Lev 5
5
1Omuntu weena ku barimurahiza butunu kujurira eki yaareebire nari eki yaamanyire, haza akanga kukigamba aryagiibwaho orubanja.
2Omuntu weena ku arikora aha kintu kyona ekirikuzira, yaaba mutumbi gw'ekinyamaishwa, nari ogw'ekitungirwe ekirikuzira nainga gw'ebintu ebirikugyendesa enda atakimanyire, kwonka bwanyima yaakimanya, aryagiibwaho orubanja.
3Nari yaakora aha kintu kirikuzira eky'obuhangwa bw'omuntu, eky'omuringo gwona, atakikozireho nkana, kwonka ku arikimanya, aryagiibwaho orubanja.
4Nainga omuntu weena ku arirahukwa aha rurimi, yaarahira kukora ekibi nari ekirungi, okurahukwa aha rurimi kwona oku abantu barahira, atakimanyire, kwonka ku arikimanya, aryagiibwaho orubanja rw'eki yaarahira kyona.
5Mbwenu omuntu ku arigiibwaho orubanja rwa ibara kintu ahari ebyo, ayature ekibi ki akozire. 6Kandi ahabw'ekifubiro ky'orubanja rwakyo, areetere Nyakubaho omwagazi gu aihire omu busyo bwe, yaaba gw'entaama nari gw'embuzi ogw'okuhongyerera ekyo kibi. Mpaho omuhongyerezi amukarabire ahabw'ekibi kye.
7Kwonka ku ariba atarikubaasa kutunga mwagazi gw'omu busyo bwe, areetere Nyakubaho empongano y'okuhongyerera ekibi ki akozire, ey'amaiba abiri nari y'enkombe ibiri nto: emwe y'okuhongyerera ekibi, endiijo y'ekitambo ky'okucwetsya. 8Abireetere omuhongyerezi; n'onu abanze ahongye empongano y'ekibi. Agihotore ebitsya, kwonka atagicwaho omutwe. 9Reero amiisiire aha rubaju rw'eitambiro eshagama y'empongano y'ekibi, eshagama eraatsigareho agifukunkurire omu mizi y'eitambiro. Egyo n'empongano y'ekibi. 10Bwanyima aheyo eya kabiri kuba ekitambo ky'okucwetsya nk'oku ekiragiro kiri. Omuhongyerezi amukarabire ahabw'ekibi ki akozire, abone kusaasirwa.
11Kwonka ku araabe atarikubaasa kutunga amaiba abiri nari enkombe ibiri nto, obwo areete eigaro ry'esaano y'obunono kuba empongano y'ekibi ki akozire. 12Atyo arireetere omuhongyerezi, n'onu akoreho oruhi kuba ekiijutsyo, arwokyeze aha itambiro aha mpongano ezi bookyeza Nyakubaho. Egyo n'empongano y'ekibi. 13Nikwo omuhongyerezi araamukarabire ahabw'ekibi ki akozire ekya ibara muringo ahari ebyo; reero asaasirwe. Kandi ekicweka ekiraatsigareho kibe eky'omuhongyerezi, nk'oku batwaza empongano y'esaano.
Empongano y'okuriha
14Nyakubaho akagambira Musa ati: 15Omuntu ku arikora ekibi ky'okutaba mwesigwa, eki atakozire nkana, yaaremwa kuhayo emitoijo erikwera ei arikuragiirwa kutoijera Nyakubaho, areetere Nyakubaho empaya y'entaama etaine kamogo ei aihire omu busyo bwe, ebe empongano y'ekibi kye ei muraabariirire obuguzi bwayo omu mpiiha z'efeeza, nimureebera aha rurengo rw'empiiha y'Omwanya Ogurikwera. Mpaho ebe empongano y'orubanja rwe. 16Haza arihe ebicwero ebirikwera ebi yaaremirwe kuha, kandi abyongyereho kimwe kya kataano. Abihe Omuhongyerezi, n'onu amukarabisize egyo mpaya y'entaama ey'empongano y'eki acumwire, haza abone kusaasirwa.
17Omuntu weena ku arikora ekibi, yaakora eki Mukama yaazibiire, nobu yaakuba atarikukimanya, kwonka yaagibwaho orubanja, orwo rubanja ruryamutukurira. 18Areetere omuhongyerezi empaya y'entaama etaine kamogo, agiihire omu busyo bwe; mugibaririire nk'obuguzi bwayo obuhikire kuba empongano y'ekibi. Mpaho omuhongyerezi amukarabire ahabw'ekishobyo ki atarakozire nkana, reero asaasirwe. 19Egyo n'empongano y'ekibi ahabw'okugira orubanja omu maisho ga Nyakubaho.
Empongano y'ekibi ekikozirwe nkana
Currently Selected:
Lev 5: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
