Yirile 31

Yewe 'Kòridiʔɛ kpíʔilevɔlilɔ nyíɛnɛ bèle nɛ̀ kɔ̀n

1A Yewe ń'nɛ̀ ki juu Misa mɛ́ nɛ́ jo: 2«-Ki wéli, mi nyɛ́nì Bɛtisalɛli nyíɛnɛ nɛ̀ kɔ̀n, Uri jaa wè, Uri ŋáà wī Kuri jaa wè, Zuda saʔa tùlugo nī gè. 3A mi 'wi fungo nyì gè nɛ́ mi Kulocɛliɛ Pìle ní lè, a ni 'kacɛ́nnɛ kɛn lè wi mɛ́, nɛ́ sícilige ní gè, nɛ́ baara ti mìɛni cɛ́ngoligo kɛn gè wi mɛ́, 4wiri jaʔa bèri baara táà cɛ́ngi bèri ti kpínʔini wi nyùgo kúrugu gè, dàa dī tiɛ wori dè, nɛ́ walifiiwe nɛ́ kányiɛrɛ wori dè; 5bèri lagbɛnrɛ kàdɛniyɛ tɛngi yè béri yi nii yi tiɛyɛ nī yè, bèri tiitɛngɛ baara kúu dè, bèri baara ti mìɛni felide kúu dè. 6Nɛ̀ taʔa ki nɛ̄, mi nyɛ́nì Woliyabi líɛ wè, Akisamaki jaa wè, Dan saʔa tùlugo nī gè, nɛ̀ wi fàri Bɛtisalɛli nɛ̄ wè. Mi 'sícilige nyɔ́gɔ gè pe mìɛni nigbe nigbe nī, bàli bīɛlɛ nɛ́ kacɛ́nnɛ ní pe funyɔ nī yè, kire ga buu pe- gbɛ̀ jáa bè yɛrɛ dáà ti mìɛni kpíʔile dè dàa mi 'juu nɛ̀ gbɛ̀ngɛ muɔ mɛ́ dè: 7Kpàlidiʔɛ Kpátaʔa gè, nɛ́ nyakungɛngɛ finʔɛgɛ ní gè nɛ́ kàsulugo suɔdiʔɛ gáà gī ki naamɛ gè, nɛ́ yakpiʔilide ti mìɛni dàa pe líi nɛ Yewe gbùʔɔrɔ baara kúu dè Kpátaʔa nī gè; 8nɛ́ tabali nɛ́ wi yakpiʔilide ní dè, nɛ́ tiɛ cɛ̀nwɛ fètindaʔagɛlɛ nɛ́ ke yakpiʔilide ti mìɛni ní dè, nɛ́ wusuna sórigodiʔɛ ní gè; 9nɛ́ Yewe gbùʔɔrɔdiʔɛ yafanʔa ní gè, kakuɔrɔ kaasuʔuro wuʔu gè, nɛ́ ki yakpiʔilide ti mìɛni ní dè, nɛ́ tasaakpuʔɔ ní gè nɛ́ ki tɛ́ngɛdiʔɛ ní gè; 10nɛ́ burudiinre ní dè dàa pe 'sɔ́migɔ nɛ̀ kpíʔile dè, dàa dī kacuɔnriwɔ Arawɔn burudo wàlidɛngɛrɛ dè, nɛ́ dàa dī wi jaala burudo dè, dàa pe béri nii bèri kacuɔnrilɔ baara kúu dè; 11nɛ́ siɛnnyiɛnɛgɔn sùnmɔ ní bè, nɛ́ nùdaanna wusuna ní wè ŋàa pe béri sórigi wè mi tiɛcɛ̀ngɛ wàlidɛngɛgɛ nī gè. Baakuɔlɔ pe bé ti kpíʔile bè yɛli nɛ́ dàa ní mi 'juu nɛ̀ gbɛ̀ngɛ muɔ mɛ́ dè.»

