Lburania 13
13
Nkutogoloto e siedi o nkirorokino
1Entewueni ichamama ana lalachera o nkanachera. 2#Ng'as 18:1–8, 19:1–3Emirikino nkitoomono ee lomon, amu kore te inia oitiei keitoomonita lkulikae lmalaikani meyielo. 3Entaparru lolo ooyena te jila atuwuana ienana o ninche, o lolo ooitamitae sina atuwuana ntae eitamitae.
4Keyiere neyanyit pooki ng'ae nkiyema. Nemeata ajo meaku lpayian o ntomononi naaisiligai, amu keiguanare ꞉Nkai ltung'ani oboitere te sesen lpayian anaa ntomononi namara nenye o pooki ng'ae oas loloito. 5#Nkit 31:6,8; Yoch 1:5Emiaku ltung'ana oaata lubo ee ropiyiani, enchoo eitiemu ntae ntoki niatata amu ketejo Nkai, <<Maaing'uaa nanu iyie aikata, namaaiturraa hooyia.>> 6#SNk 118:6Naaku ikintieu aatejo, <<Laitoriani laretoni lai, namaureicho nanu, kaji aaidim ltung'ani aikuna?>>
7Entaparru larikok linchi ootilikita ntae rerei le Nkai. Eng'ura lwuenet lenche, nirukuruk ana nairuko ninche. 8Kore Yeso Kristo naa meibelekenya, kore netiu apake, nejia etiu taata, naa nejia etiu ntarasi.
9Emincho eitopong'oo ntae mbaa kumo naapaachere nkiteng'ena ang. Keichiaakino metaa munyani e Nkai etumie ltauja lang ngolon, mara nkibung'ata ee nkitanapat naaipirita ndaa nemeret abaki lolo ooirukurukore nenia kitanapat. 10Ikiata lperere la lasar laa kore lolo loowuon eitai lasar ta nkaji e Nkai e apa, nemeichooro metama nkitainot e lasar naatii lperere lang.
11 #
Lal 16:27
Kore laitainoni kitok la lasar loo lyiaudi, naa keya lodo loo suom atua Ng'oji sinyati naaisul pooki ta nkaji e Nkai, meeitukoi ng'ok ee ltung'ana. Kore lpopoki lee nenia suom naaitainyieki lasar, nepejori ta aulo e inie ng'oji nemanya ltung'ana loo Isirael.
12Naaku kore sii Yeso ketama abaki ninye ꞉sina taulo e lkerenket payie eitisiny ltung'ana ꞉lodo lenye. 13Maipung'o naa taatua nchula ee ltung'ana aapuo neti Yeso, niking'iri anyit natama apa ninye, 14amu mikiata tene lkerenket obik, kake iking'oruta inia ang nalotu.
15Naaku kore aimu Yeso, maitaki naa Nkai lasar le nkisisa nkata pooki, kimbalie nkarna enye too nkutukie aang. 16Mirikino ias supati tanaa ing'arichiere lkulie,#13:16 Kore Mirikino ias supati tanaa ing'arichiere lkulie naa kejo laigeroni le ana palai Mirikino ias supati tanaa nchula. amu kore asat naijo nenia naa lasar oiting'id Nkai. 17Entining larikok linchi nintodoyioyio ate taabori ninche, amu ntae eirrita eyielo aajo keipar kenya ꞉Nkai. Entining ninche payie etumoki ninche aataas siaai lenche te ng'ida meata long'unyung'unyi, amu mesupataki ntae inia.
18Entoomonoki iyioo amu ikisip aajo mikiata nakurrieki iyioo, tankaraki ikiyieu nikias naaichiaakino taa mbaa pooki. 19Kaamon ntae entoomon, oleng payie aachuku Nkai inie nitii too kuna naataana.
20-21Kore Nkai napeny seriani, /nailiepunyie Laitoriani lang Yeso Kristo ilo chekut kitok loo nkerra, taatua lootuata tankaraki naibukori lodo lenye oitibirie lning'o obik ntarasi, meeichoo ntae aiputaki ntoki pooki supat niyieuu payie itumtum aataas inia nayieu ninye. Meichoo naa ꞉Nkai Yeso Kristo metaasicho taatua iyioo payie kitum aataas inia naiting'id Nkai. Metaa nenye nkisisa ntarasi o ntarasi.
22Kaomon naa ntae lalachera o nkanachera payie ing'iriri kuna baa naitaarriyianaka ntae tana palai, amu kaigeroka ake ntae to ndorropo.
23Kayieu niyielouu aajo ketalakuaki lalache lang Timoti te jila. Naa kore tanaa kesieku alotu natii, nalotu aisabaki ntae tenebo o ninye.
24Eroroki larikok linchi pooki o sinyat le Nkai. Keiroroki sii ntae lolo ooing'uaa nkop e Itali.
25Metaa munyani e Nkai tenebo o ntae pooki.
Currently Selected:
Lburania 13: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy
