Marko̱ 1
MZI

Marko̱ 1

1
Jua xi Batendá
(Mt 3.1-12; Lc 3.1-9,15-17; Jn 1.19-28)
1Kuacha kuma nga tsaꞌángire̱ nga kistetsajo én tjatse xi sꞌe̱i̱ ndibajo Kjesuu̱, Kjindiꞌe Namiña Diuu̱, xi ꞌbatsjengiña. 2Ngieje nga kuicha tsaꞌángire̱ xukúcha kitsuyasún Isaia̱, xi kitsichjen Namiña Diuu̱, nga batetsajo énꞌen.
«Án xi tsingiya xu̱ta̱ xi tsuꞌbajo énꞌna
nga kui tjún fakasen,
ku kui xi tjen ꞌbendari ndiya
ni̱tjin nga fichiji nangi.
3»Tjin xi tikjindia nangi kixii̱:
“¡Tꞌendájnu ndiya Namiña Diuu̱!
¡Jnuxꞌaa̱jnu ndiya!
¡Ngují najmi xi stengi̱ña ngasakúre!”»
4-8Kui ni̱tjin, Jua xi Batendá ikúre̱ yajo̱ꞌe xu̱ta̱ nangi kixii̱. Tsja̱ꞌe̱ kameyo̱ najñu xi baja ku tjiuxin banchu ngaꞌan. Chjaꞌba kjine kju tsjen xi tjin ngijña.
Kuacha kitsúre̱ xu̱ta̱ Jua nga tsichjáju: «¡Tatendájnu yajojnu ku takujnu nga ngite mejínjnu nga najmi xaba ñaꞌánjnu! Kjiátse nga tsichatꞌájnu Namiña Diuu̱.» Tekuácha kitsúre̱ nga tsichjáju: «Kjaꞌi xi tjínre ngu ngaꞌñu xi tsé ngisa ndiba ngatunꞌan. ¡Ndatsa mejénna musuꞌe uyaꞌan tanga najmína kju̱a̱kixi! Án ndijua tebatendajujnu, tanga kui Ngayaꞌasen xi Tsjé batendajújnu.»
Ngieje xu̱ta̱ xi sindu nangi Judea̱, kju xi sindu Jerusale̱n, fue xu̱ta̱ nangi kixii̱ nga faitꞌere Jua. Kjín xu̱ta̱ xi tsuya jee xi kitsiꞌín ku ngaya xánga xi ꞌmí Jorda̱n itenda Jua.
Jua itenda Kjesuu̱
(Mt 3.13-17; Lc 3.21-22)
9Kui ni̱tjin Kjesuu̱ nangi Ngalilea̱ kjitsuꞌba, kꞌi̱a̱ nangi xi ꞌmí Nasaree̱. Itju kui ngande ku kijí janda ndana xi ꞌmí Jorda̱n, ku kꞌi̱a̱ itenda Jua. 10Nga itjujinda Kjesuu̱ ngajín ndijua, kubé nga jixꞌajin ndiujmi, ku ngayaꞌasenꞌen Namiña Diuu̱ xuku ngu tuju jajen jmanga kjisian. 11Ku kui chuba, ngu nda̱ xi jindiba ndiujmi kuicha kitsú: «Jíxi Kjindiꞌna jí, xi kju̱a̱xikjáin nga mejénna. Tuxi tsjuátjinre anima̱ꞌna nga̱tꞌari.»
Kjesuu̱ kitsiꞌínre̱ xindajin
(Mt 4.1-11; Lc 4.1-13)
12Kui nga kitsiꞌín Ngayaꞌasenꞌen Namiña Diuu̱ nga tjeꞌñu kiju̱ Kjesuu̱ ján nangi kixii̱. 13Ku kꞌi̱a̱ yachan ni̱tjin kumare̱ Kjesuu̱, nga kisꞌejñajinre chu xi tjin ngijña. Ku xindajin mejénre nga tjitsiꞌin ndsen, tanga kjinditsjeꞌe Namiña Diuu̱ tuxi ndá inchatsikuenda Kjesuu̱.
Nga tsaꞌángire̱ xá xi kitsiꞌín Kjesuu̱
