Yirile 27
27
Kòridiʔɛ dàligɛ ki gbùʔɔrɔdiʔɛ kpíʔilegɛnmɛ bè
1A Yewe ń'nɛ̀ jo: «Muɔ bé sí Yewe gbùʔɔrɔdiʔɛ kpíʔile gè nɛ́ akasiya tiire ní. Ki tɔnigɛnmɛ pi bé puu kabuunyiʔɛnɛ kogunɔ, nɛ́ ki píɛlɛgɛnmɛ pi bé puu kabuunyiʔɛnɛ kogunɔ. Gbùʔɔrɔdiʔɛ ki kayɔbiyɔ sicɛri yi mìɛni bé puu nuyɔ. Ki kpàʔalagɛnmɛ pi bé puu kabuunyiʔɛnɛ taanri. 2Muɔ bé nyɛgɛlɛ kpíʔile bè tárigɛ gbùʔɔrɔdiʔɛ ki gɔ̀ninɔ tiʔɛlɛ sicɛri ke mìɛni nɛ̄, kire ga buu nyɛgɛlɛ gèle nɛ́ gbùʔɔrɔdiʔɛ ní gè, ti mìɛni- pínɛ bè puu sìnbogo. Muɔ bé ki mìɛni pínɛ bè tɔ́n nɛ́ kányiɛrɛ ní. 3Muɔ bé ki yakpiʔilide kpíʔile dè nɛ́ kányiɛrɛ ní: ma yaleye yáà kpíʔile nyàa yi béri cúnʔɔ kɔ̀ngí gè gàa nɛ̄ kaara sùnmɔ pi 'wo bè, bé ki yakɔnyɔ kpíʔile yè, nɛ́ ki sìsiɛn nyɛri tasaadurulo ní bèle, nɛ́ ki gànʔana dɛ̀ngɛlɛ ní gèle kaara wuʔulo gèle, nɛ́ ki kàsun kɔ̀nyɛrɛ ní dè. 4Muɔ bé kányiɛrɛ kàwiire nɛ̀gɛ kpíʔile bɛ̀ jùɔ kàwiʔile tíɛlɛ, bé kányiɛrɛ kájingele sicɛri kpíʔile ki nɛ̄ gɔ̀ninɔ sicɛri nɛ̄ bèle. 5Muɔ bé ki timɔri dáà kóri dè ki nyuɔyɔ táanmɛ gè, kire ga buu timɔri ti 'gbùʔɔrɔdiʔɛ cò gè sunʔɔmɔ nī bè ki laamɛ nī bè, bè tìgi táanmɛ gè. 6Muɔ bé akasiya kàgbiʔile siin tɛn, bé ke tɔ́n nɛ́ kányiɛrɛ ní. 7Muɔ bé ke kàgbiʔile le gèle kájingele nī gèle; kàgbiʔile ke bé puu gbùʔɔrɔdiʔɛ ki lìʔɛgɛlɛ siin tiɛyɛ nī yè, kire ga buu pe gbɛ̀ ki líɛ. 8Kire gbùʔɔrɔdiʔɛ gáà ki 'kpíʔile nɛ́ tiitɛnkpɔbiyɔ ní yè, ki laamɛ pi bé puu waʔanɛ bè yɛli nɛ́ fìɛlɛ bálì ní mi 'tìɛ muɔ nɛ̄ nyagurugo naamɛ gè#27.8 A siɛn ó siɛn yé pɛn Kòridiʔɛ mɛ́ gè nɛ́ kakuɔrɔ yajuʔu ní gè, kacuɔnriwɔ wi nɛ̂ cé ki ̂ sorigo kire gbùʔɔrɔdiʔɛ yafanʔa nɛ̄ gè nɛ̀ yɛ̀lí nɛ́ kɛnmɛ bíì nɛ̄ Yewe cé ki tìɛ pe nɛ wè, kire ̄ ga buu Yewe- fɔ̀li ki nɛ̄ ki- kò kàsulugosuɔ wuʔu wi mɛ́. Wéli baa Lev 1 ..»
