Lev 6
6
1Nyakubaho akagambira Musa ati: 2Omuntu weena ku arikora ekibi, ataaba mwesigwa ahari Nyakubaho, ahabw'okugobeza mutaahi we eki amubiikize nari eki amwemerereire, nainga okumunyaga nari ku ariba akaakaatikire mutaahi we, 3nainga yaatorotoora ekibuzire, kwonka yaakiryangatanisa naarahira ebishuba omu kintu kyona eki abantu bakora bakacumura, 4mbwenu omuntu ku arikora ekibi nk'ekyo, yaagiibwaho orubanja; aryariha eki anyagire, nari eki atungiise eishaija, nainga eki baamubiikize, nari ekibuzire eki yaatorotoire, 5nari ekintu kyona eki yaarahiriire naabeiha. Ekyo kintu aryakiriha kyona, kandi akitemu kimwe kya kataano, akihe mukama waakyo aha izooba eri ariheerayo empongano y'ekibi kye. 6Reero atwarire omuhongyerezi empongano y'ekibi kye, ei yaahongyera Nyakubaho. Niyo mpaya y'entaama etaine kamogo, ei aihire omu busyo bwe, ei mubaririire obuguzi bwayo kuhika empongano y'okwihwaho orubanja. 7Omuhongyerezi amukarabire omu maisho ga Nyakubaho, n'onu asaasirwe ekintu kyona eki omuntu akora kikamureetera orubanja.
Ekiragiro ky'ekitambo ky'okucwetsya
8Nyakubaho akagambira Musa ati: Ragiira Arooni n'abatabani noobagira oti: 9Eki nikyo kiragiro ky'ekitambo ky'okucwetsya. Ekitambo ky'okucwetsya kiryateebwa aha mahega g'aha itambiro, kigumeho ekiro kyona okuhitsya omu kasheeshe. Kandi omuriro gw'aha itambiro gugume nigwaka. 10Reero omuhongyerezi ajware ekijwaro kye ekya bafuta, n'empare ye ya kitaani, ayoore eiju ry'ekitambo ekisiriiziibwe kikacwekyeza aha itambiro, arite aha rubaju rwaryo. 11Bwanyima ajuure ebyo bijwaro, ajware ebindi, atware eiju aheeru y'orusiisira, aryate omu mwanya gushemeire.
12Omuriro gw'aha itambiro gugume nigwaka, gutariraara. Omuhongyerezi agume agwenegyezemu enku buri kasheeshe, agutungikyeho gye ekitambo ky'okucwetsya, kandi agwokyezeho enyama z'ebishaju ez'ebitambo by'okurya kumwe. 13Omuriro gugume nigwakira ahari eryo itambiro obutoosha, gutariraara.
Ekiragiro ky'omutoijo gw'esaano
14Kandi eki nikyo kiragiro ky'omutoijo gw'esaano. Beene Arooni baryaguma bagutoijere Nyakubaho omu maisho g'eitambiro. 15Omwe omuribo akoreho oruhi rw'esaano y'obunono bw'ogwo mutoijo, hamwe n'amajuta gaagwo n'obubaani bwona obugumaamagiziibweho, agwokyeze aha itambiro kuba ekiijutsyo eki ekisooroora kyakyo kiraagwise gye Nyakubaho. 16Haza esaano eraatsigareho, Arooni n'abatabani bagiriire omu Mwanya Ogurikwera etarimu kitumbisa, omu kibuga ky'eihema ry'okubugabuganiramu. 17Etariteekwa erimu ekitumbisa. Naagibaha kuba omugabo gwabo ogw'ebitambo byangye ebyokize. Egyo saano n'ekintu ekirikwerera kimwe, nk'empongano y'ekibi n'ey'okwihaho orubanja. 18Omushaija weena ow'omuri beene Arooni naikirizibwa kugiryaho nk'ekiragiro ky'ebiro byona omu busingye bwanyu bwona, guri omugabo gwabo ogwihirwe aha bihongyeirwe Nyakubaho ebyokize. Weena oribikoraho aryaba orikwera.
19Nyakubaho akagambira Musa ati: 20Ogu n'omutoijo ogu Arooni n'abatabani baritoijera Nyakubaho, aha izooba ri omuhongyerezi arisiigirwaho amajuta. Kimwe kya ikumi ky'encuro y'esaano y'obunono, kuguma kiri omutoijo gw'esaano, ekicweka kyayo kutoijwa omu kasheeshe, n'ekindi omu mwabazyo. 21Guryaguma guteekyeranwe n'amajuta aha kyoma ekikarangirwaho. Mugureete gutobagiibwe gye guri obubanda buteekirwe nk'obw'omutoijo gw'esaano. Mugutoije, gube ekisooroora ky'okugwisa gye Nyakubaho. 22Omuhongyerezi omukuru ow'omuri beene Arooni, agutoijere Nyakubaho nk'oku kirikuragiirwa obutwire bwona. Gwona oku gurikwingana gwokibwe. 23Buri mutoijo gw'esaano ogutoizirwe omuhongyerezi guryayokibwa gwona, tiguririibwa.
Okuhongyerera ekibi
24Nyakubaho akagambira Musa ati: 25Gambira Arooni n'abatabani oti: Eri niryo eiteeka ry'empongano y'ekibi. Omu mwanya ogu baitiramu enyamaishwa z'ebitambo by'okucwetsya babe nigwo baitiramu n'ey'empongano y'ekibi omu maisho ga Nyakubaho. Egyo mpongano neeyerera kimwe. 26Omuhongyerezi orikugihongyerera ekibi agirye; kandi eriirwe omu Mwanya Ogurikwera, omu kibuga ky'Eihema ry'okubugabuganiramu. 27Kyona ekirikora aha nyama yaayo kiryaba ekirikwera. Eshagama yaayo ku eritaraakira ekijwaro, muryakyogyeza omu Mwanya Ogurikwera. 28Kandi orwabya rw'eibumba oru eriteekwamu rwatwe, kwonka ku eriteekwa omu rw'omuringa, barutsigye barumunyunguzise amaizi. 29Weena oyetwa omushaija ow'omu bahongyerezi naikirizibwa kugiryaho, ahabw'okuba n'erikwera munonga. 30Kwonka batarirya empongano y'ekibi ei baihaho eshagama, bakagireeta omu ihema ry'okubugabuganiramu kukarabira ekibi omu Mwanya Ogurikwera. Egyo mpongano eyokibwe.
Ebindi biragiro by'empongano
Currently Selected:
Lev 6: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
