Yirile 30

Wusuna sórigodiʔɛ kpíʔilegɛnmɛ wori dè

1A Yewe ń'nɛ̀ jo#30.1 Weli 'tiʔɛ gáà siɛnrɛ taʔa dè baa wī bè ti lúʔugɛnnɛ cìile lè.: «Muɔ bé gbùʔɔrɔdiʔɛ káà faan nɛ́ akasiya tiire ní dè bèri wusuna sórigi wè. 2Ki tɔnigɛnmɛ pi bé puu kabuunyɛni nigbe, nɛ́ ki píɛlɛgɛnmɛ pi bé puu kabuunyɛni nigbe. Sórigodiʔɛ ki kayɔbiyɔ sicɛri yi mìɛni bé puu nuyɔ. Ki kpàʔalagɛnmɛ pi bé puu kabuunyiʔɛnɛ siin. Ki nyɛgɛlɛ ke mìɛni bìnɛ bé puu nigbe nɛ́ sórigodiʔɛ ní gè. 3Muɔ bé tiɛ cɛ̀nwɛ nyɛgɛ bè ki tɔ́n ki naamɛ gè, nɛ́ ki lìʔɛgɛlɛ ní gèle, nɛ́ nyɛgɛlɛ ní gèle. Muɔ bé ki nyuɔyɔ màʔa yè bè suʔu nɛ́ tiɛ ní wè. 4Muɔ bé kájingele siin kpíʔile nɛ́ tiɛ ní bé ke nɔrigi ki lìʔɛgɛlɛ siin nī gèle, ki nyuɔyɔ láara yè. Kire kájingele siin gálì keli nī pe béri kàgbiʔile nii gèle bèri ki líi. 5Akasiya tiire muɔ bé líɛ bè kàgbiʔile gálì kpíʔile gèle, bé ke tɔ́n nɛ́ tiɛ ní wè. 6Ma sórigodiʔɛ tɛ́ngɛ gè gunbɔli fɛ̀ni yiʔɛ mɛ́ gè, gunbɔli fɛ̀ni ŋáà wi 'nyakungɛngɛ finʔɛgɛ nɛ́ ki kàsulugo suɔdiʔɛ làrigɛ gè, tiʔɛ gáà nī m'béri muɔ kpàlí wè.

7«Kire sórigodiʔɛ gáà kire nɛ̄ Arawɔn béri nùdaanna wusuna sórigi wè sínbinimɛ táanni bè, a wi jiin bèri fètingele gbòborí gèle. 8Nɛ́ míɛni cɛnguɔwuɔmɔ nī bè, wi béri wusuna sórigi wè a wi 'jíin bè fètingele cáan gèle. Yeli béri wusuna sórigi wè súuri Yewe yiʔɛ mɛ́ gè, kɛ̀ngɛlɛ ke mìɛni nī. 9Yeli sǐ ga tíi wusuna wáà wiiyɛ sórigo díɛʔ ŋàa miì tìɛ wèʔ, nɛ́ kakuɔrɔ kaasuʔuro dèʔ, nɛ́ yaliire yakɛnrɛ ní dèʔ, nɛ́ míɛni yeli sǐ ga tíi kakuɔrɔ diviɛn wo baaʔ. 10Arawɔn bé jíin tɔligɔ nigbe yiɛlɛ nī lè bè kàsulugosuɔ baara kúɔ dè, nɛ́ kapiʔile kàsulugo kaara sìsiɛn ní gè, bè ki taʔa sórigodiʔɛ nyɛgɛlɛ nɛ̄ gèle. Tɔligɔ nigbe yiɛlɛ nī lè#30.10 Wéli baa Lev 16., wi bé kàsulugosuɔ baara kúɔ dè sórigodiʔɛ nɛ̄ gè, kɛ̀ngɛlɛ ke mìɛni nī. Nɛ́ ki cɛ́n ki bè kò sórigodiʔɛ cɛ̀njɛngɛ wàlidɛngɛgɛ Yewe mɛ́.»

Yewe wi 'sìi sàri yakɛngɛ wori juu dè

11A Yewe ń'nɛ̀ ki juu Misa mɛ́ nɛ́ jo: 12«A muɔ kɛ́ni Isirayɛli siɛnnɛ tɔ́ri bèle bè pe nyuɔ cɛ́n gè, siɛn ó siɛn 'yɛli bè wi sìi sàri wali kɛn wè Yewe mɛ́ tɔ́rilɔ lɛ̀lɛ nī lè, kire ga buu wuʔɔgɔ ki fǎga tuu siɛn nɛ̄ wèʔ, tɔ́rilɔ lɛ̀lɛ nī lè. 13Siɛn ó siɛn pe 'tɔ́ri wè, kire siɛn wi 'yɛli bè walifiiwe walikpele tílaga kɛn, bè yɛli nɛ́ Yewe saawalidɛngɛgɛ ki wali tɔ́rigɛnmɛ ní bè, ŋàa wi yē gera#30.13 Gera wori dáà ti 'juu náʔa gè, kire yé puu nɛ wali wi lúbugɛnnɛ tìí. Walifiiwe walipile tílaga wori dè, wi lúbugɛnnɛ ni bé gbɛ̀ nyaa giraminɛ kɔlini. Wéli baa Tɔ́nminɔgɛnnɛ Tìɛdiʔɛ nī gè. wi kpègele togo gèle. Wi bé walifiiwe walipile tílaga kɔ̀n gè bè kɛn mi Yewe mɛ́.

