Malékuse 1
1
Anò Jâŋ Mbabtist
(Matio 3.1-12; Lukase 3.1-6,15-18; Jâŋ 1.19-28)
1Nzyetè Nkʉ̀ Mbòŋo Yěsô Kristo gẅie aa Míŋ Ssé, e yɔɔn 2E la zye pá’ Ssé la gɔɔn tsɛ̀ɛ ŋwà’ne *ntsẅì nkʉ̀ we Esǎya ngie:
«Jú’u, mèŋ n ge túmo mántúm wɔ̀ɔn
à gwɔ́ mvfò ńně ńkɔ́’ɔ nzsè jù, ɔ ne ńtóo.
3Ngyè nyìŋ kwɔ̌’ fó nkwòŋo tsẅɛ, ńgɔɔn ngie:
Pi nyɛte mánzsè Cʉ̀apʉ̀a,
ńgÿo melyěen nzsè mé e tyé ndʉŋ ndʉŋ#1.3 Es 40.3 »!
4Jâŋ gÿo ńnéŋe tà ńkẅɛɛ nkwòŋo tsẅɛ, ńně sá’a mbwo lá’ ngie pɔ́ kúbe mà wɔ́b, ńgÿo à nú’u wɔ́b ntse, e Ssé lege menò tepòŋ mɔ́b ńnáa mbwo pɔ́b. 5Pʉ̀a tà ńgyɔ́ɔn leen ńké fóo tsɛ̀ɛ pàga ngwòŋ Jẅidea ńtóo, lelÿò fóo Yerósalem ńtóo ńgyá Jâŋ, ńzẅíŋe menò tepòŋ mɔ́b, á nú’u wɔ́b tsɛ̀ɛ ntse Jurdeŋ.
6Jâŋ laa nkwòŋo tsẅɛ, ḿma’ nzsǒ, mbà mé la lɔg menòŋ kamel ḿbá’, ńdɔgɔ *ngùb nɔ̀ɔn ńtʉ́me zẅɛ̌’ yé. À lɔ̌ɔn ḿpfɛ́ɛ ngǐm ḿbiŋe ńjÿó nŋwá’a tsẅɛ. 7À lɔ̌ɔn ńgɔɔn mbwo lá’ ngie: Atsɔ̌ nyìŋ aa nzèm mèŋ ńně ńtóo, à cʉa wɔ̀ɔn, mèŋ fó tè ku’u mbɔɔ léŋwé’e Ssé, ńkyɛ́’ menkÿo melɔ̌ɔn mé wɔ́. 8Mèŋ n deen ńgẅiin yɔ́ɔn pɔ́ ndà’ lénu’u gẅi tsɛ̀ɛ ntse. Tá’ á ké ńgʉa ná yé, mbà à ge tó ńnéŋe gẅi pɔ́ mbwo Zẅìge Ndʉalʉ̌a.
Yěsô zyě fà’ yé
(Matio 3.13-17; Lukase 3.21-22)
9Á laa nà lyɛ̌’ ásɛ̌, Yěsô leen ńké fó Nǎzarɛd, á tsɛ̀ɛ pàga ngwòŋ Galilea ńtó, ńgyá Jâŋ, á nu’u yé tsɛ̀ɛ ntse Jurdeŋ. 10Yěsô ně fóo ntse ńkẅɛɛ, ńgyá ncwò tÿǒ lepwó gwóon ńtsɔ́’ɔ ńtyé, Zẅìge Ndʉalʉ̌a sẅɛ́’, ńgwɔ́ pá’ kàpʉ̀ŋ lá, ńtó ńtyé ná yé. 11Ngyè fó tÿǒ lepwó ngie: Ɔɔ míŋ wɔ̀ɔn, mèŋ n kwoŋo ɔ́ tɛ’, n záb ntʉ́m wɔ̀ɔn ná gù.
12À Zẅìge tóo ná Yěsô pá’ɔɔn, ńtsó yé, á gʉa lê nkwòŋo tsẅɛ. 13Pâ menɔ̀ɔn zɔ̌ gwɔ́ wó, ńnéŋe ńnéŋe lyɛ’ɛ́ lá’ móm lekùa, Sátà gwáa ńtóo ńtsóte yé ngie à fʉa nò. *Mecÿɔ́’ Ssé ne ńdíe yé.
