Ŋwà’ne Ngyà jʉ’ 1
1
Nzyè nò
1Anò gie áa tsɛ̀ɛ yɔɔn ŋwà’ne áa gie á laa lelyěen, Yěsô Kristo gÿo ńgÿo mé zsé. Á gwaa gwɔ́, mbà Ssé tʉ̌ njÿó ńgÿo Yěsô zsé yɛ̌ nò légwɔ́ gie à ge la’te mbwo pʉ̀a pé mmó gie á ge tɔ́g tó. Kristo la túmo cÿɔ́’ we, á gʉa ńda’te yɛ̌ nò á mbwo Jâŋ gẅie aa ngàŋa fà’ Yěsô. 2Jâŋ ŋwɛ́ aa jʉ’ɔɔn ńne ńŋwe’e kɔ̀ɔkɔ́ɔ gie à ka gyǎ. Kwà’ yé ne ńgɔɔn ngie á fóo mbwo Ssé, ńgwɔ́ nò gie áa nénʉ́, mbà Yěsô Kristo ka gÿo mé zsé. 3Ashÿó mbòŋo aa nyìŋ gẅie à ge tóŋo yɔɔn ŋwà’ne. Pà shÿó mbòŋo gwɔ́ pʉ̀a pie pɔ́ ge jú’u yɔɔn shwóŋè gie á fóo mbwo Ssé, é gÿo mmó gie mé ŋwe’é tsoló. Á nue fʉ̀’ gie mɔɔn menò gee mbumté á tsoté tà ne ḿbɔ́ɔnte.
Atsyɛ̀’te mbwo mecú’tè pʉ̀a Kristo mie ée sɔɔn mbʉ́a
4Yɔɔn ŋwà’ne fóo mbwo mèŋ Jâŋ, mèŋ n ŋwe’e ńnáa mbwo mecú’tè pʉ̀a Kristo mie ée sɔɔn mbʉ́a, ńgwɔ́ tsɛ̀ɛ ngwòŋ Azia. E Ssé gẅie aa wó, mbà à laa wó, à piŋ ńne ńtóo, pâ mezẅìge sɔɔn mbʉ́a mie ée mvfò lʉŋe lefùɔ yé, pɔ́ ne ńgwɔ́ né pi, ńne ńnéŋe sẅétè ntʉ́m pi. 5Yěsô Kristo gẅie aa njÿò ńgyá we nénʉ́, ńgwɔ́ ndùŋ mvfò múɔ, ńgwɔ́ ndùŋ mvfò nyìŋ gẅie à la kwé ḿbiŋ ńzím, ńgwɔ́ Fùɔ cʉa mefùɔ pie ée ndùmo ssé tsetsá’, á gíŋe ńne ńgwɔ́ né pi, ńgíŋe ńne ńnéŋe sẅétè ntʉ́m pi.
Yé Kristo kwoŋo wégè tɛ’, à la lɔg metse mé ńkyɛ́’ nkÿo menò tepòŋ ná pege. 6À la lɔgɔ wégè ńgÿo pʉ̀a pie ée tsɛ̀ɛ nò *lefùɔ Ssé, ńgíŋe ńdɔgɔ wégè ńgÿo pànuŋe pwɔ́’ pá’ pege ge fa’a mbwo Tá we Ssé. Legú’ mbɔɔ metʉ̀ e lá’a ńgwɔ́ pɔ́ mbwo yé Yěsô Kristo á nà ngù’ nkɔ́ɔn nê nkɔ̌ɔn. *Amen
7!Pi ké ńzsé ngie à ne ńtóo. À ge lá’ tó pɔ́ tsɛ̀ɛ melɔ́ɔn. Awɔ̌wɔ́ɔ ge lá’ záb lejÿɔ́g ná ye, tà mbɔɔ pʉ̀a pie pɔ́ la sɔbɔ gwǒŋo nnɛ́ yé. Epʉ̀a ngwòŋo ngwòŋ ndùmo ssé tsetsá’ ge lá’ zéme pwó, é kɔ́’ legwé tí yé. Oon á ge lá’ gwɔ́ pɔ́ pú’u, tà mmó le mǒ kúbe. *Amen. 8Cʉ̀apʉ̀a Ssé gẅie aa wó, mbà à laa wó, à piŋ ńne ńtóo, á yé ngàŋa tʉ̀ ntsèm, à ne ńgɔɔn ngie: Mèŋ n gee Alfa, ńgwɔ́ Omega.
