Levitiku 25
25
Eyaakha ya eSaabadu
1Yave aamweerela Moisesi vamwaako oSinayi: 2“Mwaaleele ha aYixrayeli: ‘Mwaavolowaka mweelaponi Miyo kineeraaka koovaheeni, elapweene yeeyo emuttittimihereleke Yave eSaabadu. 3Wa iyaakha ithannamosa mwaaleke mmattamwanyu, mukwasereke iwuuvasanyu ni muhepheke mwaanlaanyu. 4Vaheera vayaakhani yanaathannapiili elapo ekhalaneke eSaabadu yoowiitthuuwa, emuttittimiherelaka Yave. Muhaale imattasanyu naari muhikwasere iwuuvasanyu. 5Muhihephe soomorela naari iwuuva* sa imatta sihikwaseriwe. Elapo ekhalaneke eyaakha yoowiitthuuwa. 6Nyuwosa muceeke yeeyo eniiruwere elapo eyaakheeneeyo – nyuwosa, epotthaanyu elopwana ni ethiyana, namuteko onliviwa ni namavira onkhala eriyaraanyu, 7nitho mihuwosanyu, axinama a ntuphini a elapwaanyu. Sootheene eneeraaya eruwere elapo siciweke.
Eyaakha ya Otthapa
8Mwaalikele iyaakha sa iSaabadu ithannapiili, eyo tiiyo ithannapiili sa iyaakha ithannapiili, opwexerera ti iyaakha miloko mixexe niithanniixexe. 9Vano mulamule weera yiipiwe mapalapatta vanihukuni nanaamuloko na mweeri wanaathannamiili; vanihukuni na orehererela wiiwanana ni Yave mwiipe mweelaponimwanyu moothemwene. 10Mutteelihe eyaakha yanaamiloko mithanu ni mwaalaleere mweelaponi moothemwene otapuxeyawaya amaki. Wa nyuwosa eniikhale ehuhu ya otthapa, khula mutthu a nyuwo ahokoleelaka owannyawe mweemusinimwawe ni munihimonimwawe. 11Eyaakha yanaamiloko mithanu eniyookhaleleni ya otthapa; muhaale naari muhihephe soomorela hata iwuuva* sa imattasanyu soohikwaseriwa. 12Vano ti eyaakha ya otthapa ni yookhalelekeni yootteela; muceeke paahi enruweraaya elapo. 13Muyaakhani eyo ya otthapa khula mutthu ahokoleele owannyawe. 14Mwamuthumihera ettimaanyu mukhwiinyu hoye hoye mwathuma yawawe, mpakelaneke ekhaikhai. 15Munthumihere mukhwiinyu mwaalikelelaka okhuma Eyaakha ya Otthapa. Vano owo athumiheke aalikelelaka iyaakha sihanle sa ohepha. 16Saatta iyaakha, mwaandyeerereke mutteengo, vaheera sayeva mvukuleke mutteengo niwoko vekhaikhai yeeyo owo onoothumiheraaweni ti maattelo a ohepha. 17Mpakelaneke ekhaikhai mmoovaka Mulukwaanyu. Miyo ti Yave Mulukwaanyu. 18Mutthareke ikanosaka ni mwiiwelele nnenesene malamulowaaka ni munookhala oolipeene mweelaponi. 19Vano elapo enimwiimiha soowiimasaya ni munimooca mpaka ovona, mukhalaka oolipeene. 20Apaale munookoha: “Nniceni vayaakhani yanaathannapiili, hiyo nihaanle naari nihihemphe?” 21Musuwele weera Miyo kinimoorumihelani mareeliho vayaakhani yanaathannamosa moota wooweera elapo enooruwera yookwana iyaakha tthaaru. 22Mwaaphatteyaka vayaakhani yanaathannatthaaru, munimooca nlelo sookonela ni sinoopwaherera mpaka yoohepha ya eyaakha yanaathannaaxexe. 23Elapo ehithumihiwekeru, niwoko eyo ti yawaka ni nyuwosa muri anamarwa ni anamathaamathaama paahi. 24Mweelaponi yootheene munkuxaanyu munootthunihera woopola mweehuhuni yootthuneya. 25Mukina a aYixrayeli ahaawa anathumiha mpatta wa ettimaawe, vano mmusaawe xaxaxa arweeke oopoleke yeeyo othuminghaawe. 26Wa soothesene mutthu aahikhalano oomoopolela ettima, mene owo iisaasa anaphwanya moota woowoopolela, 27owo aalikeleke iyaakha sivinre okhuma othuminghaawe ni ahokoloxeke yoohiyana wa yoole omuthumihenraawe; vahoolowaya akuxeketho. 28Vaheera aahiphwanya moota woowoopolela ettima othumihalaawe, epwaherereke mmatatani mwa namathuma mpaka Eyaakha ya Otthapa. Vayaakhani ya Otthapa ehokoloxiweke ni vano owo aneeraawe akuxeketho. 