Danyeli 10

Wugubulilwe wa Danyeli he kolongo lya Tigilisi

1(Na mu mwaka we kadatu wa Kulo u mutemi wa Pelisiya, Danyeli mono yacemwa Beliteshaza, yagubulilwa nghani. Ne nghani yiyo yali ya mbeka, ninga yali nghani nghamu muno ku wizuce. Ninga yikaloloswa kuli mwene mu nzila yo wugubulilwe.)

2Na mu mapango gago, ane Danyeli, nali nili mu cililo majuma madatu. 3Nane mu vilo vivyo vyose, si nalizaga ndigwa swanu, hamba sinalizaga nyama yaye, hamba kung'wa divayi, hamba kucana zimvwili zangu, sunga gakapuluta majuma madatu. 4Na mwi'zuwa lye makumi mejete na yine lya mu mwezi mulongozi wa mu mwaka wuwo, ane nali nimile ha nyenje ye likolongo liwaha lya Tigilisi. 5Nali neza kugalamila kucanyha, nghawona munhu yunji yavwalile myenda ya bafuta, na mu ciwino, yewopile musipi wa zahabu. 6No muwili wakwe, wang'alalaga nhe 'bwe lyono likucemwa Zabalajadi. No wusu wakwe, wang'alalaga kotya limuli, ne meso gakwe genha tala. Miwoko yakwe ne migulu, vyang'alalaga kotya shaba yono nghusulwe muno muno. Ne lizi lyakwe nalyo, lyahulicikaga kotya nhe lizi lye 'puga yiwaha lya wanhu.

7Nane nene Danyeli du, mono nawuwona wugubulilwe wuwo nili wene. Ninga i wanhu wono wali wali hamonga nane, hamba si wawona cinji, langa wene wakatuga woga wuwaha, wakatiza, wakawa kwihundika. 8Wakawa kundeka nene du nili wene, nane nghawa niyilanjiliye yiyo nghani yo wizine. Ninga nane nghawa sina vilungo muli'ne, sunga no wusu wangu wukesima so woga, sunga hakawa hasina munhu wo wose mono yali yanhanje vyono yo nene Danyeli. 9Nane nali neza kulihulika lizi lyo munhu yuyo, nghagwa hasi wugubama nzilice. 10Ninga hanyuma hadodo, u munhu yuyo yakanyibata no muwoko, yakawa kunyinula, yakawa kusimya fugame, ne miwoko yangu yibate hasi. Ninga mwi'daha lilyo, nali nghali du nghucicima. 11Nayo malayika yakanonjela yakatya, “Gwe Danyeli, u Mulungu yakwendile muno. Holeka alu winukaje wime, wuhulicize viswanu kuli zono nghusaka nghulonjele, zono zindetile kuli'gwe.” Nayo malayika yali yeza kukondya kuzilonga zizo, hodu, nghawa kwinuka, ninga akuno vyo nali nghali nghucicima du.

12Hanyuma malayika yakajendelela kulonga nane, yakatya, “Gwe Danyeli, wulece kogopa. Hambi Mulungu nha yakondya kuwuhulika wulombe wako, ku wulawilila lono wamulombela ha lulongozi, wukenenenyheza, ho wutuje wizuce. Holeka nane niza ho nghuletele lipitulo lyo wulombe wako. 13Ninga malayika mulongola wo wutemi wa Pelisiya, yali yanyimiye vilo makumi mejete na cimonga. Ninga hanyuma Mikayeli, muyagwe ne walongola we Wamalayika, yakawa kuza kunhaziza, hambi nha nali nalekwa du nili wene mu yisi ya Pelisiya. 14Nane lu, niza kuli'gwe, ho nghwizushe kuli zono zolowejelela wanhu wako mu vilo vyono vikuza. Na wuwu wo wugubulilwe we vilo vyono vikuza.” 15Nayo malayika lono yalongaga zizo, ane kuno, nghawa nanjile meso gangu hasi du sina yo kulonga. 16Hanyuma malayika yuyo mono yejelaga yehwanile munhu, yakawugolola muwoko wakwe, yakamhamiza mulomo wangu Nane nghamutya, “Gwe muwaha, wugubulilwe wuwu, wukunyhepula vilungo vyangu, si nghusuma no kwiyimila ho ndece kucicima. 17Alu 'ne nha nehwana nho muwanda mono yemile ha mwande yo mutwawe. Alu ho nosuma kulongana nhawule nagwe? Hambi nha neza sina vilungo, no muhe wangu wukudinda.” 18Hanyuma kanyhi malayika yakanyibata, na hobaho vilungo vyangu vikawa kumbuyila kanyhi. 19Yakawa kunyitya, “U Mulungu yakwendile 'gwe Danyeli, holeka wulece kogofywa na cinji co cose, hamba kuwa na mahwele.”

Nayo yali yeza kukondya kuzilonga zizi, nane nghewona nhondo vilungo vyangu vyose vyakondya kumbuyila kanyhi, nane nghamutya, “Gwe muwaha wangu, wulonje zono wina, hambi nha wakondya kumhela vilungo.”

20Nayo malayika yakanyitya, “Mwene Danyeli, wumanyile 'mbi cono cilecile nghukuziza? Ane nghuziza, ho nghugubulile zono zandicigwe mu Citabu, ze Mbeka. Nalu yinojeye mbuye kanyhi ku Pelisiya, cikalewane na malayika mulindilizi wa ku Pelisiya. Na kolo zizo zakondya, ale, nayo malayika mulindilizi wa ku Wugiliki kokuza. 21Na lulu nhondo, nowa sina yunji mono kosuma kumhela wutazi, langa Mikayeli du, malayika mulindilizi we Waisilayeli, yuyo du yo komhela wutazi.”

Currently Selected:

Danyeli 10: LLKWW

Highlight

Copy