Sira 33
33
1Omuntu atina Ruhanga taligubwaho kabi,
araikaraga namwihya omu biyengo.
2Omumanyi tatamwa Mateka,
kandi engobya elikwezora negagonza,
eshusha obwato omu mayengo.
3Omushobokerwa akwata Amateka,
agesiga okwo omuntu araguza ayesiga enshoga.
4Eby'olija kugamba obanze obitekateke
nirwo balikuhuliliza;
kandi k'oligya kuhorora empororo
nayo obanze ogitekateke.
5Omutima gw'omufera gushusha egurudumu y'egali,
ebitekelezobye bihinduka nk'eilenge.
6Omutahi atera emiizo n'iwe omoi n'enumi y'efarasi;
niyo ekungira buli omoi agikuubire.
7Kubaki ekiro kyona kyona kishaga ekindi,
okwo omwaka gwona omushana guruga aha izoba?
8Omukama n'iwe yaramwire ebiro kutashushangana,
yataho n'ebirumo n'ebiro bikuru bitali bimoi.
9Ebiro ebindi akabikuza yabitendeka,
ebindi yabihindura bya buli kiro.
10Abantu bona baruga omw'itaka,
na Adamu kutondwa akaruga omw'itaka,
11Omukama ow'obumanyi bungi muno
akahurana abantu,
yabaha n'emiikalire etali emoi.
12Abandi akabaha omugisha yabatungika,
abandi yabahindura batakatifu yabehikya;
kyonkai abandi yabaraama yabashubya ahansi,
yabaihyaho obukuru obwo babare bainabwo.
13Okw'obona omubumbi akwete eibumba,
nikwo n'omutonzi ayabatonzire abakwete,
mara abaha okwo yaramura;
aha rw'okuba wenene akora okwo yayenda.
14Ekirungi kisingangana n'ekibi;
oburora busingangana n'orufu;
nikwo n'omufakare asingangana n'atina Ruhanga.
15Leba byona ebyo Rukirabyona yakozire;
nabyo bigenda bibili bibili, ekimoi kinyume ky'ekindi.
16Inye nkakwata ezamu ndi wa nyuma,
nashusha omuntu akenguza ezabibu bamazire kuzinoga.
Kyonkai aha rw'omugisha gw'Omukama
nkakira abandi bona,
nanye eijungiro lyange ly'edivai nalijuza ezabibu
nk'olinya azinogire bunoga.
17Kandi mumanye okwo mulimo ogu gw'amani
tinagukozire kagugasha inye nyenkai,
nkagukora kagugasha bona abagonza okwega.
18Mumpulire inywe abahango omu mbaga,
na inywe bebembezi b'enteko mumpulilize.
Oyeyemere
19Orwo okyarora otalileka mwana wawe anga mukazi wawe,
murumuna wawe anga munywanyi wawe kukugeleera.
Kandi omuntu wena wena otalimuha byawe,
okaija ahanyuma okechuza okabimwenza.
20K'okyaina oburora okyarora,
otalileka muntu wena wena kukutwara.
21Hakili abaana bawe babe nibo bakwirukira,
okukira kuba n'iwe obahanga amaisho
kabagira ako bakuha.
22Eby'olikora byona obikore bishemere muno,
otalyetera ibara libi.
23Orwo olibona agawe gahwa,
okamanya okwo waija kufa, ebyawe obigabe.
Abairu
24Endogobe etungwa obunyasi,
enkoni n'okushutuzibwa emigugu;
omwiru atungwa ekyakulya,
okuterwa n'okukozibwa emilimo.
25Omwiru wawe omukoze muno emilimo,
nirwo alitulijanyia;
k'olimuleka emikono akanaga omu nyorozi,
aligonza kukuruga omu mikono.
26Ekiinikya ekitunganwa ebikya,
nkomo n'orukoba;
ekiinika omwiru w'omutima gubi,
kumutera omuteire okamwijukya omwoyo.
27Omukoze emilimo atalija akanafara,
kuba obunafu bwegesa muno emize mibi.
28Omukoze muno emilimo nk'okwo alikuragirwa,
kandi k'atagizire muhuliro omukome empingo ozinyweze.
29K'oligira okwo watwaza omuntu omubalire,
eky'olikora okikoze obwegendeleza.
30K'oligira omwiru omutwaze okw'oyenda kabakutwaza
aha rw'okuba kugya kumubona oliba omujweleire.
31K'oliba oina omwiru omutwaze nka murumuna wawe;
kuba olimwetaga nk'okwo olikwetaga oburora.
K'olimukora kubi airuke akusigeho;
isi olishuba muhandaki kugya kumuhiga?
Currently Selected:
Sira 33: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.