Danyeli 11

1Ninga ane no mweneco ku lubavu lwangu, mu mwaka mulongozi wo mutemi Daliyo Mumedi, neyilavya nimusikamye no kumupela vilungo. 2Holeka aluno zono nokulonjela, zo ze mbeka.

Wutemi wa Misili na Siliya

Nayo malayika yakatya, “Ho wali watemi wanji kanyhi wadatu, wono wotema mu Pelisiya. No mutemi we kane, mono kowatyatya, yuyo kowa mugoli muno si nhe wanji wose. Nayo kolo yakutuga vilungo so wugoli wakwe, kokwisumaniza no wutemi wo Wugiliki. 3Hanyuma kanyhi, u mutemi we vilungo nayo kolokwinuka. Nayo kolotema kwe vilungo no kwituma nha vyono yakusaka mweneco. 4Ninga ku soko yo wuteme wakwe we vilungo, wutemi wakwe wolokwigawa no kulawa hane. Ne watemi wanji wono si wali mu lulelo lwakwe, wawo wo wolowuhala wutemi wakwe. Ninga hamba nhavivyo, si wolowa ne vilungo nha vyono yali yenha mwene.

5“No mutemi wa Misili, yuyo langa yo kolowa yali vilungo. Na muli yumonga wa muli we citung'ati wakwe, yuyo yo kolowa ne vilungo kuciza, kanyhi yo kolotema wutemi wuwaha muno. 6Ninga kolo yeza kupuluta myaka micefu, yuyo mutemi wa Misili, vyolokwilunza no mutemi wa Siliya, kolomukombola sunga no mwanagwe we cicekulu, vitole no mutemi wa Siliya. Ninga hamba nhavivyo, wilunze wawo wuwo, si wolojendelela vilo vinji ng'o. Vyono mwi'zuwa linji, yuyo muhinza, no mulume wakwe no mwanagwe, hamonga ne wetumami wono vikabitana nayo, wose wolowulagwa. 7Na hanyuma ya zizo, yumonga wa muli wanduguze, yo kolotema. Nayo hanyuma kololihoma lipuga lye wasilikale wo mutemi wa Siliya, yenjile mu magomawakali gawo no kuwasuma. 8Nayo kolosola vihwani vye milungu yawo, hamonga ne viya vyawo vye zahabu na vye fweza, vyono wali wavisiwanuliye yiyo milungu yawo, yavitegule vyose ku Misili. Na kolo yikupuluta myaka micefu yo mulamu, 9nayo mutemi wa Siliya koloyihoma Misili, ninga kolowingwa yawuye ku yisi yakwe kanyhi.

10“Nawo i wana wo mutemi wa Siliya, wolokonghola yipuga yiwaha muno lye wasilikale, wewikanize so wulugu. Nayo yumonga wa muli wene, kolokwipongholeza nhe lihwazi, yakagakundujize magomawakali ge walugu. 11Nayo mutemi wa Misili, ku soko ye nghani yiyo, hobaho kolokolwa ne likuwo yiwaha, yabite vikehome no mutemi wa Siliya. Nayo mutemi wa Misili, kololiteka lipuga lyose lye wasilikale wo mutemi wa Siliya. 12Nayo mutemi wa Misili kolokwidunhumula so wusume wakwe, hamonga no winji muno we wasilikale wa Siliya wono yawawulaje. Ninga hamba si kojendelela nhondo zose kuwa no wusume wuwo.

13“Nayo mutemi wa Siliya, kolowuya yakakonghole lipuga yiwaha muno lye wasilikale, wacizize i walongozi. Na kolo vipango vyafika, kolobita kanyhi ku Misili yena ne lipuga yiwaha lye wasilikale vitung'ati. 14Nawo wanhu wenji wolomugaluka mutemi wa Misili. Sunga ne wanhu wanji i wagazi, wa muli wanhu wa mu nghungugo yako, Danyeli, nawo wologaluka, ku soko yo wugubulilwe wono wawuwene. Ninga hamba nhavivyo vyo wolosumwa du. 15Ale baho, nayo mutemi wa Siliya, ho kololipilima likaya lye magomawakali, no kulisola. Nawo wasilikale wa Misili, hamba si wolojendelela kanyhi no wihomi. Sunga ne wasilikale wawo vitung'ati, si wolowa ne vilungo kanyhi vyo kwihomela. 16Nayo mutemi wa Siliya kolowatendela wanhu wa Misili, nha vyono kolowa yendile mweneco, na holowa hasina witazize. Kanyhi kolokwinjila mu yisi ye cilagane, no kuyitemela lukulu.