Anò gie Yěsô lɔ̌ɔn ńzí’i pʉ̀a
(Matio 4.12-17; Lukase 4.14-15)
14Mé la gwɔ́ tà ńgwoon Jâŋ ńnéŋe ndá tsǎŋ, Yěsô gʉa nê Galilea. À lɔ̌ɔn ńtsẅii nkʉ̀ mbòŋo gẅie é fóo mbwo Ssé ńgɔɔn ngie: 15Afʉ̀’ áa pá’ɔɔn, mbà á kǔ’ tà Ssé ge zye lényɛ Lefùɔ sé. Pi kúbe mà gẅí, ḿbiŋ ńzẅíŋ nkʉ̀ mbòŋo wɔɔn ŋwɛ́.
16Yěsô gÿo ne ńgiŋe ngʉ̀ŋe máa ntse gẅie ée Galilea, ńgyá mbàŋa yépʉ́a, á gwɔ́ Símo pɔ́ fɛ́ we Ndeléya. Pɔ́ ne ḿmá’a lekÿo ntse, á nue yɔ́b fà’ laa léfa’ messó. 17Yěsô gɔɔn né pɔ́b ngie: Pi tó pege zɔ cʉ́’ʉ ńgiŋe, mèŋ n gÿo pi cʉ́’ʉ fa’a pɔ́ pʉ̀a mesoŋ. 18Pɔ́ gwóon ńnyé menkÿo mɔ́b, ńcʉ́me nzèm yé.
19Yěsô ná’a ńgiŋ, ńgyá tsɔ́ pʉ̀a mépʉ́a, á Jâg pɔ́ fɛ́ we Jâŋ, é gubé Zebede, pɔ́ gwɔ́ tsɛ̀ɛ kanú’ ne nyɛ́te menkÿo mɔ́b. 20Yěsô gwóon ńtóŋo wɔ́b yɔ́b, pɔ́ leen ńnyé tá wɔ́b Zebede pâ ngàŋa fà’, á tsɛ̀ɛ kanú’, ńcʉ́me nzèm yé.
Nyìŋ gẅie tsɔ̌ Ssé tepòŋ la gwoon yé, ńně ḿbue yé
21Pâ pɔ́ gÿo ńgʉa Kapernawúm, á gwɔ́ *lyɛ’ɛ́ nzsè pà Yuda, Yěsô gʉa *ndá cú’tè, ńzye lézí’i pʉ̀a nò Ssé. 22Alá’ jú’u shwóŋè yé, ḿbu ḿmɔɔn ye ntí lézí’i pʉ̀a mmó, mélà’mie à lɔ̌ɔn tě ńgÿo pá’ *pàkyàgte lepʉ̌ Mǒsê wɔ́, à lɔ̌ɔn ńzí’i tà ńzse mmó gie à gÿo yɛ̌.
23Á ne shwóŋe, tsɔ̌ nyìŋ gwɔ́ yé ndá ŋwɛ́, mbà tsɔ̌ *Ssé tepòŋ léen ńgwoon yé, á ńnéŋe tà ḿvege vege ńgá’te ngie: 24Yěsô, mûɔ Nǎzarɛd, pege gẅiin kɔ́? Ɔ ka fɔ̌ɔn ńtó pɔ́ lépyága wég ka? Mèŋ n ne ńzsé gú. Ɔ fóo lejʉ́ŋ Ssé, ńgwɔ́ Míŋ we. 25Yěsô cÿɔ́g yɛ̌ *Ssé tepòŋ ńgɔɔn né yé ngie: Láŋte, éfó ná nyìŋ wɛ̂ ńkẅɛ! 26E *Ssé tepòŋ ŋwɛ́ gwóon ńtɔ́ɔn ngàŋ ńcʉ́’ʉ yé lê tʉ̀, ńgwɔ fó ná yé kẅɛ, ńgá’te tɛ’. 27Á pú ńkʉ’ʉ lá’, pɔ́ mɔɔn, ńzɛ́te tsetsɛ̀ɛ pɔ́b ngie: Yɔɔn áa lêkɔ́? Áa pá’ɔɔn ńgwɔ́ pɔ́ tsɔ́ nò sẅé gie á giŋé ńkẅɛ la? À gwɔ̌ tà ńdɔgɔ tʉ̀, ńtsẅii nò mbwo *messé tepòŋ, pɔ́ jú’u ncwó we. 28Lezíŋ Yěsô gwóon saa lá’ tsɛ̀ɛ pàga ngwòŋ Galilea ŋwɛ́ ntsèm.
Yěsô ne ńzoŋo meguɔ tà ńgyɔ́ɔn
(Matio 8.14-15; Lukase 4.38-39)
29Yěsô pâ *ngàŋa kwò yé gÿo fó *ndá cú’tè ńkẅɛ, ńgʉa nê ndá pà Símo pɔ́ Ndeléya. Pâ Jâg pɔ́ Jâŋ pú ńgwɔ́. 30Mákẅì’ Símo la nuŋe, nnɛ́ ne ńkwɔ́’ɔ yé. Yěsô kúu wó mé gwóon shwóŋó yé. 31Á sẅɛ’te nnɛ́ ńtyé lejʉ́ŋ yé, ńkíbe pwó yé, ńgÿo á lu ssé. Nnɛ́ zá’a, á gʉa ńnyɛte shúm ńdɔg ńdye wɔ́b.