14Nga je jaꞌa ni̱tjin tjínre nga kinikjai nduya Jua, kijí Kjesuu̱ ngande xi chja̱ Ngalilea̱. Kꞌi̱a̱ kitsuyasún én xi ndá kjitsuꞌbajo nga̱tꞌaꞌe Namiña Diuu̱: 15«¡Je ndiba tiña ni̱tjin nga ndiukatexuma Namiña Diuu̱! Tiaꞌanjnu xki̱ Namiña Diuu̱ ku tisꞌejínjnu kui én xi ndá.»
Ñujún xu̱ta̱ xi kjienꞌinjin kiskabe Kjesuu̱
(Mt 4.18-22; Lc 5.1-11)
16Tsꞌua tꞌandeꞌe chincha tsé xi ꞌmí Ngalilea̱ kju̱a̱ꞌá Kjesuu̱, nga kubé Ximo kju Jandre̱, jó xu̱ta̱ kjeꞌinjin xi ngutsꞌe ma, xi inchakjeinꞌinjin naꞌyaꞌe. 17Kuacha kitsúre̱ Kjesuu̱: «Ndiba tjengijnu. Ngandeꞌe̱ nga ti májnu ndubá, tusá xu̱ta̱ tꞌetkujnu xi an ngandibatjengina.»
18Tekuini chuba, Ximo ku Jandre̱ ꞌyendu naꞌyaꞌe ku kitjéngire̱ Kjesuu̱.
19Janda kje tseji ꞌbema, Kjesuu̱ kubéni Santia ku Jua, nistiꞌe Sebedeo̱. Tekuácha xu̱ta̱ kjeꞌinjin kui xu̱ta̱, ku ngu ngaya tsutsu je inchaꞌbenda naꞌya. 20Tsichjáre̱ Kjesuu̱, ku kijitjengire, ngaya tsutsu je kisꞌejña namiꞌen, kju xu̱ta̱ xi inchatsixajo.
Xuta xiꞌin xi ngayaꞌasenꞌen xindajin tjínjin yajo̱ꞌe
(Lc 4.31-37)
21Kjesuu̱ ku xu̱ta̱ xi kjibakuyare̱ nangi jmanga ꞌmí Kafarnau̱n kijí. Nga ni̱tjin xubato̱ ni̱ngu̱xi̱ kijí Kjesuu̱ ku tsaꞌángire̱ nga ikuyáre xu̱ta̱. 22Ngieje xu̱ta̱ nga se̱n inchamare̱ kju̱a̱kitakún xi kjibaku, nga̱tꞌa nga tjichja̱, tuxi tjínre ngaꞌñu mitsa xuku chji̱ne̱ Kju̱a̱kixiꞌe ni̱ngu̱xi̱.
23Ngaya ni̱ngu̱xi̱ kjitsuꞌba ngu xu̱ta̱ xi tjínjin yajo̱ꞌe ngayaꞌasenꞌen xindajin. 24Kui Ngayaꞌasen xaba kuicha skindiare Kjesuu̱:
—¡Kjesuu̱ xi xu̱ta̱ Nasaree̱! Mí xi tjínri ngatꞌajnii̱. A kui xá kju̱a̱ꞌi nga jin kju̱a̱ꞌinikjeijni. Beꞌa̱n ꞌyáini jí. ¡Jí xi kjindiꞌe Namiña Diuu̱ jí!
25Kjesuu̱ tsinchatiju ngayaꞌasen xabaꞌe̱ xindajin:
—¡Sii niꞌinji!¡Titjui ngaya yajo̱ꞌe kui xta̱!
26Tjikjindia nga itju ngayaꞌasen xabaꞌe̱ xindajin ku tuxi ndá kitsikjatse xu̱ta̱ xi tjínjin yajo̱ꞌe.
27Tuxi se̱n kumare̱ xu̱ta̱ xi inchabase, ku kuicha inchatsú: «Mí xi kuicha ma. A kju̱a̱kitakún tjatse kui. Mí tku̱ya ngaꞌñu xi tjínre kui xu̱ta̱. Nga tuxi tjínre ngaꞌñu nga tsiꞌínre manda ngayaꞌasen xabaꞌe̱ xindajin ¡ku tꞌeꞌénre!»
28Ku kuyajin nga ndá Kjesuu̱ nga ngieje ngande xi xu̱ta̱ Ngalilea̱.
Kjín xu̱ta̱ kitsindaya Kjesuu̱
(Mt 8.14-17; Lc 4.38-41)
29Ku kjia itju Kjesuu̱ ngaya ni̱ngu̱xi̱ ku jña kijí Santia kju Jua nga niꞌyaꞌe Ximo ku Jandre̱. 30Nga tsasꞌen ngaya nga niꞌya, kiꞌmiyare nga ndáji xu tjínre nachꞌaꞌe Ximo, tꞌaiꞌñu xu inchare̱. 31Kikasere̱ Kjesuu̱, kiskabere̱ tsja ku kitsikisitjen, tekuini chuba kjitjubaꞌare̱ tꞌai, ku kui chju̱n ꞌyeyanire xi chine.
