Isaías 44
44
Tuze Xanllon nake Dios
1Bzenay na', Israel, yell ke Jacob,
be'nn wen llin kia, be'nn ba biazralla.
2Nadan naka Xano, nadan bena rwe',
nadan bena rwe' ke ze garjtezo, na gukrena rwe'.
Bi llebo, Jesurún, yell ke Jacob,
be'nn wen llin kia, be'nn ba biazralla,
3le nada' guna nench'na gat nis latj dach yu billen,
na gat yeo raw yu yechen.
Nada' guna' yelnban ke xhi'nn xhasoaw ka'.
Wsela yel nak lay kian kone le ake'.
4Na chiw ake' ka' yix da llir ake',
ka yay dan nzi álamos da ll-lliw llwa yeo ka'.
5Toe ne'e: nada' naka be'nn ke Xanllo,
na yetoe ne'e nada' naka xhasoa Jacob,
na yetoe wzoje'e lo taken: Nake be'nn ke Xanllo.
Na site ra Israelen ka rakse.
6Xanllo, be'nnen llnebia, na nake wasra ke Israelen,
Xanllo nap doxhente yelwaken, nee:
Nadan naka danellte, na nadan naka da llayullten;
nullno llra' yeto ka nada' Dios.
7¿Nuxha ka' nada' cha?
Netegue, na ye'e nada' kan naken.
¿Nun ba bnee danellte kan gaken,
na ne'e gakren gak willjwani cha?
8Axha le gundiprall, bi llebre.
Nadan ba bneksa ka', kan batnate,
na re' ne'zere kwasru.
¿Zu yeto dios ka nada' cha?
Nutno numbiera yeto.
Da wayechj loe lsaken
9Ni tich be'nn ka' llunchaw loe lsak ka' bi zak ake', na nike bi zakze loe lsak ka' nllie akren. Be'nn ka' lloeraw loe lsak ka' nak ake' be'nn lchul, na be'nn bi llajniere, kelen'na si' ake' yelsdo. 10Be'nn wallekon llune to loe lsak nench werawen ka to dios, llnitze tiemp ke'en. 11Yoyte be'nn ka' lloeraw loe lsak ka' si' ake' yelsdo. Be'nn ka' llunchaw loe lsak ka' sjanak ake' be'nn nachze. Chenak yoy akte chaj ake' gan gak yel korchisen, si' ake' yelsdo, na wcheben le ake'.
12Wiechkllo bixhan llun be'nn wallekon: zie'e to ya, natell ket ba ble'e yan raw yi' barjen, llyinen kone martiy. Na llunchawen kone xhichje waren. Axha chetka be'nn wallekon bi gawe'e, lladu yel ndiprall ke'en, na chetka bi llaje'e nis, na lladuralle'e.
13Na wiakello to be'nn llunchaw yay: bllixen keton naken'na, na llunen sen kone to laps, na dan nzi compa's, natell llun chawen konen to skolp, na kone ka' llune to loe lsak da nak ke be'nn, na yel nbaraz ke to be'nn nach, natell llzoen to yodao.
14Na leska, cha nu llaz yay sedr ake', na yejwon llaslli'on len, natell gat yay cedr da wzoye'e. Na cha llasralle yay dan nzi cipres, o cha yay dan nzi robles, llapen lo yixta'on xte llinte llaken daxhen. 15Natell be'nn ka' llunen aken llin llxhen ake' yi', llayox ake' txhonjen nench llachan le ake', llayox ake' yetxhonjen nench'na llwey aken pan, na yeto bchuyen nench'na gun ake' loe lsak, natell llchekw yichj ake' lloeraw aken.
16Leska ye gachj yayen llunlenen llin nench'na llxhene yi', llweye'e ber, na llawe be'ren ba bweyen, na llerjre. Leska llacha kwine na ne'e: Le wen llia llwa yi'n, ba llallera. 17Na konen yayen llaganen llune to loe lsak, llchekwte xhibe nench'na lloerawen, na llatyueren na llen: Basra nada', le rwen nako dios kia,
18Be'nn ka' bi nez akre, bi llajnie akre, zute yajrao ake' axha nchul akre, axha chras bi llajnie akre. 19Bi llbe ake' wayun ake' xbab, yallj yel sin ke ake' nench'na chejnie akre, na ne' ake': gachj yayen bwalan, na yi' barjen bweyan pan, na bweya ber, na bdawan, na dan baganen benan to da sral, na dan llwerawan naken to bchuy yay. 20Daliyan, naken ke to be'nn llawe'e de. Wello latj siye xbab wxhiye ka' lliw, na bi chejnie aksre chras ka dan yo' lo tak aken naken da wxhiyeze.
Xanllon llazixhene na llasre'e Israelen
21Israel, yell ke Jacob,
jadinlall ke rwen nako be'nn wen llin kia,
rwen nako be'nn wen llin kia, le nadan bena rwe'.
Israel, bi galallo nada'.
22Nada' ba balana dol ko'o ka', na daxhinj ko'o ka',
kan llaran bej ka'.
Bada konen nada', le nadan ba basra rwe'.
23Yeba, besia llebraz ke naken llawero kan ba ben Xanllon.
Le gusia yel llawere, da lla' zitj ke yell-li'on.
Ya', na ya' yeo kone yoyte yay ke ka',
le gusia le yawere,
le Xanllo ba broere yel wak ke'en
kan ba basre Israelen, yell ke Jacoben.
24Danin nee Xano, wasra ko'on,
le'en benee rwe' ka zegarjtezo:
Nadan naka Xano, nadan bena yoyte da sjade,
nadan bchirja yeban, na brekoa rane yell-li'on,
na nutno gukren nada'.
25Bi llwa latj nench'na gak
kan ba bnee be'nn ka' llixjwe di'll wxhiye ka',
nadan lluna nench'na llnit xbab ke be'nn waneya ka'.
Nadan llunchixra be'nn sin ka',
na yel sin ke ake' ka' bi nkaraze.
26Axha lluna nench'na gak kan ba bnee be'nn wen llin kia ka',
na lloj wen xbab ke be'nn ka' ba bselan.
Nada' ba bnia ke Jerusalén'na wallan be'nn dayubre,
na ke yell xhen ka' lla' Judán wayakchao aken.
Nada' guna nench wayas da ka' ba bayinjen.
27Nadan gak guna ke wayech nista'on,
na ke yeo ke ka' waganen da yechze.
28Nadan yepa Ciron: Rwen nako be'nn llap nada',
rwe' guno yoyte kan llenla,
na llepa Jerusalén'na: Rwe' wayakchao,
na yoda'on: Wabekw ake' rane.
Currently Selected:
Isaías 44: ZPUPAT
Highlight
Share
Copy
Want to have your highlights saved across all your devices? Sign up or sign in