32Ncwò nzém gÿo ńgwɔ́, tà mbà nèm pyě, pʉ̀a jʉ’ó kaa megàŋa guɔ ntsèm, mbɔɔ pʉ̀a pie tsɔ́ *messé tepòŋ la ne ḿbue wɔ́b, ńdɔg ńtó ńgyá Yěsô. 33Pʉ̀a tÿǒsoŋ ŋwɛ́ metsèm cú’te ncwò ndá. 34Yěsô gÿo meguɔ ntí ntí ná pʉ̀a tà ńgyɔ́ɔn mag, ńgíŋe ńjwoŋ *messé tepòŋ, éfóo ná pʉ̀a ńkẅɛɛ. À lɔ̌ɔn tě ńzẅíŋe tà tsɔ̌ *Ssé tepòŋ ŋwɛ́ gɔɔn nò wɔ́, mélà’mie pɔ́ la ne ńzsé nyìŋ gẅie aa wɛ̌.
Yěsô shwoŋó nò Ssé á Galilea
(Lukase 4.42-44)
35Njÿó la gÿo ne ńdʉ́a, tà jʉ’ nyé síŋe sǐŋ, Yěsô lu ssé, éfó ndá ńkẅɛ, ńgʉa lê nkwòŋo tsẅɛ, ńzye lésẅíŋte Ssé. 36Símo pâ yetsɔ́ *ngàŋa kwò Yěsô cʉ́’ nzèm ne fa’a yé, 37ńgwɔ́ tà ńgyá yé, ńgɔɔn né yé ngie: Pʉ̀a metsèm ne fa’a gú. 38Yěsô tsɔ́’ɔ mbwo pɔ́b ngie: Pege gíŋe ńgʉa jʉ’ʉ ndyɛ̀’ɛ, á tsɛ̀ɛ metsɔ́ melá’ mie ée shÿó jʉ’ó, mèŋ shwóŋó nò Ssé mbɔɔ wó, ée nkẅɛ̌ ndá wɔ̀ɔn. 39Á gɔɔn pú’u, ńgwá ńgiŋe jʉ’ ntsèm tsɛ̀ɛ pàga ngwòŋ Galilea ntsèm, ńkúu tsɛ̀ɛ *mendá cú’tè, éshwóŋó nò Ssé, ńkúu ńjwóŋo *messé tepòŋ mie é pue pʉ̀a.
Yěsô gÿǒ tsɔ́ ngàŋ nkà’ zeŋe
(Matio 8.1-4; Lukase 5.12-16)
40Atsɔ̌ ngàŋ nkà’ gÿo ńtó ńkẅí’te mvfò Yěsô, ésẅíŋte yé, ńgɔɔn ngie: Ɔ lɔɔn ńkwoŋ, mbà ɔ ku’u légÿo n zeŋe. 41Mezìŋe mé kúu Yěsô, á tsege pwó ńkíbe yé, ńgɔɔn ngie: Mèŋ n kwǒŋ pú’u, zeŋe. 42Nkà’ gwóon ḿmaga ná yé, á zeŋe. 43Yěsô leen ngie, à gʉa, ńně ńtɔ́’ɔ yé tɛ’, 44ńgɔɔn ngie: Pɔ́ɔn léshwóŋó nyìŋ tsɔ́ nò. Gʉa ńnyɛ pɔ́ mbùm ɔ mbwo nùŋe pwɔ́’, ḿbiŋ ńnuŋe pwɔ́’ gẅie *lepʉ̌ Mǒsê ne ńzɛ́te mbwo nyìŋ gẅie nkà’ é magá ná yé, gÿo pú’u, pʉ̀a metsèm leen ńké ńzsé ngie ɔ zeŋe. 45Tá á gʉa, ńdeen ńgwá ńdɔgɔ nò ŋwɛ́ sá jʉ’. Á gwɔ gwɔ́ tà Yěsô tě ńgíŋe shʉ̀a shʉ̀a, ńkúu tsɔ́ tÿǒsoŋ wɔ́, ńcʉ́’ʉ ńzso pɔ́ mánzsè, á jʉ’ gie pʉ̀a té wó wɔ́. Mé ké ńně fóo jʉ’ ntsèm, ńtóo tǒ, ńgyá yé.
Currently Selected:
Malékuse 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.