32Nga je kjamajñu, xu̱ta̱ jichuju̱re̱ Kjesuu̱ ngieje xi ndáji sindure kju xi xindajin sindujin yajo̱ꞌe. 33Ngieje xu̱ta̱ na̱xi̱nanda kutku kjindetsinꞌen Ximo jmá ngatjen kjitjen kjindetju̱a̱. 34Kꞌi̱a̱ tuxi kjín xu̱ta̱ kitsindaya Kjesuu̱ xi kjín tku̱ya chiꞌin tjínre, ku tekuácha kjín xindajin itsjé ngaya yajo̱ꞌe xu̱ta̱. Tanga ichiji kitsjuáre̱ kju̱a̱ nga xu̱ta̱ kui xindajin, nga̱tꞌa be kꞌi̱a̱ xi ꞌmí Kjesuu̱.
Kjesuu̱ tsuya én xi tjínre kju̱a̱ndá
(Lc 4.42-44)
35Nga je kjimaꞌasen isitjen Kjesuu̱ ku ngu ngande subá kijí nga tsinengi kju̱a̱ndá. 36Nga je tꞌaji kijí ku kijitjengire Ximo kju xu̱ta̱ xi jña tjima nga kikangitsjai. 37Nga jichú jmá kjitjián, kuicha kitsúre̱:
Ngieje xu̱ta̱ nga jí inchamangitsjairi.
38Kuacha skengire Kjesuu̱:
—Kjaꞌi nangi xi tiña sindu kꞌui Tjáiña. Tekuácha tsubáre̱ nga faxiyaꞌan kui én xi tjínre kju̱a̱ndá, nga̱tꞌa kui xá jindibaꞌan nga̱sunde̱.
39Ngieje ngande xi chja̱ Ngalilea̱ kisꞌebixi Kjesuu̱ nga kitsuyasún én xi tjínre kju̱a̱ndá ngaya ni̱ngu̱xi̱ xi tjin nga ngu ngu nangi ku itsjé xindajin xi sindujin yajo̱ꞌe xu̱ta̱.
Kjesuu̱ kitsindaya ngu xta̱ xi chiꞌin xi findu tjiuxinña tjínre
(Mt 8.1-4; Lc 5.12-16)
40Ngu xu̱ta̱ xi tjínre chiꞌin tjiuxinꞌen kitsitiña yajo̱ꞌe jmá kjitjián Kjesuu̱, iséntꞌare tkuꞌe̱ ku kuicha kitsúre̱:
—Ndia̱ꞌna, beñaꞌan nga mari nindayeina. Tindayeina ngu kju̱a̱ndá.
41On kiskutꞌa Kjesuu̱ kui xu̱ta̱ xi ndáji tjínre, skexinga tsja, skingajun ku kuicha kitsúre̱:
—¡Tsindayara! ¡Je kundaye!
42Tjeꞌñu kundaya tsjetsje kui xta̱; 43tanga Kjesuu̱ tuxi ꞌñu tsinengire̱ nga kitsingiya:
44—Ngatu̱ ngují xi ꞌmiyeiri kúcha kundaye. Chanaꞌmitsje tꞌain chaseiri ku ngatasejun ngatasetꞌari, ku chꞌei kju̱a̱tjocha xukúcha tsu manda xi yeꞌé Moise̱. Tuxi Ngatube já chanaꞌmi nga je ngite najmíri chiꞌin.
45Tanga kui xu̱ta̱ ngieje xu̱ta̱ kitsuyare̱ kúcha kundaya. Ku kui kju̱a̱ nga Kjesuu̱ majin chan fabixi ngieje nangi, ku tiñatse fichu jmanga najmi xu̱ta̱. Tanga tekui xi fichutꞌare xu̱ta̱.

México © Sociedad Bíblica de México, A.C. AÑO


Learn More About Porciones Mazateco de Soyaltepec

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.