Cɛndɛnigɛ kire gī Sinayii nyakungɛngɛ fìɛ wè

12A Yewe kɛ́nì ki juu Misa mɛ́ nɛ́ jo#31.12 Koliyo 12-17 tiʔɛ nī gè, wéli baa 20.8-11; 23.12; 34.21; 35.2; Sél 2.1-3; Lev 23.3; Fàn 5.13-14.: 13«Ma ki juu Isirayɛli siɛnnɛ mɛ́ bèle ma pe yɛ:

«Yeli 'yɛli bè cɛndɛnigɛ wuʔu cò gè kpuʔɔ nɛ́ kányiʔɛ ní, nɛ́ ki cɛ́n kiī fìɛ mi nɛ́ yeli sunʔɔmɔ ní bè#31.13 Cɛndɛnigɛ kiī nyakungɛngɛ fìɛ gàa ki 'kpíʔile Sinayii nyagurugo nɛ̄ gè, majo bɛ̀ kàsaŋɔnɔ tíɛlɛ lè nàa ni 'puu fìɛ Nɔwe nɛ́ Yewe sunʔɔmɔ nī bè (wéli baa Sél 9.13), majo bɛ̀ kɛnɛkɛnɛ wuʔu tíɛlɛ gè, gàa ki 'puu fìɛ Yewe nɛ́ Birayima sunʔɔmɔ nī bè (wéli baa Sél 17.11)., kɛ̀ngɛlɛ ke mìɛni nī, kire ga buu yeli ki cɛ́n mi Yewe wè, mi mi yeli wàlí nɛ tɛ́ngi yeli- puu mi wuulo#31.13 Tiʔɛ gáà siɛnrɛ tiī nɛ ki tìí Yewe cé Isirayɛli siɛnnɛ wàli bèle nɛ̀ tɛ́ngɛ peri baara wi mɛ́, bèri wire gbùʔɔrɔ́ cɛndɛnigɛ cɛngɛ nī gè. Siɛnnɛ pe yé yɛli bè lɛ̀lɛ láà wàli bè tɛ́ngɛ cɛndɛnigɛ cɛngɛ gè, bè pínɛ buu nɛ́ Yewe ní tiɛnugo nī. Piyè cé yɛli bè kò de sɔ̀ngí baara tire wuʔu yákuɔ nɛ̄ʔ; pe 'yɛli bè pe sɔ̀ngirɔ taʔa dè Yewe nɛ̄ nɛ́ ki cɛ́n peli yē Yewe wi wuulo.. 14Yeli 'yɛli bèri tɔ́ri nɛ́ cɛndɛnigɛ ní gè gàa mi 'wàli nɛ̀ tɛ́ngɛ kiiyɛ yeli mɛ́ gè, nɛ́ ki cɛ́n kiī cɛngbuʔɔ. A siɛn ŋíì 'ki cúʔɔ gè, kire siɛn wi 'yɛli bè kpúu wī. A siɛn 'baara ó baara kúɔ kire cɛngɛ nī gè, kire siɛn wi bé yige péwu wi siɛnnɛ nī bèle. 15Cɛnyɛ kɔlini sunʔɔmɔ nī bè, yeli bé yeli baara ti mìɛni kúɔ. Kɔlisiinwuʔu nɛ̄ gè, kire yē cɛndɛnigɛ nɛ́ ní cɛnŋɔdaʔa wàlidɛngɛgɛ Yewe mɛ́ wè; yeli sǐ baara yafiɛn kúɔʔ. A siɛn ó siɛn 'baapile nigbe kúɔ kire cɛngɛ nī gè, wi 'yɛli pe- wi kpúu wī.

16«Isirayɛli siɛnnɛ pe 'yɛli pe- cɛndɛnigɛ cò gè kpuʔɔ; kɛ̀ngɛlɛ ke mìɛni siɛnnɛ béri ki kpóri. Kire yē nyakungɛngɛ lɛ̀lɛ ó lɛ̀lɛ. 17Kire bé puu fìɛ mi nɛ́ Isirayɛli siɛnnɛ ní bèle lɛ̀lɛ ó lɛ̀lɛ, nɛ́ ki cɛ́n cɛnyɛ kɔlini sunʔɔmɔ nī Yewe nyɛ́nì nyìʔɛnɛ nɛ́ dàala faan lè; cɛnyɛ kɔlisiinwuʔu nɛ̄ gè, a wi 'baara yérige dè nɛ́ ŋɔ́ nɛ̀ taa.»

18Bà Yewe 'juu nɛ̀ kúɔ nɛ́ Misa ní wè Sinayii nyagurugo nɛ̄ gè, a wi 'nyakungɛngɛ siɛnrɛ kàdɛnitɛnyɛ siin kɛn yè wi mɛ́. Yi yé puu kàdɛniyɛ siin nyàa pe yé tɛn yè, nyàa nɛ̄ Kulocɛliɛ wire tíimɛ kabiɛlɛ cé sɛbɛ yè.

Currently Selected:

Yirile 31: sev

Highlight

Copy

Compare