29Mulopwana athumiha empaawe musidadeni yootekeleliwa, oophwanela woopola mpaka okwanela eyaakha ethumihiweene. Ehuhuweene yeeyo oopoleke. 30Owo aahoopola empeene yeeyo ehinaaye okwanela eyaakha, empa eyo enookhala ya namathuma ni ikhapirasawe wa mahuku ootheene. Eyo kheehokoloxiwa vaYaakhani ya Otthapa. 31Vaheera impa sa mmittettheni soohitekeleliwa sooneliweke okhala sa vanlakani. Iyo soopoliweke ni sihokoloxiweke vaYaakhani ya Otthapa. 32Mwaha wa isidade sa aLeevi, awosa anoophwanela woopola impasaya musidadeni siri sawaya. 33Tivawo impa sa aLeevi sinkhalaaya soowoopoleya – eyo tiiyo empa yoothumihiwa yakhalaru esidadaaya, ontthuneya ohokoloxeriwa vaYaakhani ya Otthapa, niwoko impa sa musidadeni sa aLeevi ti sawaya eriyari ya aYixrayeli. 34Vaheera moocihamo ori mwa isidadesaya ohithumihiwemo; ti sawaya wa mahuku ootheene. 35Mukina a aYixrayeli ahaawa, ahinawera wiiciha, munkhavihere ntoko ompakeliwaawe namarwa hoye hoye namavira weera apwaherere okhala eriyaraanyu. 36Muhimukokoceru woopwaha, mene mmoove Mulukwaanyu weera muYixrayeli owo apwaherere okhala eriyaraanyu. 37Nyuwo mwamukoongoriha musurukhu, owo oolivekeni hiiho ni mwamukoongoriha sooca, owo oohokoloxerekenitho hiiho. 38Miyo ti Yave Mulukwaanyu kookhumihaleni wExipitu weera koovaheeni elapo ya oKanaani ni kikhale Mulukwaanyu. 39muYixrayeli mukina variyariwanyu ahaawa, aniithumiha wa mukina a nyuwo, muhimvarihe muteko ntoko epottha. 40Owo ooneliweke ntoko namuteko ooliviwa hoye hoye namavira; owo oovarelekeni muteko mpaka vaYaakhani ya Otthapa. 41Vahoolowaya owo ni anamwanaawe etapuxiweke ni owo ahokoleeleke opuumbaniwawe ni wa makholowaawe. 42Yeenre aYixrayeli ekhalaka arumeiyaaka Miyo kaakhumihalaaka wExipitu, awosa ehithumihiwe ntoko ipottha. 43Muhaalamule muhaamorelaka ikharari, mene mmoove Mulukwaanyu. 44Ipotthasanyu ilopwana ni ithiyana sikhaleke sa miloko sinkhala mukhwipimwanyu; mwa seiyo muthumeke ipotthasanyu. 45Mwaathumeketho eriyari ya anamavira ankhala eriyaraanyu ni a mahimwaaya ayareliwe mweelaponimwanyu ni awosa anoothatuwa awinyu. 46Muntthuniheriwa waahiyera anamwaniinyu ntoko yoohiyeriwa ni muntthuniheriwa waatatuxa ipottha wa mahuku ootheene, mene mwaha wa aYixrayeli, muhaalamule muhaamorelaka ikharari. 47Namarwa hoye hoye namavira onkhala variyariwanyu athadyireya, ni muYixrayeli mukina ahaawa, aniithumiha wa namarwa, hoye hoye wa mukina onkhala variyariwanyu ori a nihimo na namarwa owo, 48muYixrayeli owo oophwanela woopoliwa naari iithumihaleene. Mmoha a emusaawe amoopoleke: 49atatawe hoye hoye musuluwaawe hoye hoye akhalaru mmusi xaxaxa amoopoleke. Naari owo atadyireiyeene, iixoopoleke. 50Owo ni namathumaawe yaalikeleke ehuhu okhuma eyaakha iithumihalaawe mpaka vaYaakhani ya Otthapa. Mutteengo woowoopolela ottharihiweke ntoko wa namuteko onliviwa ottharihiwaka waatta wa iyaakhasene seiyo aakhanlaawe epottha. 51Sahala iyaakha sincipale mpaka Eyaakha ya Otthapa, owo aliveke mutteengo attharihaka iyaakha sihanle. 52Sahala iyaakha vakhaani mpaka Eyaakha ya Otthapa, owo aalikeleke ni aliveke attharihaka iyaakha sihanle. 53Owo ooneliweke ntoko namuteko onliviwa vayaakhani; mwiipasoope weera pwiiyawe ahimulamule ahimmorelaka ikharari. 54Owo aahoopoliwa ni wakhalaru moota wa seiya, mutthu owo ni anamwanaawe evoloweke ootapuxeyeene vaYaakhani ya Otthapa, 55niwoko aYixrayeli ti arumeiyaaka. Mwa yaawo kaakhumihalaaka wExipitu. Miyo ti Yave Mulukwaanyu.
Currently Selected:
Levitiku 25: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