17“Nayo mutemi wa Siliya, kolotyatilila, yetumamile wasilikale wakwe wose. Na kolo yakubita, si kolowongomeza yaye wutemi we walugu wakwe, langa kolonoza mulamu, kanyhi welunze nayo. Nayo mutemi wa Siliya, kolomukombola mwanagwe we cicekulu vitole no mutemi wa Misili. Ninga mahweso gakwe go wihomi, si goloficilicila kanyhi yaye. 18Ninga hanyuma ya zizo, mutemi wa Siliya, kologahoma makungugo menji mu nzila ye lilenga. Nayo kolowasuma wenji wa muli wawo. Ninga hamonga na zizo, citung'ati yumonga mujenzi, yo kolomusuma, yawudumye no widunhumuzi wakwe wose, yamunyetye no widunhumuzi wakwe mutemi wa Siliya. 19Nayo mutemi wa Siliya, kolowuya ku yisi yakwe mweneco mu magomawakali gakwe. Ninga kolowa yakondya kusumilwa lukulu. Na wuwo wo wolowa wo mudumo wakwe.

20“Ninga kolotema mutemi yunji kanyhi mu nyuma yakwe, mono kolotegula mwitumami wakwe yabite yakawatoweze wanhu kodi, ho yonjeleze sawo ya mu wutemi wakwe. Ninga vilo si vyolopuluta vinji yaye, mutemi yuyo kolowulagwa. Ninga si kolowulajilwa hazelu yaye, hamba si kolowulajilwa mu wulugu ng'o.”

U mutemi mubi wa Siliya

21Nayo malayika yakajendelela kulolosa yakutya, “Nayo mutemi wa Siliya mono kotyatya, kolowa munhu mubi muno muno, mono kolowa yasina lilumbo lyono limunojeye yawe mutemi. Langa kolowa munhu mono yabedegaywe muno, ninga kolowusola wutemi mu nzila yo wiyendezi. 22No munhu wo wose mono kolojela kumwimila, hamba yawe mukohani Muwaha wo Mulungu, munhu yuyo kolofwagulwa no kuwusizwa lukulu. 23Na mu wungwele wakwe, kowakonga-konga we zinghungugo zinji, nayo kolocila kuwa ne vilungo muno, hamba yiwe mwene yatemile mu nghungugo ndodo du. 24Nayo koloyihoma nhinicizo yisi yono yina wugoli. Kanyhi kolokwituma nghani zono hamba ne walezi wakwe si wazituma yaye. Hanyuma kolozisola zisawo, zono yazitecile kuko ku wulugu, yawagawile i wanhu wakwe. Kanyhi kolokwiwikaniza ho yagakumulanje magomawakali, ninga kolowa yaceleza, i cipango cakwe colowa cakondya malika.

25“Nayo kololiwikaniza lipuga yiwaha muno lye wasilikale, akuno yasina woga, yabite yakamuhome u mutemi wa Misili. Nayo mutemi wa Misili, kolokwiwikaniza ne lipuga lyakwe yiwaha lye wasilikale, ho vihome no mutemi wa Siliya. Ninga mutemi wa Misili, si kolomusuma mutemi wa Siliya. Hambi mutemi wa Misili nha kolokongwa-kongwa, ho yalece kuwufisiliza wuhile wakwe. 26Ne walonjelezi wakwe mweneco, wo wolomuwulaga. Na wenji wa muli wasilikale wakwe wolowulagwa, ne lipuga lyakwe lyose lye wasilikale, wolofwagulilwa lukulu. 27Ne watemi wawo wejete, wolokwikala wahanje ndigwa ha meza monga. Ninga hamba nhavivyo, mwi'pango lilyo, i mitima yawo, yowa yikali mu wihwesa wituma zimbi. Kanyhi wolowa kwilambila munhu no muyagwe. Ninga si wolocituga cono wakucisaka, hambi lidaha lyayo, nha lyowa likali si naza yaye. 28Nayo mutemi wa Siliya, kolowuya kwakwe hamonga ne sawo yono yatecile, ninga kuno yena no wuhile wo kuyongomeza dini ye wanhu wo Mulungu. Kolokwituma nha vyono kolosaka mweneco, hanyuma hodu, kolowuya ku yisi yakwe mweneco.

29“Ninga hanyuma yayo kanyhi, kolobita yakayihome Misili. Ninga muhinzo wuwu, nghani zolokwisima. 30Hambi i Waloma nha wolokuziza mu zingalawa zawo, wamwimile, nayo kolokogofywa.