Kòridiʔɛ sùlugɛnmɛ bè
9«Muɔ bé Kòridiʔɛ dàligɛ sùlu gè nɛ́ fɛ̀ni ní wè ŋàa pe 'tìin nɛ́ lɛn lagbɛnrɛ jèsii pìniwe ní wè. Cɛngɛnyɛnifolimɛ kàliige kɔli mɛ́ gè, fɛ̀ninɛ pe bé tìgi bè tɔni bè sa nɔ̀ fúɔ kabuunyiʔɛnɛ dabataan (100) ki kayɔbigɔ nɛ̄ gè. 10Muɔ bé kire fɛ̀ninɛ bálì tùɔn tùɔn bèle kányiɛrɛ tiindugugolo togo nɛ̄ gèle, gàli pe 'cɔ́ri nɛ̀ yérige kányiɛrɛ nyùyɔ nɛ̄ yè. Muɔ bé walifiiwe yakparigɛlɛ le gèle tiindugugolo nɛ̄ gèle nɛ́ walifiiwe yatunʔɔnɔ ní gèle, bé fɛ̀ninɛ tùɔn tùɔn bèle ke nɛ̄. 11Bɛ̀ ki bé puu míɛni cɛngɛnyɛnifolimɛ kàmɛgɛ kɔli mɛ́ gè. Fɛ̀ninɛ pe tɔnigɛnmɛ pi bé puu míɛni kabuunyiʔɛnɛ dabataan (100). Muɔ bé kire fɛ̀ninɛ bálì tùɔn tùɔn bèle kányiɛrɛ tiindugugolo togo nɛ̄ gèle nɛ́ ke kányiɛrɛ táanmɛ nyùyɔ ní yè, gàli gīɛlɛ nɛ́ walifiiwe yakparigɛlɛ nɛ́ ke yatunʔɔnɔ ní gèle. 12Cɛngɛnyɛnijiinmɛ kɔli mɛ́ gè, fɛ̀ninɛ pe píɛlɛgɛnmɛ pi bé puu kabuunyiʔɛnɛ togosiin nɛ́ kpɔrigɔ. Ki fɛ̀ninɛ pe bé tùɔn tiindugugolo kiɛ nɛ̄ gèle, gàli pe 'cɔ́ri nɛ̀ yérige kányiɛrɛ nyùyɔ kiɛ nɛ̄ yè. 13Cɛngɛnyɛnifolimɛ kɔli mɛ́ gè, dàligɛ tiʔɛ ki píɛlɛgɛnmɛ pi bé puu míɛni kabuunyiʔɛnɛ togosiin nɛ́ kpɔrigɔ.
14,15«Wìile náà nī baa dàligɛ ki jíindiʔɛ nī gè kire kɔli mɛ́ gè, fɛ̀ninɛ bé puu nàkpanʔa wìile ni kayɔbiyɔ siin nɛ̄ yè. Pe tɔnigɛnmɛ pi bé puu kabuunyiʔɛnɛ kiɛ nɛ́ kogunɔ; pe bé pe tùɔn tiindugugolo taanri nɛ̄ gèle, gàli pe 'cɔ́ri nɛ̀ yérige nyùyɔ taanri nɛ̄ yè. 16Lɛn lagbɛnrɛ fɛ̀ni ŋáà pe 'tìin nɛ́ jèsii pìniwe ní wè, ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, wi bé nàkpanʔa wìile tɔ́n lè. Wire 'yɛli bè jɔli bé wi súu. Wi píɛlɛgɛnmɛ pi 'yɛli pi- puu kabuunyiʔɛnɛ togo. Pe bé pe tùɔn tiindugugolo sicɛri nɛ̄ gèle, gàli pe 'cɔ́ri nɛ̀ yérige nyùyɔ sicɛri nɛ̄ yè.
17«Tiindugugolo gálì ní pe 'dàligɛ sùlu gè ke kányiɛrɛ nyùyɔ nɛ̄ yè, ke mìɛni bé suʔulo kìye nɛ̄ nɛ́ walifiiwe yakparigɛlɛ ní gèle nɛ́ ke walifiiwe yatunʔɔnɔ ní gèle. 18Dàligɛ tiʔɛ ki tɔnigɛnmɛ pi bé puu kabuunyiʔɛnɛ dabataan, nɛ́ ki píɛlɛgɛnmɛ pi bé puu kabuunyiʔɛnɛ togosiin nɛ́ kpɔrigɔ, ki láʔagɛlɛ ke mìɛni nɛ̄. Lɛn lagbɛnrɛ jèsii pìniwe fɛ̀ninɛ gunyɔ yi kpàʔalagɛnmɛ pi bé puu kabuunyiʔɛnɛ kogunɔ. Tiindugugolo ke táanmɛ nyùyɔ tiɛyɛ yi mìɛni bé puu kányiɛrɛ, 19nɛ́ míɛni ki yakpiʔilide dáà pe líi nɛ Yewe gbùʔɔrɔ baara kúu dè Kòridiʔɛ nī gè, nɛ̀ fàri ki tínganʔana nɛ̄ gèle nɛ́ dàligɛ tiʔɛ ki fɛ̀ninɛ gunyɔ tínganʔana ní gèle.»
Fètindaʔagɛlɛ tiige cògɛnmɛ bè
20«Muɔ bé ki juu bè gbɛ̀ngɛ Isirayɛli siɛnnɛ mɛ́ bèle peri báan nɛ́ wolivi sùnjiilimɛ ní, bàa pe béri nii cɛngɛ ó cɛngɛ fètingele nī gèle, fètindaʔagɛlɛ tiige nɛ̄ gè. 21Arawɔn nɛ́ wi jaala ní bèle, peli pe béri fètingele gbòborí gèle Kpàlidiʔɛ Kpátaʔa#27.21 Kpàlidiʔɛ Kpátaʔa kire yé puu Kòridiʔɛ ki míʔɛ káà. Wéli baa 25.9 kaliwɛgɛ ki táanmɛ gè. nī gè, baa gunbɔli fɛ̀ni yiʔɛ mɛ́ gè, wire ŋáà wi nyakungɛngɛ finʔɛgɛ láara gè. Pe béri ke cáanri cɛnguʔɔ gè keri nyí de kpìɛnmɛ tun bè, Yewe yiʔɛ mɛ́ gè. Dàa tire yē fànʔa kaala lɛ̀lɛ ó lɛ̀lɛ nī Isirayɛli siɛnnɛ yiʔɛ mɛ́ gè, kɛ̀ngɛlɛ ke mìɛni nī.»
Currently Selected:
Yirile 27: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