14«Siɛn ó siɛn wi 'yiʔɛlɛ togo taa nɛ́ ŋàa wi 'kàa taʔa wè, tɔ́rilɔ lɛ̀lɛ nī lè wi 'yɛli wi- kpuʔɔrɔ dáà kɔ̀n dè bè kɛn mi Yewe mɛ́. 15Walifɔli wiǐ kɛn nìʔɛgɛ bè tóri fɔ̀ngɔfɔli nɛ̄ wèʔ; fɔ̀ngɔfɔli míɛni wiǐ kɛn cíʔɛ bè tóri walifiiwe walipile tílaga nɛ̄ʔ, a pe kɛ́ni sìi sàri wali kɔ̀ngí wè nɛ kanʔa mi Yewe mɛ́ wè. 16Muɔ bé sìi sàri wali ŋáà líɛ wè Isirayɛli siɛnnɛ mɛ́ bèle bé wi tíʔɛ bè Kpàlidiʔɛ Kpátaʔa baara kúɔ dè, kire ga buu Yewe wi de sɔ̀ngí de taʔa nɛ́ Isirayɛli siɛnnɛ ní bèle, pe sìi sàri wori nɛ̄ dè.»

Yewe wi 'kányiɛrɛ tasaakpuʔɔ kpíʔilegɛnmɛ tìɛ bè

17A Yewe 'juu nɛ́ Misa ní nɛ́ jo: 18«Muɔ bé kányiɛrɛ tasaakpuʔɔ káà kpíʔile peri pìye jíri, bé ki tɛ́ngɛdiʔɛ kpíʔile gè nɛ́ kányiɛrɛ ní. Muɔ bé ki tɛ́ngɛ Kpàlidiʔɛ Kpátaʔa nɛ́ gbùʔɔrɔdiʔɛ yafanʔa sunʔɔmɔ nī bè, bé luʔɔ le ki nī. 19Arawɔn nɛ́ wi jaala pe 'yɛli pe- pe kiyɛ jíge yè nɛ́ tɔliyɔ ní yè nɛ́ kire luʔɔ ní gè. 20A pe kɛ́nì je jíin Kpàlidiʔɛ Kpátaʔa nī gè, pe 'yɛli peri pìye jíri nɛ́ kire luʔɔ ní gè kire ga buu pe fǎga kùuʔ. Nɛ́ míɛni, a pe kɛ́nì je sìʔɛrɛ bè kpɔni gbùʔɔrɔdiʔɛ nɛ̄ gè bè pe baara kúɔ dè bè kakuɔrɔ kaara sórigo dè nɛ́ kàsun ní gè Yewe yiʔɛ mɛ́ gè, pe béri pìye jíri nɛ́ luʔɔ ní gè, kire ga buu pe fǎga kùuʔ. 21Pe bé pe kiyɛ jíge yè nɛ́ pe tɔliyɔ ní yè, kire ga buu pe fǎga kùuʔ. Tire bé puu fànʔa kaala lɛ̀lɛ ó lɛ̀lɛ Arawɔn nɛ́ wi siimɛ mɛ́ bè, kɛ̀ngɛlɛ ke mìɛni nī.»

