Yakobo 1
1
Iramucho
1Nene Yakobo, mutumami wa Muungu na wamwa Müküü Yesu Kiristo, ngumwandëkëa nyenye, makabila ikumi na avëë, nëafaghatëe muurëmi. Amuchi!
Uhuvëi na ihaa
2Anyandughu vanë, mutendeke mwina uyanjo utüfu na maighiyo hiyahiya, 3gusoko mumanyie mwino uëghëëywa gwa uhuvëi wanyu ugumweetea ughimëëyi. 4Mumanye mwino ughimëëyi wanyu ugumwimëcha faka mpeo, mudahe utendeka mwi vaja ino na mukhondekie, gwa udëa ukefewa ukhani mba umwe. 5Ëgweeso nësa umwe wanyu wakefewa ihaa, uvii imunoneye amurombe Muungu nëugudaha umufa, gusoko Muungu uguvafaa voong'e gwa gëhe.
6Ëgweeso imunoneye arombe gwa uhuvëi gwa udëa uhanga wisaghasaghëi mbanduvë. Muntu nëwina wisaghasaghëi wë mwino mafefe a irambo në iküü asaa në ëgusuntëëywa na ugümangwa na mpefo. 7Muntu në wëë gëtë wasuu atasëghee uguhanga intu mbarëmwe ufuma kunë Müküü. 8Muntu në wina masëgho igavëë wina wësaghesangëe mu njëa yakwe yong'e.
Ütuki nanë ughwarë
9Munyandughu në mütuki imunoneye ayanje itungo në Muungu wamuhumbuchaa, 10na mughwarë noo imunoneye ayanje në watununtiwaa na Muungu. Gusoko mughwarë uguwüra mwino sembe. 11Yuva rëuduaa na gwa ufyu wayo në ukharë ugumyaa nkinda, nanë sembe yayo igügwaa, na uja wakwe woong'e ügüruvëkaa. Vii uvii, mughwarë ugumeeywa mumantu akwe.
Ufiimwa na Ughemwa
12Bahu akwe muntu nëugimëka vija mumaghemwa, gusoko nëwaghimëëya ugufewa gëfewa ga ufanga gasëë në Muungu wawafee iraghano vasaa nëvëmwaanjëte. 13Në muntu waigheeywa atahanyee: “nëuigheeywa na Muungu.” Gusoko Muungu atiuigheywa na uvë, mbesa mweeso atuigheeywa në muntu mbaumwe. 14Ëgweeso muntu uguigheywa nauguutwa na ukwatiwa na nkümbü yakwe në mbë. 15Nkümbü nëavëya igufafaa ihutye në ibë, ihutye ryeesonoo nërakhoma rëufafaa nkuya.
16Anyandughu vanë, ayanjwi, mutagikhongee! 17Muu gëfewa në gëja na muu gëfëwa nëgëkhondekie gëufumaa girunde, gëufumaa kunë Tata, mutundi wa vimwëë, mweeso nëatiukhaanëkëkaa mbesa atikweti gahada manduvë ga ufëëntukanga. 18Gwa iyanje rakwe mweeso mughonjo agagufafa sese gwa ukhani wa tutë akwe gudahe utendeka nkhari ya mwandyo mukhatë a ntundo yakwe.
Utegheeya na Utenda
19Anyandughu vanë ayanjwi, rëkümbükwi ihanyo ërëë. Muu muntu na atendeke mworo wa utegheeya, ëgweeso ti mworo wa urighëëtya na ti mworo wa ukwatwa ikuwo. 20Munya ikuwo atiudaha uyatenda asaa në Muungu uguyafenjaa në atutë. 21Gwa uvii, üjughuti kureengë mwenendo në uvë na nduvi yoong'e nëmbë, ivëki fang'ë amwa Muungu na ughenyifa ukhani uroo nëwafandëwe munkhoo yanyu, wasuu nëudahëte uyityoa nkhoo yanyu.
22Mutikhongee nyenye aghonjo, gwa utegheeya gutufu ukhani wakwe, ëgweeso tendi mwino ukhani uguhanya. 23Muntu gëkaku nëuguutegheeyaa ukhani wasuu gweeso atiutenda mwino uguhanya, wasuu wëë mwino muntu nëugiraraavaa ikeru rakwe mughonjo mu giroore. 24Ugiraravaa mweeso mughonjo, faafo ugwendaa kunë winjë, na muu gënyafaafo ugyëwaa mwino chu urë. 25Ëgweeso muntu nëugumëraraavaa vija seria në ëkhondekie asëë në ëguvafaa antu uhaghaaro, muntu nëufwaghëëre umëkwatëëra, na ti umëtegheeya gutufu na ukoo usonge umëwa, ëgweeso utenda mwino ëguhanya, muntu wasuu uguforiwa mu gëntu në ugugëtenda.
26Nësa muntu ugiona mwino në muntu në wina diini, gweeso atiudaha uwibala urëmë wakwe, diini akwe ëtinoneye intu mbanduvë, na ugikhonga mweeso mughonjo. 27Diini nënjija ino na në ëtikweti ihondo usonge a Muungu Tata unë chëëyë: Uvaarëëya anaakëva nanë ahimbë mu malwe awe, na gighoja mughonjo utakhombwee na urëmi uruu.
Currently Selected:
Yakobo 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.