekyo bamulyaho,
mara kahabaho endashana bakwata engabo kumurashanira.
6Munywanyi wawe otalimwebwa akakuruga aha mutima,
kandi otalitunga okamunaga.
Obwegendeleza omu kuhanulirwa
7Buli omo ahanulira banu asiima entegekaye,
kyonkai abandi bahanulira banu oku nibagarura owabo.
8Ow'okukuhanulira omwekenge,
obanze omanye nahigaki;
haliho orwo yakukutegekera nagwera rubaju orwe.
Omwelinde atakunaga mu mutego.
9Yakushobora kukugambira ati, “Okwo wagira nikwo.”
Ahanyuma ayeshungushura alebire agarakubaho.
10Otalyehanuza aha muntu alikukuleba
aina ako alikukulengamu;
kandi abalikukuchubira otalibatira nama yawe.
11Otalyehanuza aha mukazi kukutegekera
aha muntu ow'alikugonza kukira,
anga ekitini kukyehanuza ho aha ndashana.
Omuntunzi otalimwehanuza aha kuhingishanyia bintu,
anga omuguzi kumwehanuza aha migulize.
Omukama otalimwehanuza aha misiimire,
anga ataganyira kumwehanuza aha kugilira banu kisha.
Omunafu otalimwehanuza aha mulimo gwona gwona,
anga omuntu ayamara omwaka gumoi ainikirwe aha mulimo
kumwehanuzaho okwo wakumara omulimo,
anga omukozi omunafu kumwehanuza aha mulimo guhango.
Abantu nk'aba batalikuhanulira aha kigambo kyona kyona
okabatega matwi.
12Shana buli kanya ogume aha muntu atina Ruhanga,
ow'olikumanya akwata emihango,
aina omutima nk'ogwawe,
owo wakugira okwo waba akakushasira.
13Kandi ogume aha ky'omutima gwawe gwakutegekera,
kuba taliho wa kuba mwesigwa kukushaga.
14Enshonga orundi omutima gw'omuntu gumuhaburage
kukira abalinzi mushanju bashuntamire eiguru
omu munara gw'okulindiramu.
15Ahali ebyo byona taho n'okushaba Rukirabyona,
akuhabulire omu muhanda gw'amazima.
Obumanyi bw'amazima n'obutali bwa mazima
16Buli mulimo kwija kugubanza, obanza otekeleza,
kandi buli kwija kugira ekyo wakora obanza oyehanuza.
17Ebitekelezo bibandiza omu mutima
18nimwo biruga bili by'engeli inai,
ebirungi n'ebibi, oburora n'orufu;
kandi ekiikara kibigeleire kiba rulimi.
19Omuntu nashobora kuba mugezi muno
mara akegesa bangi,
kyonkai wenene aburwa eky'okwegasira.
20Omubuya omu kugamba orundi bamutamwa,
ahanyuma aitwa enjara,
21aha rw'okuba Omukama ashangwa atamusingiire,
enshonga aba ataina bumanyi bwona bwona.
22Omuntu yakuba mumanyi,
obumanyibwe bumugasha wenene wenkai,
mara ayolekya okwo eby'alikugamba aina amazima nabyo.
23Omumanyi kwo ayegesa abantube,
mara bamanyage okwo eby'alikubegesa by'amazima.
24Omumanyi asiimwa muno,
n'abamubona bona bamweta muberwa.
25Oburora bw'omuntu bumanyikira
aha biro by'amara omu nsi,
kyonkai ebiro bya Isiraeli ebyo tibigira rubara.
26Omumanyi abantube bamwesigira kimoi,
n'eibaralye ligumaho ebiro byona.
Okwebalira omu kulya
27Mwana wange, orwo okyarora oyelebe;
eky'olikubona kitalikukugenderage otakilya.
28Ahakuba ti bintu byona kugenderage buli muntu,
kandi ti bantu bona kugenderwage buli kantu.
29Kitaba kyakulya ekyanura kyona kukilya otakihagire,
kandi otalilyaguzibwa.
30Enshonga okulya okashagulirana
kurugwamu endwara,
kandi omururu gurugwamu okubimbilirwa.
31Omururu guraisire bangi,
kyonkai alenga okwo alikushobora kugwelinda arama.
Currently Selected:
Sira 37: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.