Isaías 11
11
Xhi'nn xhasoa be'nnen nzi Jesé nse'e to yel llnebia da llzoa nbaraz, na yel korchis
1Raw yay bchekw ke Jesén, lloj to xlipe,
to xlipe lloj lo rue ka'.
2Espíritu ke Xanllo seteze sen kone le'e,
na we le'e yel sin, na yel llajnie,
da bi gunee konganze, na da llundiprall,
gumbiere na gape'e baran Xanllon.
3Le'e bi gunee yel korchisen konen tuz dan re're,
na bi wchuybie'e konen kon to di'll da ba benle llne' ake'.
4Gunee yel korchis lixhej ke be'nn ka' bi ndiprallen,
na gakrene be'nn yiach ka' zajzu latj yell-li'on.
Di'll ke'e ka' gak aken ka' to xhis da wsakzi be'nn zban ka',
na konen bich dan lloj llwe'en, wlleyie'e be'nn maren.
5Bi wsane gune yel korchis, na dalixhajen.
6Natell bekw yiwon, na xhir da'on su akba txhen,
bell taw, na chib da'on wazirall akba txhen,
bell da'on, na bell yixen chiw akba txhen,
na we akba latj gap to bidao le akba.
7Baken, na bayixen nzi osa gak akba ba nlliere loellj,
na xhi'nn akba ka' wazirall akba txhen.
Bell yixen gawba yix, kan llun bellen.
8Bida'on wak chitjbe lo yell gan yo' belen nzi cobra,
gak ko takben lo xon belen.
9Doxhente raw ya' xhirall kian
nutno su gune sban loellj,
le kan llaslla nisen, nista'on,
kakse yel sin ke Xanllon wasllan doxhente latj yell-li'on.
10Keten llin lla'na
xlipe dan blloj le ruen, naken da za ke Jesé
chasen ka' to sen ke yell ka'
na be'nn ka' lla' latj yell-liw ka' wayirj ake' le'e,
na latj gan zoe'en gaken to latj ga se ke, na ga gat yelwak.
Wallin be'nn ka' bchach aken
11Ke lla'na Xanllon wroere yelwak ke'en dayubre
wayune'e gan ye txhonj be'nn yell ke'en,
gune nench wabi ake' Asirian, na Egipton,
Patros, Etiopía, na Elam,
Sinar, Hamat, na latj yell-liw ka' lli llwa nistaw.
12Wlise'e to banderr ke latj yell-liw ka'
na watupe be'nn yell ke Israelen bchach ake' yellen,
watupe le ake', raw doxhente yell-liw
be'nn Judá ka' guslas gateze.
13Yel xhe ke Efraín'na waranen,
na yel llaklla ke Judán yebellin,
Efraín'na bi yexhere Judán,
na Judán bill gaklle Efraín'na.
14Chop akte chaj gan llayo willen llajtilren ake' be'nn filisteos ka',
na llin ake' kull akre,
gak ake' txhen, na waka ake' yel wnia ke be'nn to kwen wej ka zajzu gan ll-lloj willen.
Yel llnebia ke aken llinte Edom, na Moab,
na wnebia ake' be'nn amonitas ka'
15Xanllon wsarje to nez lo nista'on nzi nistaw da xna,
wchirj taken raw ye'on nzi Éufrates,
wsele'e to be zban
da wla len gall kuenre,
na gak wlay aken nike galjze xher aken.
16Katen be'nn ka' llagan ke yell ke Xanllon wallach ake' Asirian,
wallel akre to nez ray,
kan guk ke Israelen kan balloje Egipton.
Currently Selected:
Isaías 11: ZPUPAT
Highlight
Share
Copy
Want to have your highlights saved across all your devices? Sign up or sign in