“Nayo kolowuya ku yisi yakwe yakoligwe ne likuwo muno muno, na kolojela kuyongomeza yisi ye wanhu wo Mulungu. Kolotyatya mahala ge wanhu wono wakondya kuyileka yisi yiyo. 31Na wanji wa muli wasilikale wakwe, woloyavufya Nyumba yo Mulungu. Wolovimila vilavywa vye makumbiko, nawo wolowika I wifyo, mu Nyumba yo Mulungu. 32Na mu nzila yo kumukonga-konga mutemi, kolokwitujila watazi wenji wa muli wono wolowa wakondya kuyileka dini yawo. Ninga awalya wono wowa wakali wakumutyatya Mulungu, awo langa wolokwihoma nayo. 33Ne walongola we wanhu wono wena mahala, wolowejiza wanhu wenji. Ninga hamba nhavivyo, wanji wa muli wene wolowulagwa mu wulugu, hamba wologumilwa mu moto, na wanji wolosolwa wawopwe mu jela. 34Ninga mu mapango gago lono wuwulaji wolowa wukali wujendeleye, i wanhu wo Mulungu wolotuga wutazi wudodo, ne wenji wono wowa kwilunza nawo, wowa kwilunza ko wukoci du, ku so cambuzi cawo weneco. 35Sunga na wanji wa muli walongola we mahala, nawo wolowulagwa. Na ku soko ya zizo, wanhu wolokwiyeza. Na zizi zolojendelela du, sunga kono wolokuziza mudumo, mu vilo vyono Mulungu yaviwaga.

36“Nayo mutemi wa Siliya, kolokwituma nha vyono kolowa yendile mweneco. Kolokwidunhumula, no kwiwona vyono mwene yo yeza muwaha kuciza milungu yose, kanyhi yamucizize sunga no Mulungu Mono Yalawiliciye. Nayo kolosuma kuzinoza zizo, sunga lidaha lifice lyono Mulungu kolomulipiciziza. Nayo Mulungu kolokwituma nha vyono yakondya kuwaga. 37Nayo mutemi si koloyilumba kanyhi ng'o, i milungu yono walezi wakwe wayihembaga, hamba milungu yono yendigwe ne wacekulu. Nha cinji, si koloyilumbila lukulu milungu yose, hambi mwene nha kolokwihwesa nha vyono mwene yo muwaha yayicizize milungu yiyo yose. 38Ninga langa, mwene koloyipela cogopo i milungu yono yigadimaga magomawakali du i milungu yono ne i walezi wakwe si wayihemba yaye. Kanyhi koyilavizya milungu yiyo zahabu, na fweza, ne vibwe vyo wuguzi wukamu, hamonga ne vipegwa vinji vinji vyo wugoli. 39Nayo kolowetumamila wanhu wono wakuyihemba milungu mijenzi, wagadime magomawakali gakwe. Kanyhi kolowapela lilumbo yiwaha muno, wose wono wolomubocela nha mutemi wawo. Kolowawika mu milimo ye lilumbo yiwaha. Kanyhi kolowagawila sunga ne yisi, yawafupe.

40“Ne madaha ge ndumo go mutemi wa Siliya kolo geza kufika, u mutemi wa Misili kolomuhoma. Ninga mwene mutemi wa Siliya, nayo kolokwitaza, yehome no mutemi wa Misili kwe vilungo vyakwe vyose, akuno yakwitumamila ne matuka gakwe go wulugu, ne zifwalasi, hamonga ne zingalawa nyinji muno. Nayo kolozisuma zi'si nyinji, kolokwinjila mu zi'si zizo yakuhuluma nhe 'hwazi lya malenga. 41Kanyhi koloyihoma sunga ne yisi ye Cilagane, kolowawulaga makumi na makumi ga maelufu. Ninga langa zi'si za Edomu, na Mowabu ne yisi ya Amoni yono yowa yikali yisigaye, azo langa zolopona, 42na lono kowa kuzihoma zi'si zizo zose, sunga ne yisi ya Misili si koloyileka yaye. 43Nayo kolosola viwutwa vyose vye Misili vyono vihundikwe, vye zahabu, ne fweza, hamonga ne vinhu vinji vyose vyo wuguzi wukamu. Kanyhi koloyisuma yisi ya Libiya na Kushi. 44Ninga zinghani zono zolokuza zikulawa ku lubavu lwa kucilima na kusumuka, zizo zolomutajila woga mu nhumbula yakwe, nayo kolokwiyoha kwihoma kwe vilungo vyakwe vyose, kolowulaga wanhu wenji muno muno. 45Kologahoma sunga ne mahema gakwe mawaha muno ge citemi-temi, haciligati ye lilenga ne litunda lyono lizenjigwe Nyumba yo Mulungu. Ninga hamba nhavivyo, vyo kolofwa du, na holowa baho, hasina hamba munhu wo wose mono kolomutaza.”

Currently Selected:

Danyeli 11: LLKWW

Highlight

Copy