Yewe wi 'siɛnnyiɛnɛgɔn sùnmɔ kpíʔilegɛnmɛ tìɛ bè

22A Yewe 'juu nɛ́ Misa ní cígini nɛ́ jo: 23«-Nùdaanna yɛrɛ táà líɛ dàa ti 'nyuɔ nɛ̀ tóri dìi nɛ̄ dè: miiri sùnmɔ culolo kɔlini; nɛ́ sinamɔni nàgɔriyɔ culolo taanri, nùdaanna woyo yè; nɛ́ kanɛli culolo taanri ní, nùdaanna wuʔu gè; 24nɛ́ kase nàgɔriyɔ culolo kɔlini, bè yɛli nɛ́ Yewe saawalidɛngɛgɛ ki culolo tɔ́rigɛnmɛ ní bè#30.24 Eburu sɛbɛrɛ nī dè, nùdaanna yɛrɛ dáà dè pe 'ti kíri nɛ́ ti lúbugɛnnɛ yeri lè sikile, á weli 'ki tɔ́nminɔ nɛ́ «culolo» nyuɔ ní.. Ma wolivi sùnmɔ kíri bè, gbɔngbonyiɛyɛ siin, ma pi nyaʔami ti nī. 25Siɛn ŋáà wi 'nùdaanna sùnmɔ nyaʔamigɛnmɛ cɛ́n bè, wi- ti kpíʔile. Gàa kire bé puu siɛnnyiɛnɛgɔn sùnmɔ peri Yewe baacɛ̀nrɛ kúu dè nɛ́ pi ní. 26Muɔ bé ki sùnmɔ báà líɛ bè, bè Kpàlidiʔɛ Kpátaʔa nyɛri nyɛri gè, nɛ́ nyakungɛngɛ finʔɛgɛ ní gè, 27nɛ́ tabali ní wè nɛ́ wi yakpiʔilide ti mìɛni ní, nɛ́ fètindaʔagɛlɛ tiige nɛ́ ki yakpiʔiligele ní gèle, nɛ́ wusuna sórigodiʔɛ ní gè, 28nɛ́ Yewe gbùʔɔrɔdiʔɛ yafanʔa, kakuɔrɔ kaasuʔuro wuʔu ní gè, nɛ́ ki yakpiʔilide ti mìɛni ní, nɛ́ tasaakpuʔɔ ní gè nɛ́ ki tɛ́ngɛdiʔɛ ní gè. 29Muɔ bé ti wàli bè tɛ́ngɛ; ti bé puu yacɛ̀njɛnrɛ wàlidɛngɛrɛ. A yɛgɛ ó yɛgɛ 'cò ki nɛ̄, kire yɛgɛ ki bé kò wàlidɛngɛgɛ. 30Muɔ bé kire siɛnnyiɛnɛgɔn sùnmɔ wo bè Arawɔn nɛ́ wi jaala nɛ̄ bèle bè pe wàli dɛ́ngɛ, kire ga buu peri kacuɔnrilɔ baara kúu dè mi mɛ́.

31«Muɔ bé ní ki juu Isirayɛli siɛnnɛ mɛ́ bèle bé pe yɛ: ‹Siɛnnyiɛnɛgɔn sùnmɔ báà pi bé puu wàlidɛngɛbɛ mi mɛ́ lɛ̀lɛ ó lɛ̀lɛ. 32Siɛn sì yɛli bè pi pàa tùugi wi céri nɛ̄ dèʔ. Siɛn míɛni sì yɛli bè pi pàa kpíʔile pi- puu nubo nɛ́ pi níʔ. Pi yē wàlidɛngɛbɛ; pi 'yɛli bè kò wàlidɛngɛbɛ yeli yiʔɛ mɛ́. 33A siɛn ki sùnmɔ páà kpíʔile nɛ́ siɛn wáà tùugi nɛ́ pi ní wè, nɛ̀ ki yaʔa kire siɛn wi wè kacuɔnriwɔ wèʔ, pe bé kire siɛn yige péwu wi siɛnnɛ sunʔɔmɔ nī bè.› »

Yewe wi 'wusuna nyaʔamigɛnmɛ tìɛ bè

34A Yewe sí ki juu Misa mɛ́ nɛ́ jo: «Ma nùdaanna yɛrɛ dáà caa dè, dàa dī sitakite wè, nɛ́ ɔnikisi ní wè, nɛ́ galibunɔmi ní wè, nɛ́ wusuna cìiliwe ní wè; ma ti nyaʔami tìi nī. Ti mìɛni tɔ́nminɔgɛnmɛ pi bé puu sìnjaa. 35Siɛn ŋáà wi 'nùdaanna sùnmɔ nyaʔamigɛnmɛ cɛ́n bè, wi bé ti mìɛni tíʔɛ bè wusuna kpíʔile wè, bé yasuʔɔgɔ nyaʔami ti nī. Wusuna wi bé puu wàlidɛngɛwɛ bè puu cìiliwe. 36Muɔ bé wàa muʔɔrɔ bè wi kpíʔile míige bè wi taʔa nyakungɛngɛ finʔɛgɛ yiʔɛ mɛ́ gè, Kpàlidiʔɛ Kpátaʔa nī gè, baa mi cî nɛ muɔ kpàlí wè. Kire bé puu yeli nyaamɛ nɛ̄ yacɛ̀njɛngɛ wàlidɛngɛgɛ. 37Yeli sì yɛli bè wusuna ŋáà wi wàa kpíʔile bèri wi sórigi yeli tíimɛ wuuʔ. Yeli béri wi tɔ́ri yawalidɛngɛgɛ gàa gī Yewe wuʔu gè. 38A siɛn wi wàa kpíʔile wi tíimɛ wuu wè, nɛ wi sórigi nɛ wi nùgo suu gè, pe bé kire siɛn yige péwu wi siɛnnɛ sunʔɔmɔ nī bè.»

Currently Selected:

Yirile 30: sev

Highlight

Copy

Compare