Tito 1
1
Iramucho
1Faulo, mutumwa wamwa Muungu na mutumami wamwa Yesu Kiristo. Nene natumiwe nëvakhamie nkhoo antu në Muungu waahwaniye vëhange uhuvëi në üküü na veeso vëhange umanyi wa tutë në uguvatongeera vëduvë mwino Muungu ugufenja. 2Umanyi wasuu uguvatongeera antu mu ighonje ra ufanga wa khae na khae në Muungu në atiurëgheegha, waëkie iraghano nënaa urëmi kë winatundwa. 3Na nënaa itungo ranoneya Muungu Mutyoi witu agaraghëëra ukhani wakwe na agandaghëëya nene nëutanantye.
4Kunë Tito, mwanane wa tutë mu uhuvëi në nene ginako guukweti. Muungu Tata witu nanë Kiristo Yesu Mutyoi witu agufe mboto nanë majëghana.
5Ëyëë në soko nëantendie nene nëgureke veve uKirete, gusoko veve udahe uyatenda vija mantu nëëtitendekie vija, na uhwania anyampaa mu muji mwino nene naa naguraghëëye. 6Mutongeeri wa kanisa atende muntu nëatina ihondwe, mughosya wa mukhema umwedu, na anakwe vëtende ahuvëi. Veeso vëtiufenjiwa vëtende vëna uduvi gënya wa maimwana mba nëvëtina ikuryo. 7Gusoko askofu, mwino mutogneeri në müküü wa mwëmo wa Muungu imunoneye atendeke atina ihondwe. Mweeso imunoneye atatende muntu nëugiyanjisya mughonjo mba muntu wa makuo mba mughai mba ugutumëa nguu mba muraku wa hela. 8Ëgweeso mweeso atende wë gëhe, uyanjëte utenda mantu në maja nanë wibalëte mughonjo. Uduvi wakwe utendeke ughokie, weru, nanë gighiiya utenda mahutye. 9Mweeso imunoneye imëke sësë gwa uhonga tutë a ukhani në antu vëusëyaa. Gwa utenda uyi, mweeso adahe uduya maraghëëyo nëëghokee masëyo a tutë na noo gwa uvafënga avoo nëvëufëngaa masëyo asaa.
Uduvi wa Akiristo va uKirete
10Gusoko gwina antu vingë nëvëtina ikuryo, vëurighëëtya nkhani nëitina ryana nanë arëgheeghe, ino ikhakho ra antu avoo nëvëtowe ihungu. 11Veve inoneye uvakiye antu vasaa, gusoko veeso vëusacha antu va makhaya ëgëtunga uyaghaa ufuma u masëyo a tutë. Vëutenda uyi gusoko a urëfwa gënyamwëmo intu në veeso vëtinoneye usëya. 12Umwedu unë veeso vëumughemaa mwino munyagëdaghu agahanya,
“Antu va uKirete
matiku oong'e vëurighëëtya uregheeghe.
Veeso araku na atoto
vikhwete na maimwana a gihaka.”
13Usudanga urui në wa tutë. Gwa uvii veve vakenee veeso gwa ukharë, uvii veeso vëdahe utenda vaja mu uhuvëi. 14Veeso vëkeutegheeya mahumo a Gëyahudi mba maraghëëyo a antu unë vëumëjughuta tutë. 15Gusoko gwa antu vasaa në aja mantu oong'e maja. Ëgweeso gwa antu avoo në nëvëkhwalë nanë vëtihuvëe gutie intu në rija. Mahaa awe nanë dhamiri yawe ikhombekie. 16Veeso vëgitendaa vëmumanyie Muungu, ëgweeso veeso vëumukhana mweeso gwa ntendo yawe. Veeso vëna mahurisyo, vëtina ikuryo, na veeso vëtinoneye gwa intu roong'e në rija.
Currently Selected:
Tito 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.