E Ssé nyɛ̌’ nÿɔ́g Jâŋ á gyá Kristo
9Àa mèŋ Jâŋ, fɛ́ gẅi, ńcʉa ná pá’ pege la nnɛ́ ná Yěsô. Pege pǔ ńne ńgyá ngɔ́’, ḿbú ńgwɔ́ tsɛ̀ɛ nò *lefùɔ Ssé, ḿbiŋ ńgíŋ ńne ńdɔgɔ kwɔ́gɔ nnɛ́ ńzẅí’te Yěsô. Mé la gʉa Patmos, á gwɔ́ lá’ gie ntse la kéle ńnéŋe soŋ, ńnyé wɔ̀ɔn, mélà’ mie mèŋ shwóŋó nò Ssé ḿbiŋ ńkú’te mmó gie Yěsô Kristo ka gÿo mé zsé. 10Á gÿo ńgwɔ́ lyɛ’ɛ́ lá’ Cʉ̀apʉ̀a, a Zẅìge Ssé jʉʉ wɔ̀ɔn. N jú’ tsɔ̌ ngyè tetʉ́ʉ gwɔ́ nzèm mèŋ, ńne ńcʉ́me pá’ ngyè ntàŋ la, 11ńne ńgɔɔn ngie: Cú’te kɔ̀ɔkɔ́ɔ gie ɔ̀ ne ńgyá, ńŋwe’e tsɛ̀ɛ lepu’ú ŋwà’ne, ńtúm ńnáa mbwo mecú’tè pʉ̀a Kristo mie ée sɔɔn mbʉ́a, ńgwɔ́ tsɛ̀ɛ metÿǒsoŋ mɔɔn: Efeso, Smirne, Pɛrgame, Tiatire, Sardɛ̀s, Filadelfia, Laodisé.
12N jú’ pú’u, ésele nnɛ́ lé gyá nyìŋ gẅie à gɔɔn nò mbwo mèŋ, ésele nnɛ́ pú’u, ńgyá melâm sɔɔn mbʉ́a mie mé la lɔgɔ tʉ̌ gɔ̂l ńnyɛte. 13N gyá tsɔ̌ nyìŋ á tyé tsetsɛ̀ɛ melâm ápɛ̌, ńgwɔ́ pɔ́ pá’ *Míŋ Nyìŋ mesoŋ la, ḿma’a tsɔ̌ tà’ shʉ̀a nzsǒ á cwóŋ tà ńtyé mekwò yé, á lɔgɔ tsɔ́ pɔ́ɔn mmó ńtʉ́me kʉ́kʉ́b we, á gwɔ́ gie mé la lɔgɔ tʉ̌ gɔ̂l ńnyɛte. 14Menòŋo twó mé fɔ́gɔ lê tɔ́d, pɔ́ pá’ megẅì la. Nÿɔ́g mé kyɛ’ jʉ’ pá’ lʉ́me mmɔ̌g la. 15Mekwò mé la ne ńŋwʉŋe pá’ tʉ̌ nʉ̀ gie mé nyé ńtsíbe mmɔ̌g la. Ngyè ye ne ńzẅɛɛ pá’ lepí sie é zyɛ́’ɛ la. 16Á kú’te mecÿɔ́’ saŋ sɔɔn mbʉ́a nà lɔ̌ɔn pwó yé ye tʉ̀. Etsɔ̌ nně ncù gie à twó sẅíte, é gẅiin mengʉ́ŋ mémbʉ́a ne fóo ncwò yé ńkẅɛɛ. Eshÿó wé ŋwʉŋe pɔ́ pá’ lejÿɔ́g nèm á tsɛ̀ɛ zsǒ la.
17N gyá yé pú’u, ésẅɛ́’ ńnuŋe mekwò yé, ńcʉ́’ ńnuŋe jʉ’ó, ńcʉ́’ ńgwɔ́ pɔ́ pá’ mpfó. Á lêen ńké ńzába pwó yé ye tʉ̀ ná mèŋ, ńgɔɔn ngie: Tè gíŋe ńcÿɔ’, mèŋ n gee Ndùŋ mvfò, ńgwɔ́ nzsònzèm 18Mèŋ n gee nyìŋ gẅie à gÿo mé gwɔ́ wó. N da kwé, tá mèŋ n gee fʉ̀’ɔɔn ńgwɔ́ wó, é ké lá’a gwɔ́ pɔ́ wó. Mèŋ n gẅiin metsɔ́’ɔ kí, mie é náa wɔ̀ɔn metʉ̀ lélɔg ńjÿɔ́’ɔ jʉ’ gie mepfó ée wó, kà pɔ́ lélɔg ńtsɔ́’ éfó wó ńkẅile pʉ̀a wɔ́. 19Pú’u la, pú ŋwe’e kɔ̀ɔkɔ́ɔ gie ɔ̀ gyǎ, á gie ɔ̀ ne ńgyá fʉ̀’ɔɔn mbɔɔ gie ɔ̀ ge piŋ tá gyá. 20Á gʉa nà lezsě mmó gie mecÿɔ́’ saŋ sɔɔn mbʉ́a mie ɔ̀ gyǎ mèŋ n gẅiin ná pwó yɔ́ɔn ye tʉ̀, mbɔɔ ná melâm sɔɔn mbʉ́a mie mé la lɔgɔ tʉ̌ gɔ̂l ńnyɛte, mbà mèŋ n ge shwóŋó gú ngie: Mecÿɔ́’ saŋ sɔɔn mbʉ́a lɔgɔ ńgwɔ́ *mecÿɔ́’ Ssé pie é pyɛ́bɛ mecú’tè pʉ̀a Kristo ŋwɛ́ sɔɔn mbʉ́a. Melâm sɔɔn mbʉ́a lɔgɔ ńgwɔ́ mecú’tè pʉ̀a Kristo ŋwɛ́ sɔɔn mbʉ́a.
Currently Selected:
Ŋwà’ne Ngyà jʉ’ 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.