Sira 32
32
Emitwalize mirungi aha magenyi
1Kabalikutaho kuba mugelezi w'obugenyi otalyekuza;
oshushe abandi bona,
abagenyi obalebelere kurungi,
oije oshuntame ahanyuma.
2K'oliba wagobesheleize emyoga yawe oshuntame,
oshemelerwe kubona balige,
bakuhe n'orukinga rw'amaua
aha rw'obugeleezi bwawe oburungi muno.
3Gamba iwe omugurusi, kuba noragirwa ogambe,
kyonkai omanye nogambaki,
mara otatangire bandi kuzina.
4Orwo balikushemeleza abagenyi otagamba bingi,
amagezi gawe otagolekya omu kanya kataliko.
5Okwo empeta y'ezahabu egiramu eibare katuku ely'eiguzi,
nikwo n'obugenyi bwinamu amarwa bushemezibwa ebizina.
6Okwo empeta nungi y'ezahabu egiramu eibare lya emeradi,
nikwo n'ebizina bishemera bityo aha marwa garungi.
7Musigazi, ogambe orwo waragirwa kugamba;
kyonkai otashaga mirundi ebili mara babe bakubalize.
8Ogambe ebili omw'iteka,
mara ogambe bingi omu bigambo bike;
oshushe alikumanya kyonkai okesiza.
9K'oliba oli omu bantu abahango
otalitwaza oti noigana nabo;
kandi orwo ondijo alikugamba otaligamba bitakwete.
10Nk'okwo orurabyo rurabya rwebembeire enkuba
nikwo n'omuntu enyekunizi ayebemberwa eibara lirungi.
11Obugenyi oburugeho aha izoba lirungi,
kandi otaba wa nzindo;
orahuke oshube omuka, otazengayo.
12Orwo okyali aha bugenyi oshemelerwe okwo olikushobora,
kyonkai otaligamba byakweshaijaza okaija okatamisa.
13Ebyo byona obisiimire ayakutonzire,
akakuha egaboze zingi ez'okukushemelera.
Okutina Ruhanga
14Atina Omukama akunda k'amugorora,
mara abaimuka karai kumuhiga abasingira.
15Abetaho Amateka gabaikazage,
kyonkai engobya tigamugasira.
16Abatina Omukama bakora eby'amazima;
n'ebikorwa byabo ebirungi bishamura nk'omushana.
17Omuntu omubi takunda kugororwa,
aramura okwo yayenda.
18Alikushobokerwa tayanga kuhaburwa
kyonkai ow'eikuru n'eituli tatina n'akati.
19Otalikora kintu otatekeleize,
mara k'oliba wakikozire otalikyechuza.
20Omuhanda gubi otaligushuba,
wakwija ositara aha mabare.
21Otaliba oshubire muhanda gurungi okararama,
22kandi buli kanya
olebega mbali olikugya.
23Buli kimo eky'olikora okikoze obwegendeleza,
aka nako kalyo k'okukwata emihango.
24Ayesiga Amateka ayekomye emihango,
kandi ayesiga Omukama taliferwa kantu.
Currently Selected:
Sira 32: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.